(ស្ទឹងត្រែង)៖ គណៈប្រតិភូ រដ្ឋបាលរាជធានីភ្នំពេញ បាននាំយកអំណោយមនុស្សធម៌ជាគ្រឿងឧបភោគបរិភោគ និងសម្ភារប្រើប្រាស់ផ្សេងៗជាច្រើនមុខ ដែលបានពីសប្បុរសជននានា ដើម្បីប្រគល់ជូនកងពលតូចអន្តរាគមន៍លេខ១២៨ នៅខេត្តស្ទឹងត្រែង ។

ការប្រគល់អំណោយនេះ បានធ្វើឡើង នាព្រឹកថ្ងៃទី០១ ខែសីហា ឆ្នាំ២០២៥ ដឹកនាំដោយលោក ហួត ហៃ អភិបាលរង តំណាងឱ្យលោក ឃួង ស្រេង អភិបាល នៃគណៈអភិបាលរាជធានីភ្នំពេញ និងលោកវរសេនីយ៍ឯក ធីវ ម៉ុល។

នាឱកាសនោះ លោកអភិបាលរងរាជធានី បានផ្តាំផ្ញើដល់បងៗកងទ័ព សូមមានការប្រុងប្រយ័ត្នខ្ពស់ ត្រៀមលក្ខណៈជានិច្ច ព្រោះសត្រូវមិនអោយយើងបានសុខឡើយ មានតែយើងរឹងមាំខ្លួនឯងប៉ុណ្ណោះ ទើបយើងអាចការពារទឹកដីយើង មិនឲ្យបាត់បង់ឡើយ។

អំណោយជាគ្រឿងឧបភោគ បរិភោគ និងសម្ភារៈប្រើប្រាស់ចាំបាច់ ចំនួន៥៦មុខ របស់សប្បុរសជន ដែលបានផ្តល់ជូនសមរភូមិមុខ តាមរយៈរដ្ឋបាលរាជធានីភ្នំពេញ ទៅប្រគល់ជូនកងពលតូចអន្តរាគមន៍លេខ១២៨ ខេត្តស្ទឹងត្រែង ។

ជាការឆ្លើយតបក្នុងឱកាសនោះ លោកវរសេនីយ៍ឯក ធីវ ម៉ុល បានបញ្ជាក់ឱ្យដឹងថា៖ កងពលតូចអន្តរាគមន៍លេខ១២៨ ខេត្តស្ទឹងត្រែង មានកងទ័ពមួយចំនួនបានទៅឈរជើងការពារព្រំដែននៅជួរមុខ នៅច្រកព្រំដែនអានសេះ ជាំតែ និងមុំបី ក្នុងឃុំជាំក្សាន្ត ស្រុកជាំក្សាន្ត ខេត្តព្រះវិហារ។

ជាមួយគ្នានោះ លោកវរសេនីយ៍ឯក ធីវ ម៉ុល ក៏បានថ្លែងអំណរគុណយ៉ាងជ្រាលជ្រៅបំផុតផងដែរ ចំពោះទឹកចិត្តបងប្អូនប្រជាពលរដ្ឋ នៅរាជធានីភ្នំពេញ និងជាពិសេសលោក ឃួង ស្រេង អភិបាលរាជធានីភ្នំពេញ តែងតែបានឧបត្ថម្ភ ជូនកងពលតូចអន្តរាគមន៍លេខ១២៨កន្លងមក ហើយនៅពេលនេះ ខណៈដែលកងទ័ពយើងកំពុងប្រឈមមុខជាមួយសត្រូវឈ្លានពាន រដ្ឋបាលរាជធានីភ្នំពេញ បានបន្តដឹកជញ្ជូនគ្រឿងឧបភោគបរិភោគជាច្រើនមុខ មកជួយឧបត្ថមបន្ថែមទៀត។ ទឹកចិត្តបងប្អូនប្រជាពលរដ្ឋ គឺជាកម្លាំងចិត្តដ៏ធំធេង នៅពីក្រោយពួកយើងខ្ញុំទាំងអស់គ្នា។ យើងខ្ញុំទាំងអស់គ្នា សូមប្តេជ្ញាការពារដែនអធិបតេយ្យភាព បូរណភាពទឹកដីកម្ពុជាអោយបានគង់វង្ស៕