(សៀមរាប)៖ លោក ចៅ ម៉ៅមុន្នី ប្រធានសាខាពន្ធដារខេត្តសៀមរាប តំណាងលោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី ប្រតិភូរាជរដ្ឋាភិបាល ទទួលបន្ទុកការអគ្គនាយកនៃអគ្គនាយកដ្ឋានពន្ធដារ នាថ្ងៃទី៣០ ខែកក្កដា ឆ្នាំ២០២៥ បានដឹកមន្ត្រីរាជការនៃសាខាពន្ធដារខេត្តសៀមរាប នាំយកអំណោយជាគ្រឿងឧបភោគបរិភោគ និងសម្ភារប្រើប្រាស់មួយចំនួនធំ ប្រគល់ជូនរដ្ឋបាលខេត្តសៀមរាប ទុកសម្រាប់ចែកជូនប្រជាពលរដ្ឋភៀសសឹក ដែលកំពុងស្នាក់នៅវត្តក្រឡាញ់ ស្ថិតនៅស្រុកក្រឡាញ់ ខេត្តសៀមរាប។

ពិធិប្រគល់នេះក៏មានការអញ្ជើញទទួលដោយលោកស្រី ម៉ននី រង្សី អភិបាលរងខេត្ត តំណាងលោក ប្រាក់ សោភ័ណ អភិបាលខេត្តសៀមរាប និងមានការចូលរួមពីលោក ខូយ ឈីន សមាជិកក្រុមប្រឹក្សាខេត្ត និងលោក ឃុត សំអាត ប្រធានក្រុមប្រឹក្សាស្រុកក្រឡាញ់ និងអ្នកពាក់ព័ន្ធជាច្រើនរូបទៀត។

សូមបញ្ជាក់ថា អំណោយរួមមាន៖ អង្ករ ទឹកសុទ្ធ មី ទឹកស៊ីអ៊ីវ ទឹកត្រី សម្ភារប្រើប្រាស់ និងគ្រឿងឧបភោគបរិភោគមួយចំនួនទៀត។ ក្នុងឱកាសនោះដែរ លោកស្រី ម៉ននី រង្សី ក៏បានជួបសំណោះសំណាល សាកសួរសុខទុក្ខជាបងប្អូនភៀសសឹង និងបានផ្តាំផ្ញើអំពីការថែទាំង សុខភាព អនាម័យ ព្រមទាំងផ្តល់ការជឿទុកចិត្តលើការដឹកនាំរបស់រាជរដ្ឋាភិបាល។

សូមបញ្ជាក់ដែរថា​ គិតត្រឹមល្ងាចថ្ងៃទី៣០ ខែកក្កដា ឆ្នាំ២០២៥ ជនភៀសសឹកដោយសារសង្គ្រាមកម្ពុជា-ថៃ នៅខេត្តឧត្តរមានជ័យសរុបចំនួន ៣៩ ៥៤៦នាក់, ខេត្តព្រះវិហារសរុប ៣២ ៥៥៨នាក់, បន្ទាយមានជ័យសរុបចំនួន ៣៥ ០៥៧នាក់, ខេត្តពោធិ៍សាត់សរុបចំនួន ៣ ០២៦នាក់, ខេត្តសៀមរាបសរុបចំនួន ៦១ ៩០៧នាក់ ដែលសរុបទាំង៥ខេត្តនេះ កើនឡើងដល់ ១៧ ២០៩៤នាក់៕