(ឧត្តរមានជ័យ)៖ លោក គង់ វិមាន អគ្គលេខាធិការក្រុមប្រឹក្សាអភិវឌ្ឍន៍កម្ពុជា តំណាងលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នាថ្ងៃទី៣១ ខែកក្កដា ឆ្នាំ២០២៥នេះ បានដឹកនាំក្រុមការងារ នាំយកថវិកាប្រគល់ជូនដល់កម្លាំងកងទ័ពដែលប្រចាំការនៅទិសប្រាសាទតាមាន់ និងប្រាសាទតាក្របី ដែលរងរបួសនៅក្នុង សង្គ្រាមប្រយុទ្ធគ្នាជាមួយកងទ័ពថៃ ក្នុងរយៈពេល ៥យប់៦ថ្ងៃ ដែលមន្ត្រីយោធាដែលរងរបួសនេះកំពុងព្យាបាលតាមមន្ទីរពេទ្យក្នុងខេត្តឧត្តរមានជ័យ និងខេត្តសៀមរាប។

នៅក្នុងដំណើរនាំយកថវិកាប្រគល់ជូនដល់កម្លាំងកងទ័ពនេះដែរ លោក គង់ វិមាន ក៏បានចុះទៅសួរសុខទុក្ខលោកឧត្តមសេនីយ៍ត្រី នាក់ វង្ស មេបញ្ជាការកងពលតូចថ្មើរជើងលេខ៤២ ដែលបានប្រចាំការបញ្ជាកម្លាំងនៅទិសប្រាសាទតាមាន់ផងដែរ។

នៅក្នុងឱកាសនោះ លោកនាំនូវការផ្តាំផ្ញើការសាកសួរសុខទុក្ខពីលោក ស៊ុន ចាន់ថុល ឧបនាយករដ្ឋមន្ត្រី ជូនដល់លោកឧត្តមសេនីយ៍ត្រី និងវរៈកងទ័ពនៅទីនោះ ព្រមទាំងបានសរសើរពីភាពអង់អាចក្លាហានលោកឧត្តមសេនីយ៍ត្រី និងកម្លាំងវីរៈកងទ័ព ដែលបានប្រយុទ្ធតស៊ូជាមួយទាហានថៃ យ៉ាងអង់អាចក្លាហាន និងមិនចាញ់សត្រូវឈ្លានពានជាដាច់ខាត។

នៅក្នុងឱកាសនោះលោកឧត្តមសេនីយ៍ត្រី នាក់ វង្ស បានថ្លែងអរគុណជូនចំពោះ សម្តេចតេជោ ហ៊ុន សែន ប្រធានព្រឹទ្ធសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា រួមទាំងលោកឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក ដែលបានយកចិត្តទុកដាក់ក្នុងការណែនាំជាប្រចាំ និងបានឧបត្ថម្ភទាំងសម្ភារ និងស្បៀងអាហារដល់កងកម្លាំងមិនឱ្យមានការខ្វះខាតនោះឡើយ។

លោកឧត្តមសេនីយ៍ត្រីមេបញ្ជាការ បានថ្លែងអំណរគុណលោកឧបនាយករដ្ឋមន្រ្តី ស៊ុន ចាន់ថុល ដែលបានគិតគូ និងបាននាំយកថវិកាជូនលោក ព្រមទាំងកម្លាំងយោធាប្រចាំការឈរជើងការពារទឹកដី និងប្រាសាទនៅទីនេះ។

នៅក្នុងឱកាសនោះលោក គង់ វិមាន ក៏បានបន្តចុះមើលរណ្តៅគ្រាប់ផ្លោងរបស់ទាហានថៃ ដែលបណ្តាញឱ្យខូចខាតផ្លូវមួយចំនួនក្នុងខេត្តឧត្តរមានជ័យផងដែរ។

សូមបញ្ជាក់ដែរថា ដោយសារសង្គ្រាមកម្ពុជា- ថៃ ផ្លូវក្នុងខេត្តឧត្តរមានជ័យ បានរងការខូចខាតចំនួន ៣ខ្សែ ដូចជា៖

១៖​ ផ្លូវជាតិលេខ៥៨​ (ពីព្រំប្រទល់ខេត្តបន្ទាយមានជ័យ-វង្វង់មូលផ្អុង ក្រុងសំរោង) មានករណីគ្រាប់កាំភ្លើងធំផ្លោង ធ្លាក់ចន្លោះ គ.ម ១១៨+៥០០ ដល់ គ.ម១៦៣+៣០០​ សរុបផ្ទៃកៅស៊ូ ៤៩,៤០ម៉ែត្រការ៉េ​ សរុបជើងទេ ១០ម៉ែត្រ​ និងសរុបធ្លុះបេតុងស្ពាន ២ម៉ែត្រការ៉េ។

២៖​ ផ្លូវជាតិលេខ៦៨​ (ព្រំប្រទល់សៀមរាប-អូរស្មាច់) មានករណីគ្រាប់កាំភ្លើងធំផ្លោង ចន្លោះ គ.ម ៩០+០០០ ដល់ គ.ម១០៤+០០០​ សរុបផ្ទៃកៅស៊ូ ៣៦ម៉ែត្រការ៉េ

៣៖​ ផ្លូវខេត្តលេខ២៥៦៧ (គោកមន-ប្រាសាទតាមាន់) មានករណីគ្រាប់កាំភ្លើងធំផ្លោង ៧ករណីចន្លោះគ.ម ១៥+០០០ ដល់ គ.ម២២+០០០​ សរុបផ្ទៃកៅស៊ូ ១៥០,៦០ម៉ែត្រការ៉េសរុបចិញ្ជើម ១.០០ម៉ែត្រ​ សរុបបេតុងលូ ២.០០ម៉ែត្រគីប៕