(ត្បូងឃ្មុំ)៖ តំណាងអន្តរក្រសួង រួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ នាថ្ងៃទី៣១ ខែកក្កដា ឆ្នាំ២០២៥នេះ បានចុះពិនិត្យគម្រោងស្ដារឡើងវិញ ផ្លូវក្រាលកៅស៊ូពីរជាន់ DBST ដែលមានប្រវែង ៤,០០០ម៉ែត្រ តភ្ជាប់ពីឃុំទួលសូភី ទៅឃុំគងជ័យ ក្នុងស្រុកអូររាំងឪ ខេត្តត្បូងឃ្មុំ។

គម្រោងនេះ ចាប់ផ្តើមស្ថាបនានិងស្តារ កាលពីថ្ងៃទី២៣ ខែកុម្ភៈ ឆ្នាំ២០២៥ ហើយគិតមកដល់ថ្ងៃទី៣១ ខែកក្កដា ឆ្នាំ២០២៥នេះ សម្រេចបាន ៨០ ភាគរយហើយ តាមគម្រោងនឹងបញ្ចប់នាខែតុលា ឆ្នាំ២០២៥ខាងមុខនេះ។

ចំពោះគម្រោងមួយនេះ អនុវត្តដោយបញ្ជាការដ្ឋានវិស្វកម្ម កងទ័ពជើងគោក ប្រើប្រាស់ថវិកាជំពូក ២១ តាមរយៈក្រសួងអភិវឌ្ឍន៍ជនបទ និងមានមន្ទីរអភិវឌ្ឍន៍ជនបទខេត្តត្បូងឃ្មុំ ជាសេនាធិការ។

ក្នុងឱកាសចុះពិនិត្យនោះដឹកនាំដោយ លោកស្រី ឯក គន្ធវារី អនុរដ្ឋលេខាធិការ តំណាងលោក ឆាយ រិទ្ធីសែន រដ្ឋមន្ត្រីក្រសួងអភិវឌ្ឍន៍ជនបទ។ ក្នុងនោះមានការចូលរួមពីសំណាក់ លោកឧត្តមសេនីយ៍ត្រី ទិត្យ សុជាតិ មេបញ្ជាការរង នាយសេនាធិការ នៃបញ្ជាការដ្ឋានវិស្វកម្ម តំណាងលោកឧត្តមសេនីយ៍ឯក អ៊ុច វ៉ាន់ថា មេបញ្ជារងកងទ័ពជើងគោក និងជាមេបញ្ជាការបញ្ជាការដ្ឋានវិស្វកម្ម ព្រមទាំងមន្រ្តីគ្រប់គ្រងគម្រោង មន្រ្តីបច្ចកទេស និងមន្ត្រីជំនាញពាក់ព័ន្ធ។

បន្ទាប់ពីបានចុះពិនិត្យផ្ទាល់ ត្រង់ចំណុចទីកន្លែងសំខាន់ៗរួចមក មានប្រសាសន៍នាឱកាសនោះ លោកស្រី ឯក គន្ធវារី អនុរដ្ឋលេខាធិការក្រសួងអភិវឌ្ឍជនបទ បានលើកឡើងថា ក្រសួងអភិវឌ្ឍន៍ជនបទ និងក្រសួងសេដ្ឋកិច្ច ក្នុងនាមជាសេនាធិការផ្ទាល់ ឲ្យរាជរដ្ឋាភិបាលកម្ពុជា បាននឹងកំពុងជំរុញការងារសាងសង់ ការងារស្ដារឡើងវិញ ដើម្បីកែលម្អ ពង្រីក ថែទាំ និងជួសជុលផ្លូវតាមមូលដ្ឋាន ប្រែក្លាយ ឱ្យគ្រប់ភូមិតាមទីជនបទទាំងអស់មានផ្លូវតភ្ជាប់ និងជាតំបន់ជនបទសមាហរណកម្ម ជាពិសេសតំបន់ដែលមានសក្តានុពលសេដ្ឋកិច្ច សម្រាប់ជីវភាពរស់នៅរបស់ប្រជាពលរដ្ឋ ក៏ដូចជាការចូលរួមចំណែកដល់កំណើនសេដ្ឋកិច្ចជាតិផងដែរ។

លោកស្រី ឯក គន្ធវារី ក៏បានវាយតម្លៃខ្ពស់ និងបានកោតសរសើរ ដល់កងកម្លាំង នៃបញ្ជាការដ្ឋានវិស្វកម្ម កងទ័ពជើងគោក និងអ្នកពាក់ព័ន្ធ ដែលបានយកចិត្តទុកដាក់ខ្ពស់ អនុវត្តសម្រេចតាមផែនការ ក្នុងទំហំ ៨០ភាគរយ ដោយរក្សានូវគុណភាពផ្លូវល្អប្រសើរ ក្នុងកិច្ចការងារស្តារកំណាត់ផ្លូវក្រាលកៅស៊ូពីរជាន់ DBST មានប្រវែង ៤,០០០ម៉ែត្រ តភ្ជាប់ពីឃុំទួលសូភី ទៅឃុំគងជ័យ ក្នុងស្រុកអូររាំងឪ ។

លោកស្រី បញ្ជាក់បន្ថែមថា នេះជាផ្នែកមួយដ៏សំខាន់ ក្នុងការចូលរួមជាមួយរាជរដ្ឋាភិបាល លើការស្ថាបនាផ្លូវនៅជនបទ និងបានរួមចំណែកយ៉ាងសំខាន់ ក្នុងការលើកកម្ពស់ជីវភាពរស់នៅ របស់ប្រជាពលរដ្ឋនៅតាមមូលដ្ឋាន មានផ្លូវល្អសម្រាប់ធ្វើដំណើរ និងផ្តល់ភាពងាយស្រួលដល់ការដឹកជញ្ជូនផ្សេងៗ៕