(បន្ទាយមានជ័យ)៖ ចាប់តាំងពីការផ្ទុះអាវុធននៅថ្ងៃទី ២៤ កក្កដា ឆ្នាំ២០២៥ មក លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ មកប្រចាំការ ដើម្បីជួយអន្តរាគមន៍ គាំពារថែទាំជូនប្រជាពលរដ្ឋ និងគ្រួសារកងទ័ព ដែលបានភៀសខ្លួនមកទីតាំងសុវត្ថិភាពក្នុងក្រុង-ស្រុកទាំង៩ របស់ខេត្តបន្ទាយមានជ័យ។

នៅឯស្រុកភ្នំស្រុក ស្រុកថ្មពួក និងស្រុកព្រះនេត្រព្រះ, លោករដ្ឋមន្ត្រី បានចុះសួរសុខទុក្ខ និងនាំយកស្បៀង ជូនប្រជាពលរដ្ឋ និងគ្រួសារកងទ័ព ដែលមួយចំនួនធំបានភៀសខ្លួនចេញពីតំបន់ជុំវិញសមរភូមិសឹកប្រាសាទតាមាន់ធំ និងប្រាសាទតាក្របី ក្នុងស្រុកបន្ទាយអំពិល ខេត្តឧត្តរមានជ័យផងដែរ។

ទន្ទឹមនឹងនេះ លោកក៏បានចុះសួរសុខទុក្ខពុកម៉ែបងប្អូនដែលបានភៀសខ្លួនពីតំបន់ព្រំដែនខេត្តបន្ទាយមានជ័យផ្ទាល់ មកទីតាំងសុវត្ថិភាពនៅស្រុកអូរជ្រៅ ស្រុកស្វាយចេក ស្រុកមង្គលបូរី និងក្រុងសិរីសោភ័ណ បង្ហាញពីការយកចិត្តទុកដាក់របស់រាជរដ្ឋាភិបាល ដើម្បីធានាពីសុខសុវត្ថិភាពរបស់ប្រជាជនទាំងអស់នៅតំបន់ដែលតានតឹង។

ជានិច្ចកាល លោករដ្ឋមន្ត្រី ឌិត ទីណា បានពាំនាំការផ្ដាំផ្ញើសួរសុខទុក្ខ និងសេចក្តីនឹករលឹកពីសំណាក់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ហើយបានបន្តចាត់ចែងការចែកចាយអំណោយបរិច្ចាគដោយសប្បរសជនជូនពុកម៉ែបងប្អូន និងកងកម្លាំងជួរមុខ។

បន្ថែមពីលើការចុះសួរសុខទុក្ខពុកម៉ែបងប្អូន លោកបានតាមដានស្ថានភាពតំបន់ព្រំដែនខេត្តបន្ទាយមានជ័យយ៉ាងដិតដល់ ព្រមទាំងបានចុះពិនិត្យស្ថានភាពផ្ទាល់នៅច្រកទ្វារព្រំដែនអន្តរជាតិប៉ោយប៉ែតផងដែរ។

ក្នុងរយៈពេលប្រចាំការពេញមួយសប្តាហ៍នេះក្រុមការងាររាជរដ្ឋាភិបាល និងរដ្ឋបាលខេត្ត បាននាំយកស្បៀងជូនពុកម៉ែបងប្អូនភៀសសឹកបានជាង ៧,០០០ គ្រួសារ។ ការផ្ដល់សេវាគាំពារនិងការចែកស្បៀងនឹងបន្តរហូតដល់ពុកម៉ែបងប្អូនអាចវិលត្រឡប់ទៅផ្ទះសម្បែងបាន នៅពេលស្ថានភាពតំបន់ព្រំដែនមានប្រក្រតីភាពឡើយវិញ៕