(ភ្នំពេញ)៖ ឧបនាយករដ្ឋមន្រ្តី ស៊ុន ចាន់ថុល បានថ្លែងឲ្យដឹងថា កម្ពុជាទិញយន្តហោះប៊ូអ៉ិញចំនួន ១០គ្រឿងពីសហរដ្ឋអាមេរិក ស្របពេលកម្ពុជាយកពន្ធសូន្យ លើគ្រប់ទំនិញទាំងអស់របស់អាមេរិក ខណៈអាមេរិកទម្លាក់ពន្ធ ឲ្យកម្ពុជាមកត្រឹម១៩%។

ការថ្លែងរបស់ឧបនាយករដ្ឋមន្រ្តី ស៊ុន ចាន់ថុល ធ្វើឡើងនៅក្នុងសន្និសីទសារព័ត៌មាន ជុំវិញដំណឹងដ៏ល្អរបស់កម្ពុជា, ប្រធានាធិបតីអាមេរិក លោក ដូណាល់ ត្រាំ សម្រេចទម្លាក់អត្រាពន្ធលើការនាំចូលទំនិញកម្ពុជាមកនៅត្រឹម ១៩%។

ឧបនាយករដ្ឋមន្រ្តី ស៊ុន ចាន់ថុល បានបញ្ជាក់យ៉ាងដូច្នេះថា «ក្រុមហ៊ុនអាកាសចរណ៍ Air Cambodia នឹងចរចារទិញ Boeing 737 Max 8 ចំនួន១០គ្រឿង ហើយមានជម្រើសអាចទិញ១០គ្រឿងទៀត ឥលូវកំពុងចរចារ ហើយសង្ឃឹមថាខែសីហានេះ អាចចុះកិច្ចព្រមព្រៀងមួយ បញ្ជាក់ពីការទិញ»។

បន្ថែមពីនោះ ឧបនាយករដ្ឋមន្រ្តី ស៊ុន ចាន់ថុល បានគូសបញ្ជាក់ថា យន្ដហោះប្រភេទ Boeing នេះ មិនងាយមកនោះទេ ដោយសាររោងចក្រ Boeing ពេញទាំងអស់ ហើយនៅក្នុងឆ្នាំ២០៣១ ទើបមានយន្ដហោះថ្មីនេះ។

ឧបនាយករដ្ឋមន្រ្តី ស៊ុន ចាន់ថុល បានលើកឡើងថា កម្ពុជាចុះកិច្ចព្រមព្រៀងជាមួយសហរដ្ឋអាមេរិក នៅក្នុងឆ្នាំ២០២៥នេះមែន ប៉ុន្ដែទាល់តែដល់ឆ្នាំ២០៣១ ទើបមានយន្ដហោះថ្មីនេះ អាចចូលមកកម្ពុជាបាន។

សូមជម្រាបថា ក្រោមការខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំរបស់សម្តេចបវរធិបតី ហ៊ុន ម៉ាណែត ធ្វើឱ្យការចរចាពន្ធបដិកា ជាមួយសហរដ្ឋអាមេរិក សម្រេចបានលទ្ធផលល្អ ដោយលោក ដូណាល់ ត្រាំ ប្រធានាធិបតីមេរិក បានសម្រេចទម្លាក់អត្រាពន្ធបដិកា សម្រាប់ការនាំចូលទំនិញពីកម្ពុជាពី៣៦% មកនៅ ១៩ប៉ុណ្ណោះ។

អត្រាពន្ធបដិកាថ្មីនេះ ជាកម្រិតល្អមួយជួយឱ្យកម្ពុជា កាន់តែទាក់ទាញវិនិយោគិនមកបណ្តាក់ទុននៅកម្ពុជា និងជំរុញឱ្យការធ្វើពាណិជ្ជកម្មកាន់តែល្អជាងមុន៕