(ឧត្ដរមានជ័យ)៖ លោក ប៉ែត សារ៉ាត់ អនុប្រធានមន្ទីរសាធារណការខេត្តកណ្ដាល និងជាអនុប្រធាន​យុវវិស្វករ​កម្ពុជា​ នៅថ្ងៃទី៣១ ខែកក្កដា ឆ្នាំ២០២៥ បានដឹកនាំក្រុមការងារ ស.ស.យ.ក វិស័យសាធារណការតំណាង លោកប្រធាន​យុវជន​វិស្វករ​កម្ពុជា​ យកអំណោយសប្បុរសធម៌របស់​ក្រុម​ការងារ​ មកចែកជូនដល់បងប្អួនវីរកងទ័ព ដែលកំពុងតែឈរជើងយ៉ាងរឹងមាំក្នុងការថែរក្សាបូរណៈភាពទឹកដី នៅតំបន់ប្រាសាទតាមាន់។

ពិធីនេះ មានវត្តមានចូលរួមពីសំណាក់យោធាជាន់ខ្ពស់កម្ពុជាជាច្រើនរូបផងដែរ ក្នុងក៍មានវត្តមានឧត្តមសេនីយ៍ត្រី នាក់ វង្ស ផងដែរ។

ក្នុងឱកាសនោះដែរ លោក ប៉ែត សារ៉ាត់ បានសំណេះសំណាលជាមួយបងប្អូនវីរកងទ័ពដែលបានកំពុងឈរជើងការពារទឹកដីពីការឈ្លានពានរបស់សត្រូវនៅជួរមុខ ដោយសំណូមពរសូមកងទ័ពយើងថែសុខភាពឲ្យល្អ និងបានថ្លែងអំណរគុណនិងដឹងគុណយ៉ាងជ្រាលជ្រៅជាទីបំផុតចំពោះការប្ដូរផ្ដាច់ឈាមស្រស់សាច់ស្រស់របស់បងបងវីរកងទ័ពយើង ដែលបានខិតខំតស៊ូប្រយុទ្ធយ៉ាងស្វិតស្វាញ ប្រឆាំងសត្រូវឈ្លានពានទឹកដីកម្ពុជា ដែលជាលទ្ធផលពួកសត្រូវបានដកថយទៅវិញដោយគ្មានបាត់ទឹកដីកម្ពុជាមួយមីលីម៉ែត្រណាឡើយ។

ទន្ទឹមនោះ បងប្អូនកងកម្លាំងដែលវីរៈកងទ័ពបានថ្លែងអំណរគុណយ៉ាងជ្រាលជ្រៅចំពោះលោក ប៉ែត សារ៉ាត់ ព្រម​ទាំង​ជា​អនុប្រធាន​យុវវិស្វករ​កម្ពុជា​ និងអ្នកពាក់ព័ន្ធទាំងអស់ដែលមានការយកចិត្តទុកដាក់ និងជួយគាំទ្រ ឧបត្ថម្ភជាបន្តបន្ទាប់។

អំណោយដែលបាននាំមកចែកជូនរួមមាន៖ សាច់គោ ត្រីខ មី កាហ្វេ គ្រឿងឧបភោគបរិភោគ និងថវិកាមួយចំនួន ដែលបានមកពីមន្ត្រីរាជការ ក្រុម​ការងារ​យុវជន​វិស្វករ​កម្ពុជា​ សមាជិក ស ស យ ក និងសមាជិកយុវជនគណបក្សនៃមន្ទីរសាធារណការនិងដឹកជញ្ជូនខេត្តកណ្ដាល៕