(ភ្នំពេញ)៖ គិតត្រឹមម៉ោង៦ល្ងាច ថ្ងៃទី៣១ ខែកក្កដា ឆ្នាំ២០២៥ រដ្ឋបាលរាជធានីភ្នំពេញ បានបន្តទទួលអំណោយពីសប្បុរសជននានា និងប្រជាពលរដ្ឋ មន្ត្រីរាជការ ក្នុងរាជធានីបានចំនួនជាង ១ពាន់លានរៀល និងប្រាក់ដុល្លារជាង ៣៥ម៉ឺនដុល្លារ ដើម្បីបន្តយកទៅចែកជូនដល់វីរកងទ័ពជួរមុខ និងពលរដ្ឋកំពុង ជម្លៀសខ្លួន ដោយជម្លោះប្រដាប់អាវុធ បង្កឡើងដោយទាហានថៃ ឈ្លានពានមកលើដែនអធិបតេយ្យភាពកម្ពុជា។

នេះបើតាមការបញ្ជាក់ឱ្យដឹង នៅក្នុងពិធីប្រគល់-ទទួល អំណោយសប្បុរសធម៍ នៅថ្ងៃទី៣១ ខែកក្កដា ឆ្នាំ២០២៥នេះ ធ្វើឡើងក្រោមវត្តមានលោក ឃួង ស្រេង អភិបាលរាជធានីភ្នំពេញ និងលោក លោកស្រី ជាអភិបាលរងរាជធានីភ្នំពេញ ជាច្រើនរូប ព្រមទាំង លោកនាយក លោកនាយករង លោកស្រីនាយិការង រដ្ឋបាល រាជធានីភ្នំពេញ នៅសាលារាជធានីភ្នំពេញ ។

បើតាមលោកស្រី ដោ សម្ផស្ស នាយិការរងរដ្ឋបាលរាជធានីភ្នំពេញ និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា គិតត្រឹមម៉ោង ១៨និង០០នាទី ថ្ងៃទី៣១ ខែកក្កដា ឆ្នាំ២០២៥ អំណោយដែលរដ្ឋបាលរាជធានីភ្នំពេញបានពីសប្បុរសជននានា និងប្រជាពលរដ្ឋ មន្ត្រីរាជការក្នុងរាជធានី បានកើនឡើងដល់ចំនួន ១.១៤១.៨២៥.៩១២រៀល និង ៣៥១.៣៩២,០០ដុល្លារអាមេរិក ព្រមទាំងសម្ភារគ្រឿង ឧបភោគបរិភោគ ថ្នាំពេទ្យ សម្ភារផ្សេងៗជាច្រើនមុខទៀត។

ក្នុងនោះលោកស្រី ដោ សម្ផស្ស បានគោរពថ្លែងអំណរគុណ នូវទឹកចិត្តសប្បុរសធម៌របស់ប្រជាពលរដ្ឋ ក្នុងស្មារតីខ្មែរ ជួយជាតិខ្មែរ ខណៈដែលលោកស្រី អ្នកនាំពាក្យសាលា រាជធានីភ្នំពេញ ចាត់ទុកសកម្មភាពនេះ ជាការបង្ហាញឱ្យឃើញ ពីស្មារតីស្នេហាជាតិជាធ្លុងមួយ របស់បងប្អូនប្រជាពលរដ្ឋកម្ពុជា ទាំងអស់ នៅសមូរភូមិក្រោយ គាំទ្រនិងលើកទឹកចិត្ត ដល់វីរៈកងទ័ពជួរមុខ ដែលបាននឹងកំពុងខិតខំតស៊ូការពារបន្ទាត់ ព្រំដែនកម្ពុជា-ថៃ ប្រកបដោយភាពក្លាហាន មុះមុត ប្រឆាំងនឹងសត្រូវឈ្លានពាន ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនិងបន្តមក សម្តេចបវរមហាធិបតី ហ៊ុន ម៉ាណែត ជានាយកដ្ឋមន្ត្រី នាពេល បច្ចុប្បន្ន។

លោកស្រី ដោ សម្ផស្ស បានឱ្យដឹងទៀតថា សម្រាប់ខឿន ការពារជាតិប្រជាជន បងប្អូនប្រជាពលរដ្ឋបានចូលរួមយ៉ាងសស្រាក់សស្រាំ ជាមួយសាលារាជធានីភ្នំពេញ ដើម្បីជាកិច្ចឆ្លើយតប ជាមួយនឹងការលះបង់សាច់ស្រស់ ឈាមស្រស់របស់វីរៈកងទ័ពជួរមុខ ក្នុងកិច្ចការពារបូរណភាពទឹកដីកម្ពុជា ពីចោរឈ្លានពានថៃ ជាមួយនឹងការចូលរួមរំលែក ការលំបាករបស់ប្រជាពលរដ្ឋ ដែលជាជនភៀសសឹក ដែលកំពុងតែជ្រកកោន នៅតាមទីតាំងសុវត្ថិភាពនានា។ ទាំងអស់នេះគឺជាទឹកចិត្តរបស់បងប្អូនប្រជាពលរដ្ឋខ្មែរ ក្នុងស្មារតីសមមរភូមិ ក្រោយ ជួយសមរភូមិមុខ, ស្មារតីខ្មែរជួយខ្មែរ។ បងប្អូនសប្បុរសជននានា និងប្រជាពលរដ្ឋ មន្ត្រីរាជការក្នុងរាជធានី អាចបន្តចូលរួមបរិច្ចាគជាបន្តបន្ទាប់ទៀត បានដោយរដ្ឋបាល រាជធានីភ្នំពេញ បានចាត់តាំងក្រុមការងារចាំទទួលសំភារៈ និងថវិកាតាមរយៈ QR Code។

ឆ្លៀតក្នុងឱកាសនេះ លោក ឃួង ស្រេង អភិបាលរាជធានីភ្នំពេញ បានថ្លែងអំណរគុណយ៉ាងជ្រាលជ្រៅបំផុត ចំពោះទឹកចិត្តសប្បុរសជននានា បងប្អូនប្រជាពលរដ្ឋ និងមន្ត្រីរាជការក្នុងរាជធានី ដែលបាននិងកំពុងផុសផុល មកចូលរួមឧបត្ថម្ភដល់វីរកងទ័ពជួរមុខ និងក្រុមគ្រួសារប្រជាពលរដ្ឋ ដែលកំពុងជម្លៀសចេញ មកទីកន្លែងសុវត្ថិភាព ដែលនេះពិតជាបានបង្ហាញពីសាមគ្គីភាពជាធ្លុងមួយខ្មែរស្រលាញ់ខ្មែរ៕