(ភ្នំពេញ)៖ អង្គការអន្តរជាតិហ្វ្រង់កូហ្វូនី (Francophonie) ឬគេស្គាល់ថា អង្គការក្រុមប្រទេសប្រើប្រាស់ភាសាបារាំង ដែលមានជាសមាជិក ៩៣ប្រទេសបានរំឮកឡើងវិញពីសារៈសំខាន់នៃច្បាប់អន្តរជាតិ នៅក្នុងការដោះស្រាយបញ្ហាដោយសន្តិវិធី និងអំពាវនាវឱ្យថៃមានការគោររព តាមសាលក្រមរបស់តុលាការយុត្តិធម៌អន្តរជាតិ ICJ ក្នុងឆ្នាំ១៩៦២ និងឆ្នាំ២០១៣ ពាក់ព័ន្ធនឹងបញ្ហាព្រំដែនរវាងកម្ពុជា និងថៃ។

នៅក្នុងសេចក្ដីថ្លែងការណ៍មួយ អគ្គលេខាធិការអង្គការអន្តរជាតិហ្វ្រង់កូហ្វូនី (OIF) លោកស្រី Louise Mushikiwabo បានបង្ហាញការសាទរចំពោះបទឈប់បាញ់រវាងកម្ពុជា និងថៃ។ «យើងសូមស្វាគមន៍ ដែលភាគីទាំងអស់ជ្រើសរើសយកកិច្ចសន្ទនាយ៉ាងលឿនរហ័ស និងការចូលរួមរបស់ពួកគេដើម្បីសន្តិភាព និងស្មារតីនៃកិច្ចសហប្រតិបត្តិការដែលមានសារៈសំខាន់ចំពោះស្ថិរភាពតំបន់»។ នេះជាការគូសបញ្ជាក់របស់លោកស្រី Louise Mushikiwabo។

លោកស្រីក៏បានជំរុញផងដែរឱ្យប្រទេសទាំង២អនុវត្តតាមបទឈប់បាញ់ឱ្យមានប្រសិទ្ធភាព ដើម្បីបោះជំហានដ៏សំខាន់ឆ្ពោះទៅរកសន្តិភាពយូរអង្វែង ហើយនៅក្នុងបរិបទនេះ លោកស្រីសូមបង្ហាញសាមគ្គីភាព យ៉ាងពេញលេញរបស់លោកស្រីជាមួយកម្ពុជា ដែលនឹងធ្វើជាម្ចាស់ផ្ទះរៀបចំកិច្ចប្រជុំកំពូលរបស់អង្គការអន្តរជាតិហ្វ្រង់កូហ្វូនីលើកទី២០ នៅឆ្នាំ២០២៦៕