Fresh Exclusive: ដូណាល់ ត្រាំ កែគ្រោះប្រែជាលាភដល់កម្ពុជា «ពន្ធចុះ សង្គ្រាមស្ងប់ រាស្រ្តរីករាយ»

01-08-2025 18:11

(ភ្នំពេញ)៖ សង្គ្រាម៥ថ្ងៃ តាមបណ្តោយព្រំដែនកម្ពុជា-ថៃ ទោះបានក្លាយជាមេរៀន និងជាបទពិសោធន៍សម្រាប់អនាគតរបស់កម្ពុជាពិតមែនក៏ដោយ ប៉ុន្តែក៏បានបើកផ្លូវឱ្យកម្ពុជាមានសំណាងថ្មីមួយដែរ។ ប្រធានាធិបតី ដូណាល់ ត្រាំ កំពុងកែបម្លែងគ្រោះឧបសគ្គ ជាលាភធំ ដោយធ្វើឱ្យអត្រាពន្ធធ្លាក់ចុះ សំឡេងអាវុធស្ងប់ស្ងាត់ និងប្រជាជនកម្ពុជា បានរស់នៅក្នុងសេចក្តីរីករាយសាឡើងវិញ។

Fresh Exclusive មានអត្ថបទស៊ីជម្រៅជុំវិញបញ្ហានេះ៖

នៅពេលដែលពិភពលោកទាំងមូល កំពុងមើលឃើញភាពតានតឹងនានា ដែលបាននិងកើតឡើងក្នុងតំបន់អាស៊ីអាគ្នេយ៍ ប្រទេសកម្ពុជា ក៏បានស្ថិតក្នុងផ្លូវដើរមួយប្រកបដោយគ្រោះថ្នាក់ផងដែរ ក្នុងនោះរួមមានទាំងជម្លោះហិង្សានៅតាមបណ្តោយព្រំដែនផង និងអត្រាពន្ធសេដ្ឋកិច្ចដ៏ខ្ពស់ពីសហរដ្ឋអាមេរិកថែមទៀត។

ប៉ុន្តែព្រឹត្តិការណ៍ថ្មី នៅដើមខែសីហា ឆ្នាំ២០២៥ ស្រាប់តែបានបើកសំឡេងសង្ឃឹមថ្មីដល់ប្រទេសកម្ពុជា បន្ទាប់ពីប្រធានាធិបតីអាមេរិក លោក ដូណាល់ ត្រាំ បានសម្រេចបញ្ចុះអត្រាពន្ធលើទំនិញនាំចូលពីកម្ពុជាចុះដល់ត្រឹម១៩% ព្រមទាំងធ្វើអន្តរាគមន៍ដោយផ្ទាល់ដើម្បីបញ្ចប់ការបាញ់ប្រហារនៅព្រំដែនកម្ពុជា-ថៃ ថែមទៀត។ បន្ទាប់ពីប្រធានាធិបតីអាមេរិកលោក ដូណាល់ ត្រាំ សម្រេចបញ្ចុះអត្រាពន្ធលើទំនិញនាំចូលពីកម្ពុជាចុះដល់ត្រឹម១៩% ព្រមទាំងអន្តរាគមន៍ផ្ទាល់ ដើម្បីបញ្ចប់ការបាញ់ប្រហារនៅព្រំដែនកម្ពុជា-ថៃ, ព្រឹត្តិការណ៍នេះបានបង្កើតសេចក្តីសង្ឃឹម និងសេចក្តីរីករាយដ៏ជ្រាលជ្រៅក្នុងដួងចិត្តប្រជាពល រដ្ឋខ្មែរ។

សេចក្តីសម្រេចរបស់ប្រធានាធិបតី ដូណាល់ ត្រាំ បានផ្លាស់ប្តូរបរិយាកាសនយោបាយ និងសេដ្ឋកិច្ចកម្ពុជា ឲ្យកាន់តែមានស្ថេរភាពសាឡើងវិញ។ វាមិនត្រឹមតែជាការជួយបញ្ចប់អំពើឈ្លានពាននៅតំបន់ព្រំដែនកម្ពុជាប៉ុណ្ណោះទេ ប៉ុន្តែទំនិញកម្ពុជានៅទីផ្សារអាមេរិកក៏ទទួលបានពន្ធបញ្ចុះយ៉ាងច្រើន បើប្រៀបធៀបពី៣៦% មកត្រឹម១៩%។ នេះក្លាយជាលទ្ធផលល្អឥតខ្ចោះសម្រាប់ប្រទេសតូចមួយដែលទើបតែចាប់ផ្តើមស្ដារឡើងវិញ បន្ទាប់ពីដំណើរឆ្លងកាត់របត់នៃអតីតកាលសង្គ្រាមស៊ីវិល និងការចាប់ផ្តើមមានសន្តិភាពពិតប្រាកដតាមរយៈនយោបាយឈ្នះឈ្នះ របស់សម្តេចអគ្គមហាសេនាបតីតេជោ ហ៊ុន សែន ដែលបញ្ចប់សង្គ្រាមស៊ីវិល និងការឯកភាពទឹកដីជាតិទាំងស្រុងចាប់តាំងពីចុងឆ្នាំ១៩៩៨នោះមក។

