(ភ្នំពេញ)៖ លោក ជុំ​ សុន្ទរី អ្នកនាំពាក្យការបរទេស និងសហប្រតិបត្តិការអន្តរជាតិ នៅរសៀលថ្ងៃទី១ ខែសីហា ឆ្នាំ២០២៥ បានថ្លែងក្នុងសន្និសីទសារព័ត៌មានស្ដីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ ថា កម្ពុជាបដិសេធការចោទប្រកាន់របស់ថៃដែលថា កម្ពុជាធ្វើសង្គ្រាមព័ត៌មាន ដែលនេះជាចេតនារបស់ថៃក្នុងការបង្វែរចំណាប់អារម្មណ៍របស់អន្តរជាតិប៉ុណ្ណោះ។

លោក ជុំ​ សុន្ទរី បានឱ្យដឹងថា ចំពោះការទូតរបស់កម្ពុជានៅលើឆាកអន្តរជាតិ គឺមានភាពត្រឹមត្រូវ សុចរិតភាព តម្លាភាព ដោយមិនមែនដូចការចោទប្រកាន់របស់ភាគីថៃនោះឡើយ។ កម្ពុជានឹងបន្តធ្វើកិច្ចការងារនេះជាមួយអាស៊ាន អង្គការសហប្រជាជាតិ និងជាមួយដៃគូសហការអន្តរជាតិនានា ដើម្បីទប់ស្កាត់ការកើនឡើងនូវភាពតានតឹង។

ចំពោះការលាបពណ៌របស់កាសែតថៃ ដែលបានលើកឡើងថា បទឈប់បាញ់ជាជោគជ័យរបស់ភាគីថៃ, អ្នកនាំពាក្យក្រសួងការបរទេសកម្ពុជា បានគូសបញ្ជាក់ថា បទឈប់បាញ់នេះជាការផ្ដួចផ្ដើមដោយលោកប្រធានប្ដូរវេនអាស៊ាន និងការយកចិត្តទុកដាក់ពីលោក ដូ ណាល់ត្រាំ ប្រធានាធិបតីសហរដ្ឋអាមេរិក និងកិច្ចខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជា សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលមិនមែនជាជោគជ័យរបស់ភាគីថៃនោះទេ។ ជាពិសេស កាសែតថៃ បានបន្តចោទប្រកាន់កម្ពុជាថាមិនគោរពបទឈប់បាញ់ ដែលចូលជាធរមានកាលពីយប់ម៉ោង១២និង០០នាទី រំលងអធ្រាតថ្ងៃទី២៨ ខែកក្កដា ឆ្នាំ២០២៥។

ក្នុងនាមក្រសួងការបរទេស, លោក ជុំ សុន្ទរី បានបដិសេធសារជាថ្មីចំពោះការចោទប្រកាន់របស់ភាគីថៃមកលើកម្ពុជា អំពីសង្គ្រាមព័ត៌មាន ដែលជាការប៉ុនប៉ងបង្វែរចំណាប់អារម្មណ៍របស់អន្តរជាតិពីសកម្មភាពដែលខ្លួនកំពុងតែធ្វើ។ ដោយឡែកកម្ពុជា គឺប្រកាន់ខ្ជាប់នូវការជូនព័ត៌មានដោយផ្អែកលើ ហើយស្វាគមន៍ការសង្កេតការជាអន្តរជាតិ និងឯករាជ្យនៅតាមតំបន់ដែលរងផលប៉ះពាល់ផ្នែកទាំងអស់នៅតាមបណ្ដោយព្រំដែន។

អ្នកនាំពាក្យក្រសួងការបរទេស បានគូសបញ្ជាក់ថា កម្ពុជាប្រកាន់ដំណោះស្រាយដោយសន្តិវិធី និងសន្តិភាពក្នុងតំបន់ កម្ពុជាទាមទារឱ្យថៃ បញ្ឈប់នូវវោហារ សាស្ត្រ ដែលមានលក្ខណៈប្រឈម និងគោរពកិច្ចព្រមព្រៀង ដោយឈរលើគោលការណ៍អន្តរជាតិ៕​