ក្រុមហ៊ុន «GANZBERG» ចូលរួមរំលែកទុក្ខដល់គ្រួសារកងទ័ពពលីជីវិតក្នុងសមរភូមិប្រយុទ្ធ ដោយបានផ្ដល់ជូនម្នាក់ៗ នូវផ្ទះ១ខ្នង និងថវិកា ១០លានរៀល
31-07-2025 18:04
(ភ្នំពេញ)៖ ក្រុមហ៊ុន GANZBERG នៅថ្ងៃទី៣១ ខែកក្កដា ឆ្នាំ២០២៥ បានចូលរួមរំលែកទុក្ខដល់គ្រួសារកងទ័ព ដែលបានពលីជីវិតក្នុងសមរភូមិប្រយុទ្ធ ជាមួយសត្រូវឈ្លានពានកម្ពុជា នឹងបានផ្ដល់ជូនដល់ គ្រួសាររកងទ័ពដែលបានពលីក្នុងសមរភូមិប្រយុទ្ធចំនួនពីររូប ដោយគ្រួសារម្នាក់ៗទទួលបានផ្ទះ១ខ្នង និងថវិកា ១០លានរៀល។
កងទ័ពដែលបានពលីក្នុងសមរភូមិប្រយុទ្ធចំនួនពីររូបនោះ គឺគ្រួសារទី១ វីរៈកងទ័ពពលី ឈ្មោះ សុទ ប៊ុនធឿន ភូមិស្រែកណ្តោល ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ និងគ្រួសារទី២ វីរៈកងទ័ពពលី ឈ្មោះ ប៊ី សុខគា នៅភូមិភ្នំដែក ឃុំរមណីយ ស្រុករវៀង ខេត្តព្រះវិហារ។
ក្នុងវេលាដ៏ក្រៀមក្រំនេះ ក្រុមហ៊ុន GANZBERG សូមសម្តែងនូវសមានទុក្ខដ៏ធំធេង និងសោកស្តាយស្រណោះអាឡោះអាល័យជាទីបំផុត ចំពោះមរណភាព នឹង សូមបូងសួងឧទ្ទិសដល់គុណបុណ្យព្រះរតនត្រ័យ ជួយដល់ដួងវិញ្ញាណក្ខន្ធវីរកងទ័ពពលីទាំងពីររូប សូមឆាប់បានយោនយោគកំណើត ចាប់បដិសន្ធិក្នុងសុគតិភព កុំបីឃ្លៀងឃ្លាតឡើយ៕
