(ភ្នំពេញ)៖ អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា នៅល្ងាចថ្ងៃទី១ ខែសីហា ឆ្នាំ២០២៥នេះ បានឲ្យដឹងថា មកទល់ពេលនេះ កងទ័ពកម្ពុជាចំនួន២រូប ដែលទាហានថៃបញ្ជូនត្រឡប់មកប្រទេសកម្ពុជាវិញនោះ បាននិងកំពុងទទួលការព្យាបាលយ៉ាងយកចិត្តទុកដាក់បំផុត ទាំងសុខភាពផ្លូវកាយ និងសុខភាពផ្លូវចិត្ត។

ក្នុងសន្និសីទសារព័ត៌មានសង្ខេបអំពីលទ្ធផលនៃការអនុវត្តបទឈប់បាញ់, លោកស្រីឧត្តមសេនីយ៍ឯក ម៉ាលី សុជាតា ក៏បានថ្លែងអំណរគុណដល់ភាគីថៃ ដែលបានបញ្ជូនកងទ័ពកម្ពុជាទាំង២រូបនេះ ត្រឡប់មកកម្ពុជាវិញ ខណៈថៃបន្ដគ្រប់គ្រងកងទ័ពកម្ពុជាចំនួន១៨នាក់ផ្សេងទៀត មិនទាន់បញ្ជូនមកវិញនៅឡើយទេ។

អ្នកនាំពាក្យក្រសួងការពារជាតិកម្ពុជា បានថ្លែងយ៉ាងដូច្នេះថា «កងកម្លាំងកម្ពុជាចំនួន២រូប ដែលបានអញ្ជើញមកដល់ទឹកដីកម្ពុជាវិញនៅពេលនេះ គឺរាជរដ្ឋាភិបាល ក្រសួងការពារជាតិ កងយោធពលខេមរភូមិន្ទ និងអ្នកពាក់ព័ន្ធទាំងអស់ បានត្រៀមខ្លួនរៀបចំជាក្រុមការងារ និងក្រុមគ្រូពេទ្យពិសេសទៅទទួលពួកគាត់នៅច្រកអូរស្មាច់។ មកដល់ពេលនេះ ក្រោមការយកចិត្តទុកដាក់ មើលថែយ៉ាងដិតដល់ជាទីបំផុត ទាំងសុខភាពផ្លូវការ និងសុខភាពផ្លូវចិត្តពីសំណាក់ក្រុមគ្រូពេទ្យ និងមានការចាត់ចែងដោយផ្ទាល់ពីសំណាក់ថ្នាក់ដឹកនាំ ដែលបាននិងកំពុងយកចិត្តទុកដាក់មើលថែព្យាបាលទៅលើបញ្ហាទាំងសុខភាពផ្លូវកាយ និងសុខភាពផ្លូវចិត្តរបស់ពួកគាត់ផងដែរ»។

បើតាមលោកស្រីឧត្តមសេនីយ៍ឯក ម៉ាលី សុជាតា, ក្រសួងការពារជាតិ និងកងយោធពលខេមរភូមិន្ទ នៅតែបន្ដអំពាវនាវម្ដងហើយម្ដងទៀតទៅភាគីថៃ សូមបញ្ជូនកងកម្លាំងកម្ពុជាចំនួន១៨រូបផ្សេងទៀត ប្រគល់មកកម្ពុជាវិញឲ្យបានឆាប់រហ័ស ដែលជាការគោរពទៅតាមគោលច្បាប់មនុស្សធម៌អន្ដរជាតិ។ ជាមួយគ្នានេះ កម្ពុជានឹងបន្ដចរចាឲ្យអស់លទ្ធភាពដើម្បីយកបងប្អូនរបស់យើងត្រឡប់មកវិញឲ្យបានឆាប់ ជាមួយនឹងសុវត្ថិភាពរបស់ពួកគាត់។

បន្ថែមពីនេះ អ្នកនាំពាក្យក្រសួងការពារជាតិកម្ពុជា ក៏បានទាមទារឲ្យអ្នកសារព័ត៌មាន និងបណ្ដាញសង្គមថៃ បញ្ឈប់ជាបន្ទាន់នូវការរាល់ការផ្សាយព័ត៌មានមិនពិត លាបពណ៌ បំផុសបំផុលដែលធ្វើឲ្យស្ថានភាពកាន់តែតានតឹងឡើង ភាពល្អក់កករឡើង ដែលមិនឆ្លុះបញ្ចាំងដល់ឆន្ទៈនៃប្រទេសទាំងពីរដែលកំពុងតែដោះស្រាយដោយសន្ដិភាព ដើម្បីនាំមកនូវសុខសន្ដិភាពជូនប្រជាជនទាំងសងខាង៕