(ភ្នំពេញ)៖ ក្នុងឱកាសធ្វើសន្និសីទសង្ខេបព័ត៌មានស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» គិតត្រឹមម៉ោង០៤រសៀលថ្ងៃទី០១ ខែសីហា ឆ្នាំ២០២៥នេះ លោក ជុំ សន្ទរី អ្នកនាំពាក្យក្រសួងការបរទេស និងសប្រតិបត្តិការអន្តរជាតិកម្ពុជា បានបដិសេធយ៉ាងម៉ឺងម៉ាត់ចំពោះការលើកឡើងដោយគ្មានមូលដ្ឋាន និងមានលក្ខណៈបំភាន់របស់ក្រសួងការបរទេសថៃ កាលពីថ្ងៃទី៣១ ខែកក្កដា ឆ្នាំ២០២៥ ជាមួយអ្នកសារព័ត៌មានថា កម្ពុជាអ្នកបាញ់មុន ហើយថៃបានប្រើប្រាស់នូវសិទ្ធិស្វ័យការពារ។

លោកចាត់ទុកថា ការលើកឡើងបែបនេះគឺជាការបំភាន់ការពិត។ កម្ពុជា សូមគូសបញ្ជាក់ជាថ្មីម្តងទៀតថា ការប៉ះទង្គិចប្រដាប់អាវុធ ដែលកើតមានឡើងកាលពីថ្ងៃទី២៨ ខែឧសភា ឆ្នាំ២០២៥ កន្លងមកនេះ គឺចាប់ផ្តើមឡើងដោយកងទ័ពរបស់ថៃ បើកការបាញ់ប្រហារទៅលើកងទ័ពកម្ពុជា ដែលកំពុងឈរជើង នៅក្នុងទឹកដីរបស់កម្ពុជា ពុំមែនជាការឈ្លានពានរបស់កម្ពុជា ទៅលើថៃនោះឡើយ។ ការលើកឡើងរបស់ថៃ ដែលថាប្រើសិទ្ធិស្វ័យការពារ គ្រាន់តែលាក់បាំងសកម្មភាពបង្ករឿងដោយយោធាថៃតែប៉ុណ្ណោះ។

លោក ជុំ សន្ទរី បានថ្លែងថា ក្រសួងការបរទេស និងសហប្របត្តិការអន្តរជាតិកម្ពុជា សូមធ្វើការបដិសេធ យ៉ាងម៉ឺងម៉ាត់ទៅនឹងការលើកឡើងដោយគ្មានមូលដ្ឋាន ហើយមានលក្ខណៈជាការបំភាន់មតិ ដែលបានលើកឡើងក្នុងកិច្ចប្រជុំជាមួយអ្នកសារព័ត៌មាន របស់ក្រសួងការបរទេសថៃ នៅថ្ងៃទី៣១ ខែកក្កដា ឆ្នាំ២០២៥។ កម្ពុជា សូមធ្វើការអះអាងជាថ្មីម្តងទៀត នូវការប្រកាន់ខ្ជាប់របស់ខ្លួនចំពោះច្បាប់អន្តរជាតិ និងគោលការណ៍សន្តិវិធី ក៏ដូចជាយន្តការដែលដឹកនាំដោយអាស៊ាន។

ជាមួយគ្នានេះដែរ លោក ជុំ សន្ទរី បានបញ្ជាក់ថា៖ «ក្រសួងការបរទេស និងសហប្រតិបត្តិការអន្តរជាតិកម្ពុជា សូមបំភ្លឺថា ការលើកឡើងរបស់ភាគីថៃ អំពីស្វ័យការពារ គឺជាការបំភាន់ការពិត។ កម្ពុជាសូមគូសបញ្ជាក់ជាថ្មីម្តងទៀតថា ការប៉ះទង្គិចប្រដាប់ងាវុធ ដែលកើតមានឡើងកាលពីថ្ងៃទី២៨ ខែឧសភា ឆ្នាំ២០២៥ កន្លងមកនេះ គឺចាប់ផ្តើមឡើងដោយកងទ័ពរបស់ថៃ បើកការបាញ់ប្រហារទៅលើកងទ័ពកម្ពុជា ដែលកំពុងឈរជើង នៅក្នុងទឹកដីរបស់កម្ពុជា ពុំមែនជាការឈ្លានពានរបស់កម្ពុជា ទៅលើថៃនោះឡើយ»។

ជាមួយគ្នានេះដែរ អ្នកនាំពាក្យក្រសួងការបរទេសកម្ពុជា បានបន្ថែមថា ការលើកឡើងរបស់ថៃ អំពីស្វ័យការពារវាគ្រាន់តែជាការបិទបាំងនូវសកម្មភាពបង្ករឿងរបស់យោធាថៃ តែប៉ុណ្ណោះ។

អ្នកនាំពាក្យក្រសួងការបទេសកម្ពុជា បានគូសបញ្ជាក់ថា ការលើកឡើងរបស់ភាគីថៃ អំពីការធ្វើអន្តរជាតិតូបនីយកម្ម ដើម្បីបំភាន់ការពិតរបស់កម្ពុជា, ក្រសួងករបរទេស និងសហប្រតិបត្តិការអន្តរជាតិកម្ពុជា សូមគូសបញ្ជាក់ថា សកម្មភាព និងការខិតខំប្រឹងប្រែងផ្នែកការទូតរបស់កម្ពុជា គឺមានភាពត្រឹមត្រូវសមស្របទៅតាមច្បាប់។ ចំពោះសកម្មភាពរបស់កម្ពុជា នៅអង្គការសហប្រជាជាតិ គឺធ្វើឡើងដោយសូចចិត្ត ដើម្បីតម្លាភាព និងការត្រួតពិនិត្យជាពហុភាគី ពុំមែនជាការធ្វើអន្តរជាតិតូបនីយកម្ម ដើម្បីបំភាន់មតិអន្តរជាតិ ដូចការចោទប្រកាន់ពីសំណាក់ភាគីថៃនោះឡើយ។

អ្នកនាំពាក្យក្រសួងការបរទេស បានថ្លែងថា កម្ពុជា ប្តេជ្ញាចិត្តធ្វើការជាមួយសមាជិកអាស៊ាន អង្គការសហប្រជាជាតិ និងបណ្តាដៃគូអន្តរជាតិនានា ដើម្បីទប់ស្កាត់ ការកើនឡើងនូវភាពតាន់តឹង៕