(ឧត្តរមានជ័យ)៖ នៅរសៀលថ្ងៃទី១ ខែសីហា ឆ្នាំ២០២៥នេះ លោក សុខ សុគន្ធា ប្រធានក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជា នៃតំបន់ឆ្នេរខាងលិច នៅសហរដ្ឋអាមេរិកទទួលបន្ទុករដ្ឋខូឡូរ៉ាដូ បានដឹកនាំក្រុមការងារតាមរយៈភ្នាក់ងារព័ត៌មានអង្គភាព Fresh News លោក គ្រួច វណ្ណា បាននាំយកអំណោយគ្រឿងឧបភោគ បរិភោគ និងថវិការបស់ក្រុមការងារក្នុង និងក្រៅប្រទេស និងសប្បុរសជនជូនដល់ជនភៀសសឹក កំពុងស្នាក់នៅទីតាំងសុវត្ថិភាពក្នុងស្រុកអន្លង់វែង ខេត្តឧត្តរមានជ័យ។

លោក សុខ សុគន្ធា បានលើកឡើងថា ផលវិបាក នៃសង្គ្រាមបានបង្កមហន្តរាយ បំផ្លិចបំផ្លាញទ្រព្យសម្បត្តិ និងសោកនាដកម្ម ផ្តាច់ជីវិតមិនរើសមុខ ទាំងទាហាន និងជនស៊ីវិលស្លូតត្រង់។ ប្រជាពលរដ្ឋត្រូវបង្ខំចិត្តភៀសខ្លួន ចាកចេញពីផ្ទះសម្បែង ទ្រព្យសម្បត្តិ សត្វចិញ្ចឹមដែលមិនអាចយកមកជាមួយបាន ទុក្ខលំបាកនេះធ្វើឱ្យយើងទាំងអស់គ្នាយល់យ៉ាងច្បាស់តម្លៃនៃសន្តិភាព។

អំណោយដែលនាំមកនៅពេលនេះ រួមមាន៖ ថវិកា៨លានរៀល, មី ចំនួន១១០កេស, ទឹកត្រី ចំនួន១១០យួរ, ទឹកស៊ីអ៉ីវ ចំនួន១១០យួរ, ទឹកសុទ្ធ ចំនួន១០៤កេស, ទឹកសុទ្ធយួរ ចំនួន១២៥យួរ, បារី ចំនួន៨កេស, អាវយឺត ៣បេ, ងៀតគោ ចំនួន២០គីឡូក្រាម, ត្រីងៀត ចំនួន២០គីឡូក្រាម, សាច់ក្រក ចំនួន២០គីឡូក្រាម និងទឹកដោះគោជូរ ចំនួន១២កេស។

សូមបញ្ជាក់ថា ក្រោមការយកចិត្តទុកដាក់ខ្ពស់របស់ប្រមុខរាជរដ្ឋាភិបាល សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំអាជ្ញាធរមានសមត្ថកិច្ច យកចិត្តទុកដាក់ចំពោះប្រជាពលរដ្ឋជាជនភៀសសឹក ដែលបានជម្លៀសខ្លួនចេញពីតំបន់ប្រយុទ្ធគ្នា ក្នុងនោះមានគណៈកម្មការជាតិគ្រប់គ្រងគ្រោះមហន្តរាយ បានសហការជាមួយក្រសួងស្ថាប័នពាក់ព័ន្ធ រដ្ឋបាលខេត្តពាក់ព័ន្ធ រៀបចំទីទួលសុវត្ថិភាពក៏ដូចជាដោះស្រាយទីតាំងស្នាក់នៅ ការហូបចុក និងសុខាភិបាលជូនបងប្អូនទាំងអស់គ្នា។

ជាមួយគ្នានេះ ក្នុងស្មារតីខ្មែរជួយខ្មែរ ស្មារតីខ្មែរតែមួយ មានប្រជាពលរដ្ឋជាច្រើនបានចូលរួមបរិច្ចាគទាំងថវិកា និងកញ្ចប់ស្បៀងអាហារ ថ្នាំពេទ្យ និងសម្ភារប្រើប្រាស់នានាជាច្រើនទៀត ជួយដល់កងទ័ពជួរមុខ និងប្រជាពលរដ្ឋភៀសសឹកពីតំបន់មានជម្លោះព្រំដែនកម្ពុជា-ថៃ៕