(ភ្នំពេញ)៖ លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី៣១ ខែកក្កដា ឆ្នាំ២០២៥ បានបញ្ជាក់ជាថ្មីថា កម្ពុជាគោរពយ៉ាងពេញលេញ លើកិច្ចព្រមព្រៀងឈប់បាញ់ កម្ពុជា-ថៃ ហើយកងទ័ពកម្ពុជា ពុំដែលបានបំពានចំពោះបទឈប់បាញ់ម្តងណាឡើយ។

ការបញ្ជាក់ជាថ្មីនេះ ធ្វើឡើងក្នុងឱកាសដែល លោក ជុំ សុន្ទរី អញ្ជើញចូលរួមសង្ខេបព័ត៌មាន ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» គិតត្រឹមម៉ោង០៤ រសៀលថ្ងៃទី៣១ ខែកក្កដា ឆ្នាំ២០២៥ ដែលរៀបចំដោយអ្នកនាំពាក្យរាជរដ្ឋាភិបាលកម្ពុជា។

លោក ជុំ សុន្ទរី បានបញ្ជាក់យ៉ាងដូច្នេះថា «ក្រសួងការបរទេស និងសហប្រតិបត្តិការអន្តរជាតិ សូមអះអាងជាថ្មីម្ដងទៀត អំពីការគោរពដ៏ពេញលេញ ហើយឥតងាករេរបស់កម្ពុជា ចំពោះកិច្ចព្រមព្រៀងឈប់បាញ់គ្នា ដែលសម្រេចបាននៅប្រទេសម៉ាឡេស៊ី កាលពីថ្ងៃទី២៨ ខែកក្កដា ឆ្នាំ២០២៥»។

បន្ថែមពីនោះទៀត លោក ជុំ សុន្ទរី បានគូសបញ្ជាក់ថា កងកម្លាំងប្រដាប់អាវុធរបស់កម្ពុជា ពុំដែលបានបំពានទៅលើកិច្ចឈប់បាញ់គ្នាម្ដងណាឡើយ។ លោកថា ការបន្ដលើកឡើង នូវការចោទប្រកាន់ខុសពីការពិត គឺជាការប៉ុនប៉ង ដើម្បីបង្វែរការយកចិត្ដទុកដាក់របស់អន្ដរជាតិ ពីសកម្មភាពយោធារបស់ថៃ នៅតាមបណ្ដោយព្រំដែនប៉ុណ្ណោះ។

លោក​បានគូសបញ្ជាក់ទៀតថា ក្រសួងការបរទេស និងសហប្រតិបត្ដិការអន្ដរជាតិ សូមលើកឡើងជាថ្មីម្ដងទៀត នូវការអំពាវនាវរបស់រាជរដ្ឋាភិបាលកម្ពុជា ឲ្យមានការបង្កើតឡើងជាបន្ទាន់ នៅក្រុមឯករាជ្យមិនលំអៀង ដើម្បីត្រួតពិនិត្យបទឈប់បាញ់គ្នា ដូចដែលបានឯកភាព នៅក្នុងប្រជុំពិសេស នៅប្រទេសម៉ាឡេស៊ី។

លោក ជុំ សុន្ទរី បានសង្កត់ធ្ងន់ថា កម្ពុជាតាំងចិត្តយ៉ាងពេញលេញ ចំពោះច្បាប់អន្តរជាតិ មជ្ឈភាពអាស៊ាន ហើយនិងដំណោះស្រាយជម្លោះដោយសន្តិវិធី។ កម្ពុជាទាមទារឱ្យថៃ ឱ្យវិលត្រឡប់មករកមាគ៌ាស្ថាបនា ដោយឈរលើការគោរពគ្នាទៅវិញទៅមក តម្លាភាព និងកិច្ចសហប្រតិបត្តិការក្នុងតំបន់។

លើសពីនោះទៀត លោក ជុំ សុន្ទរី បានឲ្យដឹងថា កម្ពុជាត្រៀមធ្វើការជាមួយថៃ និងបណ្តាប្រទេសអាស៊ាន ហើយនិងសហគមន៍អន្តរជាតិ ដើម្បីធានាបទឈប់បាញ់ត្រូវបានប្រកាន់ខ្ជាប់ ហើយនិងស្តារមកវិញនូវសន្តិភាពតាមបណ្តោយព្រំដែន៕