(ភ្នំពេញ)៖ នៅថ្ងៃទី៣១ ខែកក្កដា ឆ្នាំ២០២៥ លោកឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជន និងសហការី អញ្ជើញគោរពវិញ្ញាណក្ខន្ធសព លោកវរសេនីយ៍ត្រី លៀម សំពៅមាស មន្ត្រីប៉ុស្តិ៍នគរបាលការពារព្រំដែនគោកអានសេះ នៃវរសេនាតូចនគរបាលការពារព្រំដែនគោកលេខ៧៩៣ នៃនាយកដ្ឋាននគរបាលការពារព្រំដែនគោក ដែលបានពលីជីវិតក្នុងសមរភូមិប្រយុទ្ធជាមួយសត្រូវឈ្លានពានទឹកដី ក្នុងភូមិសាស្ត្រខេត្តព្រះវិហារ។

លោកឧត្តមសេនីយ៍ឯក លឹម សុខារស្មី បាននាំយកបច្ច័យរបស់ថ្នាក់ដឹកនាំ និងមន្ត្រីនគរបាលជាតិ នៃនាយកដ្ឋានគ្រប់គ្រងសន្តិសុខឯកជនទាំងអស់ ចំនួន៤,០០០,០០០រៀល ដើម្បីចូលរួមរំលែកទុក្ខជាមួយក្រុមគ្រួសារសពផងដែរ។

ក្នុងវេលាដ៏ក្រៀមក្រំនេះ យើងខ្ញុំសូមសម្តែងនូវសមានទុក្ខដ៏ធំធេង និងសោកស្តាយស្រណោះអាឡោះអាល័យជាទីបំផុត ចំពោះមរណភាពរបស់លោកវរសេនីយ៍ត្រី លៀម សំពៅមាស ដែលជាការបាត់បង់នូវកូន កូនប្រសារ ស្វាមី និងឪពុកជាទីស្រឡាញ់ ប្រកបដោយព្រហ្មវិហារធម៌ ជាសសរទ្រូងនៃគ្រួសារ ហើយក៏ដូចជាការបាត់បង់នូវមន្រ្តីនគរបាលជាតិដ៏សកម្មចំពោះការងារ ដែលជានិច្ចកាលបានលះបង់កម្លាំងកាយចិត្ត ពេលវេលា និងសេចក្តីសុខផ្ទាល់ខ្លួន ដើម្បីចូលរួមបុព្វហេតុថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ពិសេសការតស៊ូប្រយុទ្ធប្រកបដោយភាពអង់អាចក្លាហានជាមួយខ្លាំងឈ្លានពានសៀម។

ទោះបីរូបកាយបានឃ្លាតចាកពីលោកយើងទៅពិតមែន ប៉ុន្តែលោកបានបង្កើតស្នាដៃជាច្រើនរាប់មិនអស់សម្រាប់ជាតិ បន្សល់ទុកនូវកេរ្តិ៍ឈ្មោះ និងកិត្តិយសដ៏ឧត្តុង្គឧត្តម ដក់ជាប់ក្នុងដួងចិត្តយើងខ្ញុំទាំងអស់គ្នា មិនអាចបំភ្លេចបានឡើយ៕