(តាកែវ)៖ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ នារសៀលថ្ងៃទី៣១ ខែកក្កដា ឆ្នាំ២០២៥នេះ បានអញ្ជើញជួបសំណេះសំណាលជាមួយពលករ ដែលវិលត្រឡប់មកពីប្រទេសថៃ ចំនួន ៣៦០នាក់ ក្នុងស្រុកព្រៃកប្បាស ខេត្តតាកែវ ដោយមានការចូលរួមពីលោក លោកស្រី ជាប្រធាន អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រៃកប្បាស ព្រមទាំងអាជ្ញាធរពាក់ព័ន្ធគ្រប់លំដាប់ថ្នាក់ នៅសាលាស្រុកព្រៃកប្បាស ខេត្តតាកែវ។

ថ្លែងក្នុងពិធីសំណេះសំណាលនេះលោករដ្ឋមន្ដ្រី ជា វ៉ាន់ដេត បានជម្រាបជូនបងប្អូនពលករអំពីបច្ចុប្បន្នភាពពាក់ព័ន្ធនឹងការឈ្លានពានរបស់ថៃមកលើប្រទេសកម្ពុជា ដែលបានកើតឡើងចាប់តាំងពីថ្ងៃទី២៨ ខែឧសភា ឆ្នាំ២០២៥ គឺយោធាថៃបានចូលមកបាញ់សម្លាប់វីរៈកងទ័ព នៅក្នុងលេណដ្ឋានក្នុងភូមិសាស្រ្តតំបន់មុំបី។ គិតចាប់តាំងពីថ្ងៃទី២៤ ខែកក្កដា ឆ្នាំ២០២៥ រហូតដល់បទឈប់បាញ់នៅម៉ោង ០០ ថ្ងៃទី២៩ ខែកក្កដា ឆ្នាំ២០២៥ យោធាថៃបានផ្លោងគ្រាប់ ទម្លាក់គ្រាប់បែក និងប្រើប្រាស់អាវុធធន់ធ្ងន់ និងប្រើប្រាស់ផ្សែងពុល មកលើទីតាំងយោធា និងប្រជាជនកម្ពុជា ដែលបានបំផ្លិចបំផ្លាញហេដ្ឋារចនាសម្ព័ន្ធ សាលារៀន មន្ទីរពេទ្យ និងផ្ទះសម្បែង អស់ជាច្រើនកន្លែង ហើយការណ៍នេះធ្វើឱ្យប្រជាជនយើងដែលរស់នៅតាមបណ្តោយព្រំដែនត្រូវបង្ខំចិត្តជម្លៀសចេញពីលំនៅដ្ឋានប្រមាណ៣សែននាក់។

ថ្មីៗនេះនៅព្រឹកថ្ងៃទី២៩ ខែកក្កដា ឆ្នាំ២០២៥ យោធាថៃ បានប្រព្រឹត្តអំពើដ៏ស្មោគគ្រោកដោយបន្លំចាប់ដៃជាមួយវីរៈកងទ័ព ដែលឈរជើងនៅតំបន់ជាំតែ រួចភ្ជង់ចាប់វីរៈកងទ័ពយើងចំនួន ២០នាក់ (រត់រួច ១នាក់)។ គិតត្រឹមថ្ងៃនេះ យោធាថៃមិនទាន់បានដោះលែងវីរៈកងទ័ពយើងនៅឡើយទេក្រោយមានសម្ពាធពីអន្តរជាតិ។

ជាមួយគ្នានេះដែរលោករដ្ឋមន្រ្តី ក៏បានបានពាំនាំនូវទឹកចិត្តស្រលាញ់ដ៏ស្មោះស្ម័គ្ររបស់សម្តេចតេជោ និងសម្តេចធិបតីចំពោះបងប្អូនពលករដែលធ្វើការនៅប្រទេសថៃ នឹងហេតុដែលសម្តេចទាំងទ្វេរអំពាវនាវឱ្យបងប្អូនយើងត្រឡប់មកកម្ពុជាវិញ ក្នុងគោលដៅការពារសុវត្ថិភាពពីក្រុមជ្រុលនិយមនៅក្នុងប្រទេសថៃ។ បន្ថែមលើនេះលោករដ្ឋមន្រ្តីក៏ បានអំពាវនាវដល់បងប្អូនពលករស្វែងរកការងារនៅក្នុងប្រទេសយើងវិញព្រោះថា បច្ចុប្បន្នកម្ពុជាមានតម្រូវការបុគ្គលិកធ្វើការជាច្រើន ជាជាងការប្រថុយប្រថានទៅបំពេញការងារនៅប្រទេស។

ឆ្លៀតក្នុងឱកាសនេះដែរលោករដ្ឋមន្រ្តី បានជម្រាបជូនអំពីការប្តេជ្ញារបស់រាជរដ្ឋាភិបាលកម្ពុជា ក្នុងការយកតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅកាន់តុលាការយុត្តិធម៌អន្តរជាតិ (IJC) ដើម្បីដោះស្រាយតាមនីតិវិធីច្បាប់អន្តរជាតិ។ មុននឹងបញ្ចប់ ឯកឧត្តមរដ្ឋមន្រ្តីបានអំពាវនាវដល់បងប្អូនពលករយើងរួមគ្នាជាធ្លុងមួយជាមួយរាជរដ្ឋាភិបាល និងវីរៈកងទ័ព ក្នុងការការពារអធិបតេយ្យ និងបូរណភាពទឹកដី៕