លទ្ធផលដែលជាតិ និងប្រជាជនកំពុងទទួលបាននេះ កើតឡើងក្រោមការដឹកនាំដ៏សកម្មនិងឈ្លាសវៃរបស់រាជរដ្ឋាភិបាលអាណ្ណត្តិទី៧បន្តវេន ជាពិសេសសម្តេចមហាបវរធិបតី ហ៊ុន ម៉ាណែត ដែលបានប្រើប្រាស់ទាំងឆន្ទៈនយោបាយ និងភាពប្រាស្រ័យទំនាក់ទំនងផ្ទាល់ជាមួយប្រធានាធិបតីអាមរិក លោក ដូណាល់ ត្រាំ។ កិច្ចសន្ទនាតាមទូរសព្ទនៅថ្ងៃទី២៦និង២៨ ខែកក្កដាពេលនោះ បានបើកផ្លូវឲ្យកម្ពុជានូវក្តីសង្ឃឹមថា សហរដ្ឋអាមេរិកនឹងពិចារណាកាត់បន្ថយអត្រាពន្ធដ៏ធ្ងន់ធ្ងរចេញពីកម្ពុជា។ ហើយក្តីសង្ឃឹមនោះ ទីបំផុតក៏បានក្លាយជាការពិតនៅថ្ងៃទី១ ខែសីហា ឆ្នាំ២០២៥ ដោយសហរដ្ឋអាមេរិក បានប្រកាសសម្រេចទម្លាក់អត្រាពន្ធបដិកាសម្រាប់ការនាំចូលទំនិញពីកម្ពុជាពី៣៦% មកនៅ១៩%។ អត្ថប្រយោជន៍នេះគឺជាចំណុចចាប់ផ្តើមនៃការប្រកួតប្រជែងលើទីផ្សារអន្តរជាតិវិញ និងការរក្សាការងារជាច្រើននៅរោងចក្រ។

សម្តេចបវរធិបតី បានសរសេរលើបណ្តាញសង្គមនៅថ្ងៃទី១ ខែសីហា បញ្ជាក់នូវ៖ « អំណរគុណ ដល់ឯកឧត្តមប្រធានាធិបតី Donald Trump ដែលបានផ្ដល់នូវការយោគយល់សម្រាប់កម្ពុជាដោយសម្រេចបញ្ចុះពន្ធលើទំនិញនាំចេញពីកម្ពុជាទៅកាន់សហរដ្ឋអាមេរិក មកត្រឹម១៩% បន្ថែមពីលើការយកចិត្តទុកដាក់ដោយផ្ទាល់របស់ឯកឧត្តម នៅក្នុងការផ្ដួចផ្ដើម និងជំរុញឲ្យមានការឈប់បាញ់គ្នារវាងកងទ័ពកម្ពុជា និងកងទ័ពថៃ និងបន្តតាមដានការអនុវត្តបទឈប់បាញ់ដោយផ្ទាល់រហូតដល់មានសន្តិភាព»

បើប្រៀបធៀប នឹងប្រទេសជាច្រើននៅលើសកលលោក កម្ពុជាកំពុងទទួលបានការបញ្ចុះពន្ធ ដែលល្អជាងគេគួរឱ្យកត់សម្គាល់។ ការបញ្ចុះអត្រាពន្ធនេះ វាមិនត្រឹមតែជួយសន្សំសំចៃសម្រាប់អ្នកទិញទំនិញនៅអាមេរិកប៉ុណ្ណោះទេ វាក៏ជាឧបករណ៍សង្គ្រោះសេដ្ឋកិច្ចសម្រាប់ប្រទេស និងពលរដ្ឋខ្មែរ ដើម្បីការពារការងារបង្កើនប្រាក់ចំណូល និងបង្កើតសន្តិភាពសេដ្ឋកិច្ចយូរអង្វែងថែមទៀត។ វាមានន័យថា អ្នកវិនិយោគអន្តរជាតិ មានជម្រើសថ្មីសម្រាប់ការបណ្តាក់ទុកផលិតកម្មនៅក្នុងប្រទេសខ្មែរ ដែលមានអាកាសធាតុ និងកត្តាវិនិយោគអំណោយផល និងដំណើរសេដ្ឋកិច្ចឧស្សាហកម្មក៏កំពុងរីកចម្រើនថែមទៀត។

