(ឧត្តរមានជ័យ)៖ អភិបាលខេត្តតាកែវ លោក វ៉ី សំណាង នៅរសៀលថ្ងៃព្រហស្បតិ៍ទី៣១ ខែកក្កដា ឆ្នាំ២០២៥ បានដឹកនាំគណៈប្រតិភូរដ្ឋបាលខេត្ត នាំយកអំណោយ «មហាគ្រួសារខ្មែរ បេះដូងខេត្តតាកែវ» មកប្រគល់ជូនរដ្ឋបាលខេត្តឧត្តរមានជ័យ មានសម្ភារៈ៨៩មុខ ស្មើនឹង៦រថយន្ត និងថវិកាចំនួន៤០លានរៀល ដើម្បីទុកចាត់ចែងចែក ជូនបងប្អូនប្រជាពលរដ្ឋ ភៀសសឹក ជាង៣០០០គ្រួសារ ដែលកំពុងស្នាក់នៅ វត្តរត្តនឧត្តមមុនគិរីសែនជ័យ ហៅវត្តកំបោ ស្ថិតនៅភូមិដូនកែន សង្កាត់សំរោង ក្រុងសំរោង ខេត្តឧត្តរមានជ័យ។

ថ្លែងនៅក្នុងឱកាសនោះ លោក វ៉ី សំណាង បានចាត់ទុកការនាំយកស្បៀងអាហារ និងថវិកាជូនដល់រដ្ឋបាលខេត្តរមានជ័យ ដើម្បីចែកបន្តដល់បងប្អូនប្រជាពលរដ្ឋសិក គឺក្នុងស្មារតីខ្មែរជួយខ្មែរ ខ្មែរស្រឡាញ់ខ្មែរ ចេះជួយគ្នាទៅវិញទៅមក ចេះសាមគ្គីរួបរួមគ្នាតែមួយ នៅពេលដែលប្រជាពលរដ្ឋ និងប្រទេសជាតិជួបការលំបាក។
ស្ថិតក្នុងកាលៈទេសៈដ៏លំបាកនេះមានប្រជាពលរដ្ឋទូទាំងខេត្តតាកែវ បានចូលរួមបរិច្ចាគទាំងថវិកា និងកញ្ចប់ស្បៀងអាហារ ថ្នាំពេទ្យ និងសម្ភារៈប្រើប្រាស់នានាជាច្រើនទៀត ជួយដល់កងទ័ពជួរមុខ និងប្រជាពលរដ្ឋភៀសសឹក ពីតំបន់មានជម្លោះព្រំដែនកម្ពុជា-ថៃ។

លោកអភិបាលខេត្តរាកែវ បានលើកឡើងបន្តថា ផលវិបាកនៃសង្គ្រាមបានបង្ក ឱ្យមានភាពមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្ម ផ្តាច់ជីវិតមិនរើសមុខ ទាំងទាហាន និងជនស៊ីវិលស្លូតត្រង់ បងប្អូនប្រជាពលរដ្ឋ ព្រោះនៅតំបន់ព្រំដែនត្រូវបង្ខំចិត្តភៀសខ្លួន ចាកចេញពីផ្ទះសម្បែង ដែលទុក្ខលំបាកទាំងអស់នេះ ធ្វើឱ្យយើងទាំងអស់គ្នា យល់យ៉ាងច្បាស់តម្លៃនៃសន្តិភាពថា មានតម្លៃធំធេងមិនអាចកាត់ថ្លៃបាន ហេតុដូច្នោះ ហើយបានជាប្រមុខរាជរដ្ឋាភិបាលកម្ពុជា ប្រឹងប្រែងគ្រប់បែបយ៉ាងក្នុងការបញ្ចប់សង្គ្រាម ដើម្បីការពារអាយុជីវិតរបស់បងប្អូនវីរយុទ្ធជន និងទុក្ខលំបាករបស់បងប្អូនប្រជាពលរដ្ឋ៕