(បារដំបង)៖ សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅរសៀល ថ្ងៃទី៣១ ខែកក្កដា ឆ្នាំ២០២៥នេះ បានចាត់ឱ្យលោក សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង នាំយកថវិកាចំនួន ៥លានរៀល និងភេសជ្ជ: ព្រមទាំងសម្ភារគ្រឿងឧបភោគ បរិភោគមួយចំនួន ប្រគល់ជូនលោកពលបាលទោ ខ្លឹង សឿប អត្តលេខ 2357 89 អាយុ ៥២ឆ្នាំ ជាកងទ័ពនៅអង្គភាពកងពលតូចអន្តរាគមន៍លេខ៥ កងពលធំអន្តរាគមន៍លេខ២ ដែលមានមានជីវភាពខ្វះខាត ថែមទាំងកំពុងកើតស្លាប់មួយចំហៀងខ្លួនបណ្តាលមកពីដាច់សសៃឈាមក្នុងខួក្បាលស្ថិតនៅភូមិរកា ឃុំរកា ស្រុកសង្កែ ខេត្តបាត់ដំបង។

នាឱកាសនោះលោក សុខ លូ ប្រធាន បាននាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងលើកទឹកចិត្ត ជូនពរដល់ពលបាលទោ ខ្លឹង សឿប ឆាប់បានជាសះស្បើយឡើងវិញ។

បើតាមបញ្ជាក់របស់មេបញ្ជាការកងពលតូចអន្តរាគមន៍លេខ៥ បានឱ្យដឹងថា នាថ្ងៃទី២១ ខែកក្កដា ឆ្នាំ២០២៥ លោកពលបាលទោ ខ្លឹង សឿប បានធ្លាក់ខ្លួនឈឺ រហូតដល់ថ្ងៃទី២៣ ខែកក្កដា ឆ្នាំ២០២៥ មេបញ្ជាការក៏បាននាំយកទៅសម្រាកព្យាបាលនៅពេទ្យនៅខេត្តឧត្តរមានជ័យ ដោយសារស្ថានភាពជំងឺ និងពុំមានអ្នកមើលថែ ដោយនាយទាហ៊ានមានភារៈកិច្ចការពាទឹកដីពីការឈ្លានពានរបស់ថៃ លោកមេញ្ជាការក៏បាន ទំនាក់ទំនង លោកស្រី ខ្លឹង សុទ្ធ អាយុ៥៦ឆ្នាំ ត្រូវជាបងស្រី មកមើលថែ និងបានសុំអនុញ្ញាតយកលោកពលបាលទោ ខ្លឹង សឿប មកមើលថែនិងព្យាបាលនៅគេហដ្ឋានស្ថិតនៅភូមិរកា ឃុំរកា ស្រុកសង្កែ ខេត្តបាត់ដំបង ។

ជាមួយគ្នានេះ លោកប្រធានគណៈកម្មាធិការសាខា ក៏បានមានប្រសាសន៍បន្ថែម ក្រោយពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានទទួលព័ត៌មានករណីខាងលើ សម្តេចប្រធានបានចាត់ក្រុមការងារសាខាកាកបាទក្រហមកម្ពុជា ខេត្តបាត់ដំបង ចុះពិនិត្យដល់ខ្នងផ្ទះដោយផ្ទាល់និងបានសម្របសម្រួលជាមួយអាជ្ញាធរភូមិឃុំ និងគ្រូពេទ្យដើម្បីបញ្ជូនពលបាលទោ ខ្លឹង សឿប មកធ្វើការព្យាបាលនៅមន្ទីរពេទ្យបង្អែកខេត្តបាត់ដំបង ក្រោមការយកចិត្តទុក្ខដាក់និងមើលថែពីក្រុមគ្រូពេទ្យ ។

លោកស្រី ខ្លឹង សុទ្ធ ត្រូវជាបង បានបង្ហាញក្តីរំភើបក្តុកក្តួលឥតឧបមាដោយទទួលបានការយកចិត្តទុកដាក់ ជាពិសេសការលើកទឹកចិត្តពីសំណាក់អ្នកម្តាយមនុស្សធម៌ ដែលលោកតែងតែគិតគូរដល់សុខទុក្ខ និងប្រជាជនងាយរងគ្រោះបំផុតគ្រប់ពេលវេលា និងគ្រប់ទីកន្លែង។ លោកស្រី សូមគោរពជូនពរសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងលោក សុខ លូ សូមជួបប្រទះតែនឹងសេចក្តីសុខ សុភមង្គល សុខភាពល្អរឹងមាំ ជន្មាយុយឺនយូរ ដើម្បីបន្តដឹកនាំប្រទេស និងជាម្លប់ដ៏ត្រជាក់ដល់ប្រជាជនកម្ពុជាជារៀងរហូតតទៅ។

សូមបញ្ជាក់ថា យោងតាមរបាយការណ៍របស់លោកវេជ្ជបណ្ឌិត ហាន ឧត្តម ប្រធានមន្ទីរពេទ្យបង្អែក និងជាសមាជិកគណៈកម្មាធិការសាខាបានឲ្យដឹងថា លោកពលបាលទោ ខ្លឹង សឿប ស្ថានភាពជំងឺក្រោយពីថត និងស្កេនឃើញមានដុំឈាមក្នុងខួក្បាលផ្នែកខាងឆ្វេង អាចបណ្តាលមកពីដាច់សសៃឈាមខួក្បាលទើបធ្វើឱ្យស្លាប់មួយចំហៀងខ្លួន និងត្រូវសម្រាក់ព្យាបាលនៅមន្ទីរពេទ្យបង្អែកខេត្ត រាល់កាចំណាយជាការរ៉ាបរងពីសំណាក់ លោក សុខ លូ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង៕