អភិបាលខេត្តស្វាយរៀង នាំយកថវិការសម្ដេចធីបតី ហ៊ុន ម៉ាណែត ប្រគល់ជូនភរិយារបស់សពលោកអនុសេនីយ៍ទោ តែម សុខជា ដែលបានពលីលើសមរភូមិប្រយុទ្ធជាមួយទ័ពឈ្លានពានថៃនៅខេត្តព្រះវិហារ
01-08-2025 16:50
(ស្វាយរៀង)៖ លោក ប៉េង ពោធិ៍សា អភិបាលខេត្តស្វាយរៀង រួមនិងក្រុមការងារ នៅថ្ងៃទី១ ខែសីហា ឆ្នាំ២០២៥ បាននាំយកថវិកាគោលនយោបាយរបស់ម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ចំនួន៨០លានរៀល និងបច្ច័យចូលបុណ្យរបស់ថ្នាក់ដឹកនាំ សមាគមឧកញ៉ាកម្ពុជា មន្ត្រីរាជការ ព្រមទាំងបងប្អូនប្រជាពលរដ្ឋខេត្ត ចំនួន ២២ ៦០០ ០០០ រៀល និង១៤១០១ដុល្លារ បានប្រគល់ជូនភរិយារបស់សព លោកអនុសេនីយ៍ទោ តែម សុខជា ដែលបានពលីជីវិតលើសមរភូមិប្រយុទ្ធជាមួយទ័ពឈ្លានពានថៃនៅខេត្តព្រះវិហារ។
ក្នុងឱកាសនោះ លោកអភិបាលខេត្តបានចាត់ឱ្យក្រុមការងាររៀបចំទុកដាក់ថវិកាទៅក្នុងកុងធនាគារជូនគ្រួសារសពផងដែរ។
លោក ប៉េង ពោធិ៍សា បានថ្លែងថា ក្នុងនាមរដ្ឋបាលខេត្ត ក៏ដូចជាក្រុមគ្រួសារសព សូមសម្តែងនូវការដឹងគុណ និងអរគុណចំពោះប្រមុខរាជរដ្ឋាភិបាលកម្ពុជា និងថ្នាក់ដឹកនាំគ្រប់ស្ថាប័ន សមាគមន៍ឧកញ៉ាកម្ពុជា មន្ត្រីរាជការ ព្រមទាំងបងប្អូន ប្រជាពលរដ្ឋដែលបានចូលបច្ច័យបុណ្យវីរកងទ័ពដែលបានតស៊ូប្រយុទ្ធដើម្បីការពារទឹកដីពីសត្រូវឈ្លានពាន។
ក្នុងនាមប្រជាជាតិខ្មែរ នឹងចងចាំនូវគំរូវីរភាព និងមនសិការស្នេហាជាតិដ៏ឧត្តុងឧត្តមរបស់លោកអនុសេនីយ៍ទោ តែម សុខជា និងសូមបួងសួងដល់តេជៈបារមីនៃព្រះពុទ្ធ ព្រះធម៌ ព្រះសង្ឃ តាមជួយថែរក្សាដួងវិញ្ញាណក្ខន្ធរបស់ លោកព្រិន្ទបាលឯក តែម សុខជា បានទៅសោយសុខក្នុងឋានសុគតិភពកុំបីឃ្លៀងឃ្លាតឡើយ៕