(ភ្នំពេញ)៖ លោក ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល ​បានសំណូមពរដល់សាធារណជនឱ្យមានការប្រុងប្រយ័ត្នចំពោះព័ត៌មានរបស់ប្រទេសថៃ ដែលជាព័ត៌មានក្លែងក្លាយលេចឡើងយ៉ាងច្រើនទាំងនៅលើសារព័ត៌មានផ្លូវការ និងនៅលើបណ្តាញសង្គមនានា។

លើកឡើងក្នុងសន្និសីទសារព័ត៌មាន នារសៀលថ្ងៃទី១ ខែសីហា ឆ្នាំ២០២៥នេះ លោកបានគូសបញ្ជាក់បន្ថែមថា ​«ព័ត៌មានមួយចំនួននោះគឺមានគោលបំណងចង់បំពុលសតិអារម្មណ៍របស់យើង ព័ត៌មានខ្លះទៀតមានគោលបំណងបំបែកបំបាក់កម្លាំងមហាសាមគ្គីជាតិដ៏រឹងមាំរបស់យើង ហើយជាពិសេសបងប្អូនយើងសូមប្រុងប្រយ័ត្នព័ត៌មានមកពីប្រទេសថៃដែលនិយាយពីកម្ពុជា បងប្អូនយើងដឹងហើយថាគេនិយាយស្អី ចឹងហើយកុំជឿព័ត៌មានទាំងនោះឱ្យសោះ»។

ជាមួយគ្នានេះលោកសំណូមពរដល់ក្រុមMMO កុំឱ្យយកព័ត៌មានដែលគ្មានប្រភពច្បាស់លាស់មកចែកចាយបន្ត ហើយបញ្ចូលអារម្មណ៍ ដែលធ្វើឱ្យប៉ះពាល់ដល់សតិអារម្មណ៍ប្រជាពលរដ្ឋ និងផលប្រយោជន៍ជាតិ ដើម្បីតែការចង់បាន Like , Share។​ សូមប្រុងប្រយ័ត្ន និងជៀសវាកុំឱ្យធ្លាក់ក្នុងអន្ទាក់របស់គេ ​ដែលក្លាយជាចំណែកមួយ​រួមចំណែកចែកចាយព័ត៌មានក្លែងក្លាយ បំពុលបរិយាកាសសង្គម​ ​ដោយមិនដឹងខ្លួន៕