(ឧត្តរមានជ័យ)៖ លោក ម៉េត មាសភក្តី អភិបាលរងខេត្តឧត្តរមានជ័យ បានប្រាប់បណ្ដាញព័ត៌មាន Fresh News បានឲ្យដឹងថា គិតត្រឹមថ្ងៃទី១ ខែសីហា ឆ្នាំ២០២៥ វេលាម៉ោង ១៦៖០០នាទីរសៀលនេះ ជនភៀសសឹកនៅជំរំមួយចំនួន រួមទាំងអ្នកដែលបានជម្លៀសចេញពីលំនៅដ្ឋាន បានវិលត្រឡប់មកមូលដ្ឋានភូមិឃុំ នៅខេត្តឧត្តរមានជ័យ វិញជាបណ្តើរៗ។

លោក ម៉េត មាសភក្តី បានបញ្ជាក់យ៉ាងដូច្នេះថា «បន្ទាប់ផ្ទុះសង្គ្រាមចំនួន៥ថ្ងៃ និងមានបទឈប់បាញ់ ដោយអនុវត្តចាប់ពីថ្ងៃទី២៩ ខែកក្កដា ឆ្នាំ២០២៥ គិតត្រឹមថ្ងៃទី១ ខែសីហា ឆ្នាំ២០២៥ វេលាម៉ោង១៦៖០០នាទីរសៀលនេះ ជនភៀសសឹកនៅជំរំមួយចំនួន រួមទាំងអ្នកដែលបានជម្លៀសចេញពីលំនៅដ្ឋាន កាលពីសង្គ្រាមរវាងកងទ័ពកម្ពុជា-ថៃ ទៅតាមបណ្តារាជធានី/ខេត្ត បានវិលត្រឡប់មកមូលដ្ឋានភូមិឃុំ នៅខេត្តឧត្តរមានជ័យវិញជាបណ្តើរៗ។

លោក ម៉េត មាសភក្តី បានបន្ថែមទៀតថា ជំរំទាំង៧បានបន្ថយមក៦ទីតាំង ជនភៀសសឹកកំពុងរស់នៅក្នុងជំរំ បានបន្ថយមកត្រឹម ៨ ៦៧៥គ្រួសារ ស្មើ ៣១ ៥០៥នាក់។ ចំណែកឯសភាពការណ៍ ចរន្តប្រជាពលរដ្ឋនៅតាមបណ្តាក្រុងស្រុកទាំង៥ បានការវិលត្រឡប់ ទី១៖ ស្រុកបន្ទាយអំពិលប្រមាណ ៣០% ទី២៖ ក្រុងសំរោង ៨០% ទី៣៖ ស្រុកអន្លង់វែង ៩០% ទី៤៖ ស្រុកត្រពាំងប្រាសាទ ៧០% និងទី៥៖ ស្រុកចុងកាល់ស្ទើរតែទាំងអស់៕