* កម្ពុជា ត្រូវបង្កើនជំហានវិនាទីមាស

បន្ទាប់ពីសហរដ្ឋអាមេរិក បានបញ្ចុះពន្ធដល់ត្រឹម១៩% កម្ពុជានឹងអាចមានឱកាសដ៏សំខាន់ក្នុងការប្រែប្រួលសេដ្ឋកិច្ចជាតិឱ្យរីកចម្រើនលឿនជាងមុន។ ដើម្បីទទួលផលឱ្យបានជាអតិបរមា នាពេលវេលា ដែលគេបានមើលឃើញថាជា «វិនាទីមាស» នោះ កម្ពុជានឹងរំពឹងការលើការពង្រឹងសមត្ថភាពផលិត និងគុណភាពទំនិញ ជាពិសេសការអនុវត្តស្តង់ដាអន្តរជាតិ ដើម្បីធានាថាទំនិញកម្ពុជា ជាទំនិញមានគុណភាពល្អ និងប្រកួតប្រជែងនៅលើទីផ្សារអាមេរិក, កម្ពុជា នឹងមានឱកាសចរចាកិច្ចព្រមព្រៀងពាណិជ្ជកម្មថ្មីដោយប្រើប្រាស់ទំនាក់ទំនងល្អក្នុងវិនាទីមាសនេះ ជាមួយសហរដ្ឋអាមេរិកជាបន្ថែមទៀត។ កម្ពុជា ក៏អាចពង្រីកជំហានដូចគ្នានេះ ជាមួយសហភាពអឺរ៉ុប កាណាដា និងអូស្ត្រាលី ដើម្បីបន្ថែមទីផ្សារនាំចេញ ដោយមិនអាស្រ័យទៅលើទីផ្សារតែមួយឡើយ។ កម្ពុជា អាចប្រើប្រាស់អត្រាពន្ធថ្មីនេះ ជាឧបករណ៍ទាក់ទាញវិនិយោគិនបង្កើតរោងចក្រ និងបង្កើនការងារក្នុងប្រទេស, ផ្តល់ការធានាសុវត្ថិភាព និងលក្ខណៈអំណោយផលសម្រាប់ការវិនិយោគ, ការកសាងកម្មវិធីបណ្តុះបណ្តាលថ្មីសម្រាប់វិស័យផលិតកម្មដូចជាការបំពាក់បច្ចេកវិទ្យា IT, កសិកម្មឆ្លាតវៃ ដើម្បីឆ្លើយតបនឹងតម្រូវការទីផ្សារអាមេរិកជាដើម។

* ប្រើវិនាទីមាស រក្សានិងពង្រឹងសន្តិភាពព្រំដែន

បន្ថែមពីទង្វើជួយបញ្ចុះពន្ធនេះ, ការជួយអន្តរាគមន៍របស់ប្រធានាធិបតីអាមេរិក ក្នុងវិបត្តិព្រំដែនកម្ពុជា-ថៃ ក៏បាននាំឱ្យកិច្ចព្រមព្រៀងឈប់បាញ់គ្នាថែមទៀត តាមរយៈការរៀបចំជួបចរចាទល់មុខគ្នារវាងនាយករដ្ឋមន្ត្រីកម្ពុជា និងនាយករដ្ឋមន្ត្រីថៃស្តីទី នៅក្នុងប្រទេសម៉ាឡេស៊ី នៅថ្ងៃទី២៨ ខែកក្កដា ឆ្នាំ២០២៥។ គិតត្រឹមថ្ងៃទី២ ខែសីហា ឆ្នាំ២០២៥ ភាពស្ងប់ស្ងាត់នៃសំឡេងអាវុធនៅតំបន់ព្រំដែន មានរយៈពេលបួនថ្ងៃហើយ ដែលជាលទ្ធផលនៃទង្វើអន្តរាគមន៍ដ៏ម៉ឺងម៉ាត់របស់ប្រធានាធិបតីសហរដ្ឋអាមេរិក ដែលបានទប់ស្កាត់ការបាត់បង់ជីវិតមនុស្សដោយសារសង្គ្រាម។ កិច្ចព្រមព្រៀងឈប់បាញ់នេះ បានបើកផ្លូវឱ្យពលរដ្ឋភៀសសឹកអាចវិលត្រឡប់ទៅភូមិការរបស់ពួកគេវិញ ដើម្បីបន្តជីវិតប្រចាំថ្ងៃដោយសុវត្ថិភាព និងសង្ឃឹមថ្មី។ ស្នាមញញឹម និងសំឡេងរីករាយ បានវិលត្រឡប់មកវិញ នៅតាមតំបន់ភាគខាងជើង និងភាគខាងលិចប្រទេស ដែលមនុស្សទាំងឡាយកំពុងតែមានក្តីជឿជាក់ថា សំឡេងអាវុធ នឹងមិនមានសាជាថ្មីទៀតឡើយ ក្រោមការជួយធ្វើអន្តរាគមន៍ដោយផ្ទាល់ពីប្រធានាធិបតីអាមេរិក លោក ដូណាល់ ត្រាំ នោះ។

