(កោះកុង)៖ លោក ផូ ផារិទ្ធ រដ្ឋលេខាធិការតំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅថ្ងៃទី៣១ ខែកក្កដា ឆ្នាំ២០២៥នេះ បានដឹកនាំក្រុមការងារចុះត្រួតពិនិត្យ និងវាយតម្លៃលទ្ធផលការងារស្ថាបនាផ្លូវក្រាលដីល្បាយក្រួសចំនួន ១ខ្សែ មាន ២កំណាត់ ប្រវែងសរុប ២ ២០០ម៉ែត្រ ទទឹង ៨ម៉ែត្រ រួមជាមួយសំណង់សិល្បការ្យផ្សេងៗ ស្ថិតនៅក្រុងខេមរភូមិន្ទ ខេត្តកោះកុង។

បើតាមលោកវរសេនីយ៍ឯក ខេង សាវុធ នាយការិយាល័យស្ពាន-ថ្នល់ តំណាងលោកឧត្តមសេនីយ៍ឯក សឿន រឿត នាយកនាយកដ្ឋានវិស្វកម្ម ក្រសួងការពារជាតិ បានឱ្យដឹងថា គណៈកម្មការអន្តរក្រសួងបានស្ថាបនាផ្លូវក្រាល ដីល្បាយក្រួសចំនួន ១ ខ្សែ មាន២កំណាត់ គិតមកដល់ថ្ងៃនេះ ចំពោះការងារស្ថាបនាសម្រេចបានក្នុងរង្វង់ ៦៥ភាគរយ បច្ចុប្បន្នបាន និងកំពុងសម្រុកនៅលើការងារស្ថាបនា ដើម្បីសម្រួលដល់ការធ្វើដំណើររបស់ប្រជាពលរដ្ឋ។

នាឱកាសនោះដែរលោក ផូ ផារិទ្ធ បានឱ្យដឹងថា ជុំវិញការងារអភិវឌ្ឍន៍នៅតាមជនបទ រាជរដ្ឋាភិបាលក្នុងអាណត្តិទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បាននិងកំពុងបន្តកែលម្អលក្ខខណ្ឌនៃ ការរស់នៅរបស់សហគមន៍ជនបទ ក្នុងគោលដៅជំរុញលើកកម្ពស់ និងធ្វើឱ្យប្រសើរឡើងសម្រាប់ជីវភាពរបស់ប្រជាជន តាមរយៈការស្តារ និងការស្ថាបនាហេដ្ឋារចនាសម្ព័ន្ធគមនាគមន៍ដឹកជញ្ជូននៅតាមជនបទ។

នាឱកាសនោះលោករដ្ឋលេខាធិការ ក៏បានកើតសរសើរដល់នាយកដ្ឋានវិស្វកម្ម ក្រសួងការពារជាតិ ដែលបានខិតខំប្រែងនៅក្នុងការងារស្ថាបនាផ្លូវ, ព្រោះផ្លូវមានសារៈសំខាន់ណាស់ មិនថាផ្លូវមួយខ្សែនេះ ឬបណ្តាញផ្លូវផ្សេងៗទៀតនោះឡើយ ជាក់ស្តែងជុំវិញផ្លូវជនបទនេះក្រសួងអភិវឌ្ឍន៍ជនបទ ដែលជាសេនាធិការរបស់រាជរដ្ឋាភិបាល បាននិងកំពុងចូលរួមយ៉ាងសកម្មតាមរយៈការស្តារ ការស្ថាបនា និងថែទាំផ្លូវនៅតាមជនបទ ដើម្បីលើកកម្ពស់ដល់ជីវភាពរស់នៅរបស់ប្រជាជន មានផ្លូវល្អ ជួយ សម្រួលដល់ការធ្វើដំណើរ និងការរកស៊ីទទួលទានផ្សេងៗ។

តាមរយៈការស្ថាបនាផ្លូវខាងលើនេះ លោករដ្ឋលេខាធិការ ផូ ផារិទ្ធ បានស្នើដល់នាយកដ្ឋានវិស្វកម្ម ជំរុញការស្ថាបនាផ្លូវ១ខ្សែនេះ ឱ្យបានចប់សព្វគ្រប់ទៅតាមផែនការ ឬបញ្ចប់មុនផែនការ ដើម្បីបម្រើដល់ការធ្វើ ដំណើររបស់ប្រជាពលរដ្ឋ និងឆ្លើយតបទៅនិងការរីកចម្រើននៃទីក្រុងក្រុងខេមរភូមិន្ទ ដែលកំពុងមានការរីកលូតលាស់៕