(ភ្នំពេញ)៖ ឧបនាយករដ្ឋមន្រ្តី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានថ្លែងឲ្យដឹងថា ប្រធានាធិបតីសហរដ្ឋអាមេរិកលោក ដូណាល់ ត្រាំ បានទម្លាក់ពន្ធលើទំនិញកម្ពុជាមកត្រឹម១៩% ខណៈកម្ពុជាយកពន្ធអាមេរិកសូន្យភាគរយ ពោលគឺគ្រប់ទំនិញសហរដ្ឋអាមេរិកនាំចូលមកកម្ពុជាទាំងអស់ មិនត្រូវ​បានគិតពន្ធនោះទេ។

ការថ្លែងរបស់ឧបនាយករដ្ឋមន្រ្តី ស៊ុន ចាន់ថុល ធ្វើឡើងនៅក្នុងសន្និសីទសារព័ត៌មាន ជុំវិញដំណឹងដ៏ល្អរបស់កម្ពុជា, ប្រធានាធិបតីអាមេរិក លោក ដូណាល់ ត្រាំ សម្រេចទម្លាក់អត្រាពន្ធលើការនាំចូលទំនិញកម្ពុជាមកនៅត្រឹម១៩%។

លោកបានបញ្ជាក់បន្ថែមថា «អត្រាបន្ទាត់ពន្ធនៅកម្ពុជាយើងមាន ១១ ៤១៤បន្ទាត់ពន្ធ អីចឹងបន្ទាត់ហ្នឹងពីដើមមាន ៣៥% ខ្លះ៥​% ខ្លះ៧% ឥឡូវបញ្ចុះទាំងអស់ គឺសូន្យទាំងអស់»។

ជាមួយគ្នានេះ លោកបានសម្តែងការពេញចិត្តចំពោះការបញ្ចុះពន្ធបដិកាពី៤៩% មក១៩%​ ដែលលទ្ធផលល្អនេះ គឺដោយការខិតខំប្រឹងប្រែងរបស់ មហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលសម្តេចបានពិភាក្សាគ្នាជាមួយលោកប្រជាធិបតី ដូណាល់ ត្រាំ ​និងដោយសារការប្រឹងប្រែងរបស់ក្រុមការងារកម្ពុជា ចរចាជាមួយសហរដ្ឋអាមេរិកដោយភាពស្មោះត្រង់។

លោកបន្ថែម​ថា​ បើ​មើលទំហំអត្រានៃការចុះ​មាន៣០ពិន្ទុ គឺ​៤៩% មក១៩% តែបើនិយាយជាភាគរយ គឺចុះ៦២% ​ពោលគឺកម្ពុជាទទួលបានការបញ្ចុះច្រើនជាងគេនៅទូទាំងពិភពលោក។ ការណ៍នេះនឹងធ្វើឱ្យកម្ពុជាអាចប្រកួតប្រជែងជាមួយប្រទេសជិតខាងបាន និងថែរក្សារោងចក្រនៅកម្ពុជាឱ្យនៅស្ថិតស្ថេរ ព្រមទាំងមានលទ្ធភាពពង្រីករោងចក្របន្ថែមទៀត​ តាមរយៈការទាក់ទាញវិនិយោគិនមកផងដែរ។

ក្រោមការខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ធ្វើឱ្យការចរចាពន្ធបដិកាជាមួយសហរដ្ឋអាមេរិក សម្រេចបាលទ្ធផលល្អ ដោយលោក ដូណាល់ ត្រាំ ប្រធានាធិបតីមេរិក បានសម្រេចទម្លាក់អត្រាពន្ធបដិកា សម្រាប់ការនាំចូលទំនិញពីកម្ពុជាពី៣៦% មកនៅ ១៩ប៉ុណ្ណោះ។ នេះបើតាមសេតវិមាន ដែលបានចេញផ្សាយនៅព្រឹកថ្ងៃទី១ ខែសីហា ឆ្នាំ២០២៥នេះ។

អត្រាពន្ធបដិកាថ្មីនេះ ជាកម្រិតល្អមួយជួយឱ្យកម្ពុជា កាន់តែទាក់ទាញវិនិយោគិនមកបណ្តាក់ទុននៅកម្ពុជា និងជំរុញឱ្យការធ្វើពាណិជ្ជកម្មកាន់តែល្អជាងមុន៕​