សម្តេចបវរធិបតី ហ៊ុន ម៉ាណែត បានសរសេរបន្តនៅលើបណ្តាញសង្គមថា៖ « ខ្ញុំសូមអរគុណឯកឧត្តមប្រធានាធិបតី Donald Trump ដែលឯកឧត្តមបានយកចិត្តទុកដាក់ដោយផ្ទាល់ នៅក្នុងការផ្ដួចផ្ដើមនិងជំរុញឲ្យមានការឈប់បាញ់គ្នារវាងកងទ័ពកម្ពុជានិងកងទ័ពថៃ និងបន្តតាមដានការអនុវត្តបទឈប់បាញ់ដោយផ្ទាល់ រហូតដល់មានសន្តិភាពជាអចិន្ត្រៃយ៍និងប្រក្រតីភាពនៃទំនាក់ទំនងរវាងកម្ពុជា-ថៃ នៅពេលខាងមុខ »

ដូច្នេះក្នុងវិនាទីមាស ដែលកម្ពុជាកំពុងទទួលបាននេះ កម្ពុជានឹងបន្តការចរចាសន្តិភាព ដោយសហការជាមួយអាស៊ាន សហរដ្ឋអាមេរិក សាធារណរដ្ឋប្រជាមានិតចិន និងប្រទេសធំក្នុងតំបន់ដើម្បីធានាច្បាស់លាស់រកការឈប់បាញ់គ្នាជាមួយថៃ ក្នុងភាពស្ថិតស្ថិរ និងអចិន្ត្រៃយ៍។

ការជួយអន្តរាគមន៍ របស់ប្រធានាធិបតី ដូណាល់ ត្រាំ មិនត្រឹមតែបានផ្លាស់ប្តូរបរិយាកាសនយោបាយ និងសេដ្ឋកិច្ចកម្ពុជា ឲ្យមានស្ថិរភាពឡើងវិញប៉ុណ្ណោះទេ ប៉ុន្តែក៏ជាការជួយពង្រឹងចក្ខុវិស័យឆ្នាំ២០៥០របស់កម្ពុជា ដើម្បីក្លាយជាប្រទេសមានចំណូលខ្ពស់ថែមទៀត។ ការបញ្ចុះពន្ធដ៏សំខាន់នេះ និងការបញ្ចប់សង្គ្រាមព្រំដែន អាចនិយាយបានថា វាជា «សំណាងមាស» ដែលអាចបង្ហាញផ្លូវដល់កម្ពុជា ក្នុងការផ្លាស់ប្តូរពីប្រទេសអភិវឌ្ឍន៍កម្រិតទាបទៅជាប្រទេសសេដ្ឋកិច្ចខ្ពស់មួយនៅក្នុងតំបន់។

ក្នុងប្រវត្តិសាស្ត្រដែលពោរពេញដោយទុក្ខវេទនារបស់កម្ពុជា ការជួយកែគ្រោះ ប្រែជាលាភដល់កម្ពុជា ក្នុងពេលនេះ គឺជាការជួយជម្រុញដំណើរជាតិទៅរកសេចក្តីសង្ឃឹមថ្មី។ កម្ពុជានឹងប្តេជ្ញាប្រើប្រាស់ឱកាសនេះ ដើម្បីបង្កើនប្រសិទ្ធភាពសេដ្ឋកិច្ចជាតិ ស្របតាមការដាក់ចេញនូវចក្ខុវិស័យរបស់រាជរដ្ឋាភិបាលសម្រាប់ឆ្នាំ២០៥០។ តាមរយៈការជួយឱ្យពន្ធចុះ សង្គ្រាមស្ងប់ រាស្ត្ររីករាយ ជាមួយនឹងក្តីសង្ឃឹមក្លាយជាប្រទេសមានប្រាក់ចំណូលខ្ពស់ក្នុងឆ្នាំ២០៥០ទៀតនោះ ប្រជាពលរដ្ឋខ្មែរ ត្រូវរួមគ្នារុញសុបិន្តនៃសំណាងមាសរបស់កម្ពុជានេះឱ្យក្លាយជាការពិត ។ ពេលនេះ គឺជាពេលវេលាដែលប្រជាជនកម្ពុជា រំពឹងអាចដកដង្ហើមស្រួល និងរីករាយ ពីព្រោះគ្រោះអាសន្ន ត្រូវបានបម្លែងជាលាភដ៏មានតម្លៃសម្រាប់ជីវិតពួកគេហើយ៕