(ភ្នំពេញ)៖ ក្រុមនិស្សិត នៃមហាវិទ្យល័យនិតិសាស្ត្រ និងវិទ្យាសាស្ត្រសេដ្ឋកិច្ចប្រមាណ២០០នាក់ ដឹកនាំដោយព្រឹទ្ធបុរស រុន ពណ្ណរិទ្ធ នាព្រឹកថ្ងៃទី១ ខែសីហា ឆ្នាំ២០២៥ បានមកសិក្សាស្វែងយល់ពីការងារនៅរដ្ឋបាលរាជធានីភ្នំពេញ ដែលជាផ្នែកមួយ នៃការបង្កើនចំណេះដឹង នៃការអនុវត្តជាក់ស្តែងក្រៅសាលា។

លោក ឃួង ស្រេង អភិបាលរាជធានីភ្នំពេញ បានថ្លែងថា ឱកាសនៃការបណ្តុះបណ្តាលធនធានមនុស្ស នឹងគ្មានទេ បើប្រទេសជាតិមានសង្គ្រាម។ ដូច្នេះសន្តិភាពមានអត្ថន័យដ៏ជ្រាលជ្រៅ មិនអាចកាត់ថ្លៃបាន និងរកបានយ៉ាងលំបាក ដែលសម្តេចតេជោ ហ៊ុន សែន ជាស្ថាបនិកសន្តិភាពសំរាប់កម្ពុជា និងបន្តមកសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ក្នុងការដឹកនាំកម្ពុជាអភិវឌ្ឍន៍លើគ្រប់វិស័យ ពិសេសការពង្រឹងខឿនការពារជាតិ បូរណភាពទឹកដីពីសត្រូវឈ្លានពាន។

លោកអភិបាលបានបន្ថែមថា ប្រទេសជាតិរីកចំរើន គឺជាប្រទេសដែលមានធនធានមនុស្សច្រើន មានចំណេះដឹងខ្ពង់ខ្ពស់ ស្របតាមឆន្ទៈដ៏មុតស្រួចរបស់សម្តេចមហាបវរធិបតី ហ៊ុន ម៉ាណែត ដែលនឹងប្រែក្លាយប្រទេសកម្ពុជា ឲ្យក្លាយជាប្រទេសមានចំណូលខ្ពស់នៅឆ្នាំ២០៥០។

លោក ឃួង ស្រេង បញ្ជាក់ទៀតថា ក្មួយៗ ប្អូនៗបានសិក្សាខ្ពង់ខ្ពស់ គឺផ្តើមចេញពីញើសឈាមរបស់យុវជនជំនាន់មុនត្រួសត្រាយផ្លូវ និងលះបង់សព្វបែបយ៉ាង ក្នុងនោះក៏មានការពង្រឹងវិស័យអប់រំ ដែលជាស្នូលនៃការអភិវឌ្ឍន៍។ គឺបុរសម្នាក់នេះ ហើយដែលបានលះបង់អ្វីៗសព្វបែបយ៉ាងជូនប្រជាជន និងជាតិកម្ពុជា បានសុខសាន្ត និងការអភិវឌ្ឍន៍។ ប្អូនៗ និងក្មួយៗត្រូវដឹងថា តើប្អូនៗចាប់ផ្តើមចេញដំណើរពីប្រភពណា ហើយបន្តដំណើរទៅណា។

អភិបាលរាជធានីភ្នំពេញ បានបន្ថែមថា សម្តេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ក្នុងមួយឆ្នាំៗ បានបញ្ជូននិស្សិតទៅបន្តការសិក្សានៅបរទេសជាច្រើន ដើម្បីបណ្ដុះបណ្ដាលធនធានមនុស្សជំនាន់ក្រោយ៕