(ភ្នំពេញ)៖ ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងារ ចំពោះកិច្ចចរចាពន្ធបរិកាជាមួយសហរដ្ឋអាមេរិក បានអះអាងថា ការយកអត្រាពន្ធនាំចេញទំនិញកម្ពុជា ទៅសហរដ្ឋអាមេរិក ចំនួន១៩ភាគរយ នឹងធ្វើឲ្យកម្ពុជាអាចប្រកួតប្រជែង ជាមួយប្រទេសជិតខាង និងក្នុងតំបន់បានទាំងអស់។

ការអះអាងបែបនេះ ធ្វើឡើងក្នុងឱកាសដែល ឧបនាយករដ្ឋមន្ត្រី ស៊ុន ចាន់ថុល រៀបចំសន្និសីទសារព័ត៌មាន ស្តីពីការសម្រេចរបស់សហរដ្ឋអាមេរិក បញ្ចុះពន្ធលើទំនិញនាំចេញពីកម្ពុជា ទៅកាន់សហរដ្ឋអាមេរិកមកត្រឹម១៩% នៅព្រឹកថ្ងៃទី០១ ខែសីហា ឆ្នាំ២០២៥។

ឧបនាយករដ្ឋមន្ត្រី ស៊ុន ចាន់ថុល បានបញ្ជាក់យ៉ាងដូច្នេះថា «អត្រា១៩ភាគរយនេះ ​បើប្រៀបធៀបទៅនឹងប្រទេសជិតខាង អត្រានេះ យើងអាចប្រកួតប្រជែង ជាមួយប្រទេសជិតខាងបានទាំងអស់»។

បន្ថែមពីនោះទៀត ឧបនាយករដ្ឋមន្ត្រី ស៊ុន ចាន់ថុល បានគូសបញ្ជាក់ថា អត្រា១៩ភាគរយនេះ កម្ពុជានឹងអាចថែរក្សារោងចក្រនៅកម្ពុជា ហើយនឹងពង្រីករោងចក្រដែលមានស្រាប់ ឲ្យមានការរីកចម្រើនបន្ថែមទៀត ព្រមទាំងទាក់ទាញអ្នកវិនិយោកមកបណ្ដាក់ទុនវិនិយោគបន្ថែមទៀត ដើម្បីផលប្រយោជនរបស់ជាតិ លើការបង្កើតការងារជូនប្រជាពលរដ្ឋ។

ឧបនាយករដ្ឋមន្ត្រី ស៊ុន ចាន់ថុល បានលើកឡើងថា «ថ្ងៃនេះ យើងទទួលបាន១៩ភាគរយ ចឹងបើមើលទំហំអត្រានៃការចុះនេះ គឺចុះ៣០ពិន្ទុ ប៉ុន្ដែបើប្រៀបធៀបជាភាគរយនៃការចុះ គឺចុះ៦១.២ភាគរយ ចុះច្រើនជាងគេ នៅទូទាំងពិភពលោក»។

ឧបនាយករដ្ឋមន្ត្រី ស៊ុន ចាន់ថុល បានសង្កត់ធ្ងន់ថា ការធ្លាក់ចុះអត្រាពន្ធអាមេរិកនេះ ដោយសារការណែនាំ និងចង្អុញបង្ហាញពីសម្ដេចបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងការខិតខំប្រឹងប្រែង របស់ក្រុមការងារ ទៅចរចារដោយសុចរិកស្មោះត្រង់ ជាមួយសហរដ្ឋអាមេរិក។

ទន្ទឹមគ្នានេះ ឧបនាយករដ្ឋមន្ត្រី ស៊ុន ចាន់ថុល ក៏សូមអំពាវនាវទៅ​ប្រជាពលរដ្ឋខ្មែរ ដែលធ្វើការចំណាកស្រុក អាចអញ្ជើញត្រឡប់មកកម្ពុជាវិញ ដោយសារកម្ពុជាអាចបង្កើតការងារ រាប់ម៉ឺនសែននាក់ ជូនដល់ប្រជាពលរដ្ឋផងដែរ។

សូមជម្រាបថា ក្រោមការខិតខំប្រឹងប្រែង របស់រាជរដ្ឋាភិបាល ក្រោមការដឹកនាំរបស់សម្តេចបវរធិបតី ហ៊ុន ម៉ាណែត ធ្វើឱ្យការចរចាពន្ធបដិកា ជាមួយសហរដ្ឋអាមេរិក សម្រេចបាលទ្ធផលល្អ ដោយលោក ដូណាល់ ត្រាំ ប្រធានាធិបតីមេរិក បានសម្រេចទម្លាក់អត្រាពន្ធបដិកា សម្រាប់ការនាំចូលទំនិញពីកម្ពុជា ពី៣៦% មកនៅ ១៩ប៉ុណ្ណោះ។

អត្រាពន្ធបដិកាថ្មីនេះ ជាកម្រិតល្អមួយជួយឱ្យកម្ពុជា កាន់តែទាក់ទាញវិនិយោគិនមកបណ្តាក់ទុននៅកម្ពុជា និងជំរុញឱ្យការធ្វើពាណិជ្ជកម្មកាន់តែល្អជាងមុន៕