(ភ្នំពេញ)៖ ឧបនាយករដ្ឋមន្រ្តី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា ​ បានគូសបញ្ជាក់ថា ក្នុងចំណោមប្រទេស ដែលចរចាពន្ធបដិកាជាមួយសហរដ្ឋអាមេរិក កម្ពុជាគឺជាប្រទេសដែលទទួលបានការបញ្ចុះពន្ធច្រើនគេ នៅលើពិភពលោក ​គឺចុះពី៤៩% មក១៩% ដោយចុះបាន៣០ពិន្ទុ ឬប្រមាណ៦១.២%។

ថ្លែងក្នុងសន្និសីទសារព័ត៌មាន ជុំវិញដំណឹងដ៏ល្អរបស់កម្ពុជា​ ដោយប្រធានាធិបតីអាមេរិក លោក ដូណាល់ ត្រាំ សម្រេចទម្លាក់អត្រាពន្ធលើការនាំចូលទំនិញកម្ពុជា មកនៅត្រឹម១៩%​ នាថ្ងៃទី១ ខែសីហា ឆ្នាំ២០២៥នេះ ​ឧបនាយករដ្ឋមន្រ្តី ស៊ុន ចាន់ថុល ​បានគូសបញ្ជាក់យ៉ាងដូច្នេះថា «សំខាន់ណាស់ដោយសារ មានការពិភាក្សាគ្នារវាងឯកឧត្តមប្រធានាធិបតី និងសម្តេចនាយករដ្ឋមន្រ្តីបានធ្វើឱ្យយើង ទទួលបាននូវអត្រាពន្ធ១៩%នេះ។ ថ្ងៃទី២ ខែមេសា ឆ្នាំ២០២៥ អត្រាពន្ធនេះ កម្ពុជាទទួលបាន៤៩% នៅថ្ងៃទី៧ ខែកក្កដា ពន្ធនេះបានចុះមក៣៦% ថ្ងៃនេះ យើងទទួលបាន១៩%។ ចឹងបើយើងមើលទំហំអត្រានាំការចុះនេះ គឺចុះ៣០ពិន្ទុ គឺពី៤៩% មក១៩% យើងចុះបាន៣០ពិន្ទុ ក៏ប៉ុន្តែបើប្រៀបធៀបជាភាគរយនៃការចុះ គឺចុះ៦១.២% ចុះច្រើនជាងគេនៅទូទាំងពិភពលោក»។

​លោកបន្ថែមថា ការទទួលបានលទ្ធផលល្អនេះនៃការចរចានេះ គឺដោយការខិតខំប្រឹងប្រែងរបស់ មហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលសម្តេចបានពិភាក្សាគ្នា ជាមួយលោកប្រជាធិបតី ដូណាល់ ត្រាំ ​និងដោយសារការប្រឹងប្រែងរបស់ក្រុមការងារកម្ពុជា ចរចាជាមួយសហរដ្ឋអាមេរិកដោយភាពស្មោះត្រង់។

​ការបញ្ចុះពន្ធដល់ ១៩%នេះ នឹងធ្វើឱ្យកម្ពុជាអាចប្រកួតប្រជែងជាមួយ ប្រទេសជិតខាងបានទាំងអស់។ លើសនេះ កម្ពុជានឹងអាចថែរក្សារោងចក្រនៅកម្ពុជា ឱ្យនៅស្ថិតស្ថេរ ព្រមទាំងមានលទ្ធភាពពង្រីករោងចក្របន្ថែមទៀត​ តាមរយៈការទាក់ទាញវិនិយោគិនមកបណ្តាក់ទុន​វិនិយោគនៅកម្ពុជា​ ដើម្បីបង្កើតការងារជូនប្រជាពលរដ្ឋ។

តាមរយៈការបង្ហាញរបស់លោកឧបនាយករដ្ឋមន្រ្តី ស៊ុន ចាន់ថុល វៀតណាមទទួលបានការបញ្ចុះពន្ធ ២៦ពិន្ធុឬ៥៦.៥% ពី៤៦%មក ២០%, ថៃចុះបាន១៧ពិន្ទុ ឬ៤៧.២% ពី ៣៦%មក១៩%, រីឯបង់ក្លាដេស ចុះ១៧ពិន្ធុ ឬ ៤៥.៩% ពី៣៧%មក២០។

​គួររំលឹកថា នៅថ្ងៃទី៣ ខែមេសា ឆ្នាំ២០២៥ ដែលត្រូវនឹងថ្ងៃទី២ ខែមេសា នៅសហរដ្ឋអាម៉េរិក លោក ដូណាល់ ត្រាំ បានសម្រេចកំណត់ពន្ធគយលើទំនិញនាំចូលពីកម្ពុជា ប្រមាណ ៤៩%។ បន្ទាប់ពីការកំណត់យកពន្ធក្នុងអត្រា ៤៩%នេះ សម្តេចមហាបវរធិបតី ហ៊ុន ម៉ាណែត បានផ្ញើលិខិតទៅលោក Donald J. Trump ដើម្បីស្នើចរចាលើការអនុវត្តពន្ធ លើការនាំចេញរបស់កម្ពុជា ទៅកាន់សហរដ្ឋអាមេរិក។

បន្ទាប់ពីការចរចាពន្ធបដិការវាងកម្ពុជា និងអាមេរិក ដែលក្រុមការងារចំពោះកិច្ចរបស់កម្ពុជា ដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកស្រី ចម និម្មល រដ្ឋមន្រ្តីក្រសួងពាណិជ្ជកម្ម ជាអនុប្រធានក្រុមការងារ នៅថ្ងៃទី៨ ខែកក្កដា ឆ្នាំ២០២៥ អាមេរិកបានសម្រេចទម្លាក់អត្រាពន្ធពី ៤៩% មកនៅ ៣៦%។ អត្រា៣៦% នេះមិនមែនជាការបិទផ្លូវចរចានោះទេ គឺកម្ពុជានៅមានលទ្ធភាពចរចាឱ្យបញ្ចុះអត្រាពន្ធថែមទៀត។ ទើបពេលនេះ លោកប្រធានាធិបតី ដូណាល់ ត្រាំ សម្រេចទម្លាក់អត្រាពន្ធពី ៣៦% មកនៅត្រឹម ១៩%៕