(ពោធិ៍សាត់)៖ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចកិត្តិសង្គហបណ្ឌិត ម៉ែន សំអន ឧត្តមក្រុមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា, លោក ម៉ក់ រ៉ា ប្រធានក្រុមប្រឹក្សាខេត្ត និងលោក ខូយ រីដា អភិបាលខេត្តពោធិ៍សាត់ នាថ្ងៃទី៣១ ខែកក្កដា ឆ្នាំ២០២៥ បានអញ្ជើញក្នុងពិធីបួងសួងរំលឹកគុណដល់បារមី លោកឧកញ៉ា ឃ្លាំង មឿង និងជំទាវ ខាន់ ខៀវ ព្រមទាំងដួងវិញ្ញាណបុព្វបុរស នារី គ្រប់ជំនាន់ ក្នុងការការពារជាតិ មាតុភូមិកម្ពុជា ពីសត្រូវឈ្លានពាន។

ពិធីនេះត្រូវបានធ្វើឡើង នៅទីតាំងបូជនីយដ្ឋានលោកឧកញ៉ា ដែលស្ថិតក្នុងភូមិកំពែងស្វាយ ឃុំស្នាមព្រះ ស្រុកបាកាន ខេត្តពោធិ៍សាត់ ដោយបានការនិមន្ត និងអញ្ជើញចូលរួមពី ព្រះព្រហ្មរក្ខិត សឿន ញាន ព្រះរាជាគណៈថ្នាក់កិត្តិយស ទីប្រឹក្សាផ្ទាល់សម្តេចព្រះឧត្តមមុនី ជា សំអាង ព្រះមេគណខេត្តកណ្តាល និងជាលេខាធិការ សាលាអនុគណៈស្រុកមុខកំពូល ជាព្រះចៅអធិការវត្តឧត្តមគិរីបព្វតាសិលាគង្គា ព្រះមន្ត្រីសង្ឃ ថ្នាក់ដឹកនាំមន្ទីរអង្គភាពនានាជុំវិញខេត្ត មន្ត្រីរាជការ ប្រជាពលរដ្ឋ និងពុទ្ធបរិស័ទយ៉ាងច្រើនកុះករ។

ពិធីឧទ្ទិឹសបួងសួងនេះ រួមមានកម្មវិធី៖ បទនមស្សកាព្រះរតនត្រ័យ និមន្តព្រះសង្ឃ១៥អង្គ ស្វាធ្យាយជយន្តោ ចំរើនព្រះបរិត្ត សូត្រពុទ្ធមន្ត ពុទ្ធជ័យ ប្រគេនទេយ្យទាន, រៀបចំខ្សែសីមា ដោតទង់ជាតិ៤ទិស លើចាន/ជើងពាន មានព្រះម៉ែធរណី និមន្តព្រះសង្ឃគង់ក្នុងរង្វង់ខ្សែសីមា សូត្រព្រះធម៌បញ្ច្រាស់បំភាន់៧ចប់, កងកម្លាំងប្រដាប់អាវុធឱ្យងើបឈរវន្ទាអាវុធ, កាត់ខ្សែសីមាកងទ័ពទម្លាក់ដៃចុះត្រឡប់ក្រោយ ភ្លេងហនុមានសំដែងរិទ្ធិ ទូងស្គរធំខ្លាំងៗ អនុមោទនាបុណ្យថ្វាយដល់បារមីគ្រប់អង្គ, ស្នងរូបលោកតា នាំទ័ពកម្លាំងទេពផ្លូវងងឹត ជួយកម្ចាត់ខ្មាំងសៀមឈ្លានពាន, សមាធិបញ្ជូនកុសល និងរៀបចំដង្វាយបង្អែម ចង្អាប ដូងភ្លើង៧ផ្លែ ទឹកតែ ថ្វាយលោកតា និងសែនកងទ័ពផ្លូវងងឹត។

លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្តេចកិត្តិសង្គហបណ្ឌិត ម៉ែន សំអន ឧត្តមក្រុមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា បានថ្លែងថា ផលវិបាកនៃសង្គ្រាម បានបង្កមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្ម ផ្តាច់ជីវិតមនុស្សមិនរើសមុខ ទាំងទាហាន និងជនស៊ីវិលស្លូតត្រង់។ ប្រជាពលរដ្ឋត្រូវបង្ខំចិត្តភៀសខ្លួន ចាកចេញពីផ្ទះសម្បែង ទ្រព្យសម្បត្តិ សត្វចិញ្ចឹម ដែលមិនអាចយកមកជាមួយបាន។ ទុក្ខលំបាកនេះ ធ្វើឱ្យយើងទាំងអស់គ្នាយល់យ៉ាងច្បាស់តម្លៃនៃសន្តិភាព។

លោកស្រីបន្តថា ក្រោមការគិតគូរ និងយកចិត្តទុកដាក់ខ្ពស់ របស់ប្រមុខរាជរដ្ឋាភិបាល សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា សម្តេចបានណែនាំឱ្យអាជ្ញាធរមានសមត្ថកិច្ច យកចិត្តទុកដាក់ចំពោះប្រជាពលរដ្ឋ ជាជនភៀសសឹក ដែលបានជម្លៀសខ្លួន ចេញពីតំបន់ប្រយុទ្ធគ្នា ក្នុងនោះមានគណៈកម្មការជាតិគ្រប់គ្រងគ្រោះមហន្តរាយ បានសហការជាមួយក្រសួងស្ថាប័នពាក់ព័ន្ធ រដ្ឋបាលខេត្តពាក់ព័ន្ធ រៀបចំកន្លែងសុវត្ថិភាព ក៏ដូចជាដោះស្រាយទីតាំងស្នាក់នៅ ការហូបចុក និងសុខាភិបាល ជូនប្រជាពលរដ្ឋយើងផងដែរ។

