(ភ្នំពេញ)៖ លោកឧបនាយករដ្ឋមន្ត្រី ស៊ុន ចាន់ថុល នៅព្រឹកថ្ងៃទី១ ខែសីហា ឆ្នាំ២០២៥ បានថ្លែងថាទោះបីអត្រាពន្ធបដិការចុះមកត្រឹម ១៩%ក៏ពិតមែន ប៉ុន្តែកម្ពុជាមិននៅស្ងៀមនោះទេ គឺព្យាយាមកាត់បន្ថយទាំងការចំណាយ ទាំងពេលវេលាជូនវិនិយោគិនជាតិ និងអន្តរជាតិឱ្យខានតែបាន។

ការថ្លែងបែបនេះរបស់លោក បានធ្វើឡើងនៅក្នុងសន្និសីទសារព័ត៌មាន ជុំវិញដំណឹងដ៏ល្អរបស់កម្ពុជា, ប្រធានាធិបតីអាមេរិក លោក ដូណាល់ ត្រាំ សម្រេចទម្លាក់អត្រាពន្ធលើការនាំចូលទំនិញកម្ពុជាមកនៅត្រឹម១៩%។

ក្រោមការខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ធ្វើឱ្យការចរចាពន្ធបដិកាជាមួយសហរដ្ឋអាមេរិក សម្រេចបាលទ្ធផលល្អ ដោយលោក ដូណាល់ ត្រាំ ប្រធានាធិបតីមេរិក បានសម្រេចទម្លាក់អត្រាពន្ធបដិកា សម្រាប់ការនាំចូលទំនិញពីកម្ពុជាពី៣៦% មកនៅ ១៩ប៉ុណ្ណោះ។ នេះបើតាមសេតវិមាន ដែលបានចេញផ្សាយនៅព្រឹកថ្ងៃទី១ ខែសីហា ឆ្នាំ២០២៥នេះ។ ជាមួយនឹងលទ្ធផលដ៏ល្អមួយនេះ, បើតាមប្រសាសន៍របស់លោកឧបនាយករដ្ឋមន្ត្រី កម្ពុជាក៏បានសម្រេចកាត់បន្ថយអត្រាពន្ធសម្រាប់ការនាំចូលទំនិញពីអាមេរិក មកត្រឹម ០%ផងដែរ។

ឆ្លើយតបនឹងសំណួរអ្នកសារព័ត៌មាន ពីភាពប្រកួតប្រជែងទំនិញជាមួយប្រទេសជិតខាងក្នុងអត្រាពន្ធ១៩%នេះ, ឧបនាយករដ្ឋមន្ត្រី ស៊ុន ចាន់ថុល បានគូសបញ្ជាក់ថា៖ «ប្រកួតប្រជែងបាន ហើយអាចឈ្នះទៀត»។

លោក បានអះអាងដូច្នេះថា បើទោះបីជាអត្រាពន្ធស្មើគ្នាក៏ដោយ ក៏ប៉ុន្តែតម្លៃកម្លាំងពលកម្មមិនដូចគ្នានោះទេ ព្រោះកម្ពុជាមានកម្លាំងពលកម្មច្រើន ហើយថ្លៃឈ្នួលសមរម្យ បើធៀបនឹងប្រទេសជិតខាង។​ អ្វីដែលពិសេសទៀតនោះ ភូមិសាស្រ្តរបស់កម្ពុជាគឹអំណោយផលណាស់ ដ្បិតថាកម្ពុជាស្ថិតនៅចំណុចកណ្ដាលនៃតំបន់មេគង្គ។

ដោយឡែកច្បាប់វិនិយោគរបស់កម្ពុជាវិញ លោកឧបនាយករដ្ឋមន្ត្រី បានថ្លែងថាច្បាប់វិនិយោគយើង គឺមានការលើកទឹកចិត្តដល់វិនិយោគិនមិនថាបរទេស ឬវិនិយោគិនក្នុងស្រុក ដោយមិនមានការរើសអើងនោះទេ។

ក្រោមការដឹកនាំដ៏ឈ្លាសវៃរបស់ សម្ដេចបវរធិបតី ហ៊ុន ម៉ាណែត, រាជរដ្ឋាភិបាលកម្ពុជា នឹងបន្តកែសម្រួលនីតិវិធីផ្សេងៗ កាត់បន្ថយនីតិវិធីស្មុគស្មាញច្រើន កាត់បន្ថយតម្លៃលើផលិតកម្មក្នុងប្រទេសកម្ពុជា ដែលនេះបញ្ជាក់ថាទោះបីអត្រាពន្ធបដិការចុះមកត្រឹម ១៩%ក៏ពិតមែន ប៉ុន្តែកម្ពុជាមិននៅស្ងៀមនោះទេ គឺព្យាយាមកាត់បន្ថយទាំងការចំណាយ ទាំងពេលវេលាជូនវិនិយោគិនជាតិ និងអន្តរជាតិឱ្យខានតែបាន។

ជាមួយគ្នានេះ រាជរដ្ឋាភិបាលកម្ពុជា នៅតែបន្តរៀបចំវេទិការវាងរាជរដ្ឋាភិបាល និងវិស័យឯកជន ដើម្បីស្ដាប់ពីបញ្ហាដែលវិស័យឯកជនជួបប្រទះ និងខិតខំរកដំណោះស្រាយជូនពួកគាត់ តាមរយៈក្រុមការងារ ១៦, វេទិការាជរដ្ឋាភិបាលនិងវិស័យឯកជន, វេទិកាកម្ពុជា/ជប៉ុន (រៀងរាល់ ៦ខែម្ដង), វេទិកាកម្ពុជា/សហរដ្ឋអាមេរិក, វេទិការាជរដ្ឋាភិបាល វិស័យឯកជន និងសហភាពអឺរ៉ុប, វេទិកាកម្ពុជា/កូរ៉េ និងបន្តរៀបចំវេទិការវាងរាជរដ្ឋាភិបាល និងតំបន់សេដ្ឋកិច្ចពិសេសទាំង៣២ ដើម្បីស្ដាប់ពីបញ្ហារបស់ពួកគាត់ និងដោះស្រាយបញ្ហានានា ក្នុងទិសដៅបង្កើនការវិនិយោគក្នុងតំបន់សេដ្ឋកិច្ចពិសេស និងបង្កើតឱកាសការងារបន្ថែមទៀតជូនប្រជាពលរដ្ឋកម្ពុជា៕