(ឧត្តរមានជ័យ-ព្រះវិហារ)៖ ក្រោមកិច្ចសហការជាមួយលោកកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ និងលោក មាន ចាន់យ៉ាដា អភិបាលខេត្តឧត្តរមានជ័យ និងលោក គីម រិទ្ធី អភិបាលខេត្តព្រះវិហារ ក្រុមការងារសហព័ន្ធយុវជនបូជាការពារយុត្តិធម៌ ក្រោមការចុះបញ្ជាផ្ទាល់របស់អ្នកឧកញ៉ា ឡេង ណាវ៉ាត្រា បានបន្តផ្គត់ផ្គង់ការហូបចុកជូនប្រជាពលរដ្ឋភៀសសឹកចំនួន ៩គោលដៅ ក្នុងខេត្តទាំងពីរដែលជម្លៀសចេញពីសមរភូមិក្តៅ។

បើទោះជាមានបទឈប់បាញ់រវាងរដ្ឋាភិបាលកម្ពុជា-ថៃ បានចូលជាធរមានហើយ នៅម៉ោង១២៖០០នាទីយប់ ថ្ងៃទី២៨ ខែកក្កដា ឆ្នាំ២០២៥ នៅថ្ងៃទី១ ខែសីហានេះ បេសកកម្មរបស់សហព័ន្ធយុវជនបូជាការពារយុត្តិធម៌ បាននឹងកំពុងបន្តធ្វើម្ហូបផ្គត់ផ្គង់ជូនបងប្អូនប្រជាពលរដ្ឋភៀសសឹក ធ្វើឡើងក្រោមសហការជាមួយអាជ្ញាធរខេត្តទាំងពីរ និងគណៈកម្មាធិការជាតិគ្រប់គ្រងគ្រោះមហន្តរាយ។

ចុះសមរភូមិផ្ទាល់គ្រប់គោលដៅទាំង៩ ទីទួលសុវត្ថិភាពរបស់ជនភៀសសឹក អ្នកឧកញ៉ា ឡេង ណាវ៉ាត្រា បានណែនាំឲ្យក្រុមយុវជននៃសហព័ន្ធយុវជនបូជាការពារយុត្តិធម៌ មានសាមគ្គីភាពជាក្រុម បង្កើនកិច្ចសហការល្អជាមួយគ្រប់ភាគីពាក់ព័ន្ធ ដើម្បីបំពេញបេសកកម្មផ្គត់ផ្គង់ម្ហូបអាហារ ជូនជនភៀសសឹកឲ្យបានគ្រប់គ្រាន់តាមគោលដៅនីមួយៗ៕