(ព្រះវិហារ)៖ លោក កែវ ផុង ជំនួយការផ្ទាល់សម្តេចតេជោ ហ៊ុន សែន និងជាប្រធានក្រុមសេនាតេជោសន្តិភាព ព្រមទាំងសមាជិកសជិកា នៅថ្ងៃទី៣០-៣១ ខែកក្កដា​ ឆ្នាំ២០២៥ បាននាំយកអំណោយរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត យកទៅចែកជូនបងប្អូនយុទ្ធជនឈរជើងនៅសមរភូមិជួរមុខរួមមាន៖ ប្រាសាទតាមន្តធំ ប្រាសាទតាក្របី មុំ៣ ភ្នំខ្មោច តាថាវ បុស្បូវ និងជនភៀសសឹក ដែលស្នាក់នៅ វត្តសិលារាម ស្ថិតភូមិឯកភាព សង្កាត់ប៉ាល់ហាល ក្រុងព្រះវិហារ។

នាឱកាសនោះ លោក កែវ ផុង បានផ្តាំផ្ញើដល់បងៗកងទ័ព សូមមានការប្រុងប្រយ័ត្នខ្ពស់ ត្រៀមលក្ខណៈជានិច្ច ព្រោះសត្រូវមិនឲ្យយើងបានសុខឡើយ មានតែយើងរឹងមាំខ្លួនឯងប៉ុណ្ណោះ ទើបយើងអាចការពារទឹកដីយើង មិនឲ្យបាត់បង់ឡើយ។

លោកបានផ្តាំផ្ញើការសួរសុខទុក្ខពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ដែលតែងតែគិតគូយ៉ាងជាប់ជាប្រចាំចំពោះបងយុទ្ធជនការពារទឹកដីនៅសមរភូមិ និងបងប្អូនជនភៀសសឹក ហើយបានជួយឧបត្ថម្ភជាបន្តបន្ទាប់។

ជាមួយគ្នានោះ ទាហានជួរមុខ និងជនភៀសសឹក បានថ្លែងអំណរគុណយ៉ាងជ្រាលជ្រៅបំផុតចំពោះទឹកចិត្តក្រុមសេនាតេជោសន្តិភាព តែងតែបានឧបត្ថម្ភ ជូនកងពលតូចអន្តរាគមន៍លេខ១២៨កន្លងមក ហើយនៅពេលនេះ ខណៈដែលកងទ័ពយើង កំពុងប្រឈមមុខជាមួយសត្រូវឈ្លានពាន ក្រុមសេនាតេជោសន្តិភាព បានបន្តដឹកជញ្ជូនគ្រឿងឧបភោគបរិភោគជាច្រើនមុខ មកជួយឧបត្ថមបន្ថែមទៀត។ ទឹកចិត្តបងប្អូនប្រជាពលរដ្ឋ គឺជាកម្លាំងចិត្តដ៏ធំធេង នៅពីក្រោយពួកយើងខ្ញុំទាំងអស់គ្នា។ យើងខ្ញុំទាំងអស់គ្នា សូមប្តេជ្ញាការពារដែនអធិបតេយ្យភាព បូរណភាពទឹកដីកម្ពុជាអោយបានគង់វង្ស៕