លោកស្រី ជូ ប៊ុនអេង សូមថ្លែងអំណរគុណ និងគោរពដឹងគុណ ដល់វីរកងទ័ពជួរមុខកម្ពុជា ក្នុងការការពារបូរណភាពទឹកដី តាមខ្សែរបន្ទាត់ព្រំដែន ប្រកបដោយភាពអង់អាចក្លាហាន និងឈរជើងយ៉ាងរឹងមាំ ប្រឆាំងនឹងសត្រូវឈ្លានពាន។ លោកស្រីសូមផ្តល់ការលើកទឹកចិត្ត ជំនឿជាក់ និងការគាំទ្រយ៉ាងពេញទំហឹង រវាងសមរភូមិក្រោយ ដល់វីរកងទ័ពដ៏អង់អាចរបស់យើង នៅសមរភូមិមុខ គ្រប់ពេលវេលា។

លោកស្រី សូមថ្កោលទោសយ៉ាងដាច់អហង្ការចំពោះការឈ្លានពាន របស់កងកម្លាំងប្រដាប់អាវុធថៃ មកលើទឹកដីកម្ពុជា ពិសេសការប្រើប្រាស់អាវុធធន់ធ្ងន់ និងគ្រាប់បែកចង្កោម ដែលត្រូវបានហាមឃាត់ ដោយអនុសញ្ញាអន្តរជាតិ ព្រមទាំងបានវាយប្រហារ លើទីអារាមសាសនា ទីសក្ការបូជា និងទីតាំងស៊ីវិល ដែលជាទង្វើផ្ទុយពីច្បាប់អន្តរជាតិ និងគោលការណ៍មនុស្សធម៌។

សូមជម្រាបថា តាមការបញ្ជាក់របស់លោកស្រី ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានឱ្យដឹងថាការផ្ទុះអាវុធរវាង កម្ពុជា-ថៃ បានកើតឡើង នាព្រឹកថ្ងៃទី២៤ ខែកក្កដា ឆ្នាំ២០២៥កន្លងទៅ នៅចំណុចប្រាសាទតាមាន់ធំ ខេត្តឧត្តរមានជ័យ និងបានរាលដាលទៅកាន់តំបន់សមរភូមិផ្សេងទៀត នៅតាមបណ្តោយព្រំដែន កម្ពុជា-ថៃ ក្នុងភូមិសាស្រ្តខេត្តឧត្តមានជ័យ ខេត្តព្រះវិហារ និងខេត្តពោធិ៍សាត់។ ការប្រយុទ្ធគ្នានេះ បានកើតឡើងបន្ទាប់ពីទាហានថៃ បានផ្ទុះអាវុធមុន នៅចំណុចប្រាសាទតាមាន់ធំ។ ដោយសារការខិតខំប្រឹងប្រែង របស់សម្តេចប្រមុខនៃរាជរដ្ឋាភិបាលកម្ពុជា ទើបកិច្ចចចារសម្របសម្រួលឱ្យមានបទឈប់បាញ់ រវាងកម្ពុជា-ថៃ បានចាប់ផ្តើមពីអាធ្យាតថ្ងៃទី២៨ ឆ្លងចូលថ្ងៃទី២៩ ខែកក្កដា ឆ្នាំ២០២៥តទៅ។

បើតាមឯកសារប្រវត្តិសាស្រ្ត នៅក្នុងសៀវភៅមហាវីរៈបុរសខ្មែរ លោកឧកញ៉ា ឃ្លាំង មឿង និងជំទាវ ខាន់ ខៀវ ចាត់ទុកជាវីរជនស្នេហាជាតិខ្លាំងពូកែ ក្នុងការធ្វើសឹកសង្គ្រាម ជាមួយទ័ពសៀម ការពារទឹកដីប្រទេសកម្ពុជា។ រូបរាងកាយលោកឧកញ៉ា និងជំទាវ បានលាចាកលោកទៅក៏ពិតមែន ប៉ុន្តែភាពល្បីល្បាញ និងភាពស័ក្តិសិទ្ធិ បានដក់ជាប់នៅក្នុងអារម្មណ៍របស់ប្រជាពលរដ្ឋទូទាំងខេត្ត ក៏ដូចជាទូទាំងប្រទេស និងបាននាំគ្នាមកគោរពបូជា ជារៀងរាល់ឆ្នាំ មិនដែលអាក់ខានឡើយ។

ឋិតក្នុងកាលៈទេសៈ ដែលប្រទេសជាតិទទួលការរំលោភបំពានពីសត្រូវឈ្លានពានសៀម ក្នុងពេលថ្មីៗនេះ ថ្នាក់ដឹកនាំគ្រប់លំដាប់ថ្នាក់ និងប្រជាពលរដ្ឋ បានធ្វើពិធីបួងសួង សុំឱ្យបារមីលោកឧកញ៉ា ឃ្លាំ មឿង និងជំទាវ ខាន់ ខៀវ តាមជួយថែរក្សាសម្តេចតេជោ ហ៊ុន សែន ប្រធានព្រឹទ្ធសភា និងសម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ព្រមទាំងថ្នាក់ដឹកនាំផ្សេងៗទៀត ជាពិសេសគឺតាមជួយប្រោសព្រំឃុំគ្រង ការពារវីរកងទ័ពនៅសមរភូមិមុខ ដែលកំពុងឈរជើងយ៉ាងស្វាហាប់ការពារបូរណភាព និងអធិបតេយ្យភាពកម្ពុជា សូមបានសេចក្តីសុខមានជ័យជំនះ និងជួយរុញច្រានបណ្តេញពួកចោរសៀមឈ្លានពាន ឱ្យរលាយសាបសូន្យពីទឹកដីកម្ពុជា៕