(សៀមរាប)៖ លោក គង់ វិមាន អគ្គលេខាធិការក្រុមប្រឹក្សាអភិវឌ្ឍន៍កម្ពុជាតំណាងលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅប៉ុន្មានថ្ងៃនេះ បានបន្តដឹកនាំក្រុមការងារ ចុះសួរសុខទុក្ខ និងនាំយកថវិកាជូនកងទ័ព និងពលរដ្ឋរងគ្រោះ ដោយសារទ័ពថៃ ដែលកំពុងសម្រាកព្យាបាលនៅមន្ទីរពេទ្យខេត្ដសៀមរាប និងខេត្តឧត្តរមានជ័យ។

ក្នុងឱកាសនោះ ក្នុងនាមឧបនាយករដ្ឋមន្ត្រី ស៊ុន ចាន់ថុល, លោក គង់ វិមាន សូមគោរពដឹងគុណចំពោះសម្តេចតេជោ ហ៊ុន សែន ប្រធានព្រឹទ្ធសភា, សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានខិតខំប្រឹងប្រែងយកចិត្តទុកដាក់ ជាមួយប្រជាពលរដ្ឋ ដែលកំពុងភៀសសឹករាប់ម៉ឺនគ្រួសារ និងបងប្អូនកងទ័ព នៅតាមបន្ទាន់ព្រំដែន។

លោក គង់ វិមាន បានកត់សម្គាល់ថា អាកាសធាតុនាពេលបច្ចុប្បន្ន ហាក់មានការក្ដៅ ហើយអ្វីដែលទទួលបានពីយោធា និងប្រជាពលរដ្ឋនៅតាមបន្ទាត់ព្រំដែន ពាក់ព័ន្ធនឹងផ្សែងពុល ដែលបង្កឡើងដោយកងទ័ពថៃ បានបាញ់ចូលមកទឹកដីកម្ពុជា​ នាពេលកន្លងមក។

ជាមួយគ្នានេះ លោក គង់ វិមាន សូមអំពាវនាវប្រជាពលរដ្ឋ ចុះសួរសុខទុក្ខប្រជាពលរដ្ឋ ដែលកំពុងធ្វើការភៀសសឹក នៅតាមបន្ទាន់ព្រំដែន មានការប្រុងប្រយ័ត្នខ្ពស់ ចំពោះបញ្ហាសុខភាព ដោយត្រូវពាក់ម៉ាស់ និងប្រុងប្រយ័ត្ន ចំពោះតំបន់ហាមឃាត់ ព្រោះថា បច្ចុប្បន្នអង្គការស៊ីម៉ាក់ កំពុងធ្វើការត្រួតពិនិត្យ នៅក្នុងតំបន់មួយចំនួន។

បន្ថែមពីនោះទៀតលោក គង់ វិមាន បានលើកឡើងថា ក្នុងករណីមានភ្លៀងធ្លាក់ វានឹងធ្វើឲ្យប៉ះដល់ស្លឹកឈើ ហើយវានឹងហូរមកនៅតំបន់ ដែលយើងប្រើប្រាស់ ដូច្នេះសូមឲ្យមានការប្រុងប្រយ័ត្នឲ្យបានខ្ពស់ ជៀសវាងមានគ្រោះថ្នាក់ណាមួយកើតឡើង ដែលប៉ះពាល់ដល់សុខភាព របស់បងប្អូនប្រជាពលរដ្ឋ។

លោក គង់ វិមាន ក៏បានស្នើអាជ្ញាធរមានសមត្ថកិច្ច ធ្វើការត្រួតពិនិត្យ និងពង្រាយកម្លាំង នៅតាមមូលដ្ឋាន ជាពិសេសកន្លែងដែលកងទ័ពថៃ ឈ្លានពាន បានធ្វើការបាញ់ប្រហារមកលើទឹកដីកម្ពុជា ដោយប្រើប្រាស់អាវុធធុនធ្ងន់ ដែលខុសពីច្បាប់អន្ដរជាតិ៕