(ភ្នំពេញ)៖ អ្នកផលិតមាតិកាដ៏ល្បីឈ្មោះ គឺលោក ហេង វិសាល និងភរិយា ស្រីនា នៅថ្ងៃទី១ ខែសីហា ឆ្នាំ២០២៥ បានប្រកាសឧបត្ថម្ភរៀងរាល់ខែចំនួន ១០០ដុល្លារ ដល់វីរកងទ័ពកម្ពុជា ២នាក់ ដែលត្រូវបានថៃប្រគល់ជូនកម្ពុជាវិញនៅថ្ងៃនះ ពេញមួយជីវិតរបស់វីរកងទ័ពទាំង២។

លោកបានថ្លែងសារលើបណ្តាញសង្គមផ្លូវការយ៉ាងដូច្នេះ «ពេលដែលបានឃើញព័ត៌មាននេះហើយ ខ្ញុំ និងក្រុមគ្រួសារពិតជាមិនអាចទទួលយកបានទេ ខ្ញុំពិតជាឈឺចាប់ខ្លាំងណាស់ ម្នាក់ពិការ ម្នាក់មានបញ្ហាស្មាតី។ តើអនាគតពួកគាត់នឹងទៅជាយ៉ាងណាទៅ? ខ្ញុំនិងគ្រួសារសម្រេចចិត្តថា នឹងប្រើលុយផ្ទាល់ខ្លួន ឧបត្ថមពួកគាត់ម្នាក់ ១០០ដុល្លារ (100$) ជារៀងរាល់ខែ រយៈពេលពេញមួយជីវិត»។

សូមជម្រាបថា កងទ័ពឈ្លានពានថៃ បានប្រគល់ទាហានខ្មែរ ២នាក់ នៅច្រកអូរស្មាច់ នៅម៉ោង១១ព្រឹក រួមមាន៖

* ១៖ លោកអនុសេនីយ៍ត្រី អាង អឿង ភេទប្រុស អាយុ៣៧ឆ្នាំ បាត់បង់ស្មារតី
* ២៖ លោកពលបាលឯក ម៉ម វុទ្ធី ភេទប្រុស អាយុ៥៣ឆ្នាំ រងរបួសធ្ងន់។

ថ្លែងប្រាប់បណ្តាញព័ត៌មាន Fresh News ទាំងអួលដើមក លោក ហេង វិសាល ក៏បានលើកឡើងថា លោកឃើញវីរកងទ័ពទាំងពីរមានសភាពបែបនេះ ពិតជាគួរឲ្យសង្វេគជាពន់ពេក។ នេះជាសកម្មភាពដែលខ្មែរជួយខ្មែរ។

នៅពេលសួរថា តើការឧបត្ថម្ភរៀងរាល់ខែដល់វីរកងទ័ពទាំងពីរពេញមួយជីវិតធ្វើទៅរួចទេ ព្រោះនេះជាអម្រែកដ៏ធ្ងន់ លោក ហេង វិសាល បានឆ្លើយទាំងមិនស្ទាក់ស្ទើរថា លោកពិតជាធ្វើ។

«ខ្ញុំមិនមែនជាអ្នកមានលុយចាយមិនអស់ទេ ប៉ុន្តែនេះគឺជាអ្វីដែលខ្ញុំអាចធ្វើបានទៅកាន់វីរបុរសរបស់ខ្ញុំ»។ លោក ហេង វិសាល បានបញ្ជាក់បន្ថែម។

សម្រាប់លោក ហេង វិសាល គឺឥលូវនេះលោកកំពុងស្វែងរកបណ្តាញ ដើម្បីចង់ចុះទៅសួរសុខទុក្ខផ្ទាល់វីរកងទ័ពទាំងពីរ ហើយក៏ដើម្បីគណនីធនាគារ សម្រាប់ទុកឧបត្ថម្ភថវិការៀងរាល់ខែផងដែរ៕