(ស្វាយរៀង)៖ លោកបណ្ឌិត សម តារា សមាជិកសភាមណ្ឌលស្វាយរៀង អនុប្រធានគណៈកម្មការទី១ នៃរដ្ឋសភា, លោកបណ្ឌិត ជ័យ សុន សមាជិកសភាមណ្ឌលស្វាយរៀង, លោកស្រី ឯក សុវណ្ណភារៈ សមាជិកសភាមណ្ឌលស្វាយរៀង និងមានការចូលរួមអមដំណើរពីក្រុមការងារថ្នាក់ខេត្ត នៅព្រឹកថ្ងៃទី១ ខែសីហា ឆ្នាំ២០២៥ បានអញ្ជើញចូលរួមបុណ្យ និងគោរពវិញ្ញាណក្ខន្ធសព លោកអនុសេនីយ៍ទោ តែម សុខជា ជាមន្ត្រីយោធាបម្រើការងារនៅកងឯកភាព​ កងពលធំអន្តរាគមន៍លេខ៣ ដែលបានពលីជីវិតនៅលើសមរភូមិប្រយុទ្ធខេត្តព្រះវិហារ ក្នុងជន្មាយុ៤៣ឆ្នាំ។ ពិធីបុណ្យបានប្រារព្ធធ្វើនៅគេហដ្ឋានក្នុងភូមិទួលស្តី​ ឃុំទួលស្តី​ ស្រុកចន្ទ្រា​ ខេត្តស្វាយរៀង។

លោកបណ្ឌិតសម តារា បានចាត់ទុកមរណភាពរបស់ លោកអនុសេនីយ៍ទោ គឺជាការបាត់បង់នូវឧត្តមស្វាមី និងឪពុក ដែលប្រកប ដោយព្រហ្មវិហារធម៌ជាទីគោរពស្រលាញ់បំផុត​ ក្នុងមួយជីវិតរបស់លោក បានបូជាកម្លាំងកាយ កម្លាំងចិត្ត បញ្ញា ស្មារតី ក្នុងការចិញ្ចឹមបីបាច់ថែរក្សាកូនៗ ព្រមទាំងក្រុមគ្រួសារប្រកបដោយគុណធម៌នៅក្នុងសង្គមជាតិ ជាពិសេសគឺបាត់ បង់នូវវីរៈយុទ្ធជនស្នេហាជាតិដ៏ឧត្តុងឧត្តម ដែលបានរួមចំណែក យ៉ាងធំធេងក្នុងការប្រយុទ្ធតស៊ូជាមួយខ្មាំងសៀម ដែលបានធ្វើការឈ្លានពានមកលើដែនអធិបតេយ្យភាពកម្ពុជាយើង។ មិនត្រឹមតែប៉ុណ្ណោះ លោកក៏បានចូលរួមប្រយុទ្ធយ៉ាង អង់អាចក្លាហាន និងស្វិតស្វាញប្រឆាំងជាមួយពួកចោរសៀមឈ្លានពាន​ និងបានបង្ហាញគំរូវីរភាព និងការលះបង់របស់វីរកងទ័ពយេីងទាំងអស់នៅលេីសមរភូមិប្រយុទ្ធ​ ដែលប្រជាពលរដ្ឋខ្មែរគ្រប់រូបត្រូវចងចាំនូវគុណូបការៈដ៏ថ្លៃថ្លានេះ។

ក្នុងឱកាសដ៏សែនក្រៀមក្រំនេះ ក្នុងនាមប្រជាជាតិខ្មែរ​ នឹងចងចាំនូវគំរូវីរភាព និងមនសិការស្នេហាជាតិដ៏ឧត្តុងឧត្តមរបស់ លោកអនុសេនីយ៍​ទោ​ និងសូមចូលរួមរំលែកទុក្ខដោយក្តីសោកសង្រេងជាទីបំផុតជាមួយ លោកស្រី អូម សុផានី ព្រមទាំង ក្រុមគ្រួសារ និងសូមបួងសួងដល់តេជៈបារមីនៃព្រះពុទ្ធ ព្រះធម៌ ព្រះសង្ឃ តាមជួយថែរក្សាដួងវិញ្ញាណក្ខន្ធរបស់ លោកអនុសេនីយ៍ទោ​ តែម សុខជា បានទៅសោយសុខក្នុងឋានសុគតិភពកុំបីឃ្លៀងឃ្លាតឡើយ។

សូមបញ្ជាក់ នៅក្នុងឱកាសបុណ្យសពវរកងទ័ពនេះលោកបណ្ឌិត សម តារា បានចូលបច្ច័យចំនួន៥០ម៉ឺនរៀល, លោកបណ្ឌិត ជ័យ សុន ចូលបច្ច័យចំនួន២០ម៉ឺនរៀល និងលោកស្រី ឯក សុវណ្ណភារៈ ចូលបច្ច័យចំនួន៣០មុឺនរៀល និងជូនបច្ច័យលោកយាយ លោកតា កងកម្លាំងសរុបថវិកា ២,៦០០,០០០រៀលផងដែរ៕