(ភ្នំពេញ)៖ ជំរុញដោយស្មារតីនៃការទំនួលខុសត្រូវ សង្គមនិងសាមគ្គីភាពជាតិ សមាគមមូលនិធិគ្រួសារខ្មែរ(KHCA) និង Cambodia My Second Home (CM2H) បានអនុវត្តគម្រោងចិត្តសប្បុរសចំនួនពីរដោយមោទនភាព ដែលមានគោលបំណងលើកកម្ពស់សហគមន៍ពិសេសពីរនៅកម្ពុជា អ្នកដែលស្លៀកឯកសណ្ឋាន និងអ្នកដែលត្រូវការជំនួយ។

កាលពីព្រឹកថ្ងៃទី ២៦ ខែកក្កដា សមាគមមូលនិធិគ្រួសារខ្មែរ បានសម្តែងការដឹងគុណជាអនេកចំពោះកងទ័ពជួរមុខ ដែលកំពុងឈរជើងការពារបូរណភាពទឹកដីកម្ពុជា ដោយបរិច្ចាគឱសថសំខាន់ៗចំនួន ១១ប្រភេទ ខ្ចប់ក្នុងប្រអប់ធំចំនួន ៦៩ ជូនទៅក្រសួងមហាផ្ទៃ។ ការបរិច្ចាគនេះត្រូវបានទទួលដោយឯកឧត្តម អ៊ូ វណ្ណា អនុរដ្ឋលេខាធិការ និងជានាយករងខុទ្ទកាល័យប្រចាំការ ដែលតំណាងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

នាថ្ងៃបន្ទាប់ ថ្ងៃទី ២៧ ខែកក្កដា សមាគមមូលនិធិគ្រួសារខ្មែរ និង Cambodia My Second Home បានបន្តបេសកកម្មសប្បុរសរបស់ខ្លួនដោយសហការរៀបចំព្រឹត្តិការណ៍សប្បុរសធម៌ ដោយនាំមកនូវភាពរីករាយនិងជំនួយប្រកបដោយអត្ថន័យដល់កុមារកំព្រាជាង ២០០ នាក់។ រាប់ចាប់ពីការបរិច្ចាគដ៏មានតម្លៃ ការទទួលទានអាហាររួមគ្នា ល្បែងសប្បាយៗ និងភាពសប្បាយរីករាយ ព្រឹត្តិការណ៍នេះបានបង្កើតបរិយាកាសកក់ក្តៅនិងបរិយាប័ន្ន ដែលកុមារគ្រប់រូបមានអារម្មណ៍ថាពួកគេមានតម្លៃនិងទទួលបានក្តីស្រឡាញ់។

សម្រាប់សមាគមមូលនិធិគ្រួសារខ្មែរ(KHCA) និង Cambodia My Second Home (CM2H) កិច្ចខិតខំប្រឹងប្រែងទាំងនេះមិនមែនគ្រាន់តែជាសកម្មភាពសប្បុរសធម៌ប៉ុណ្ណោះទេ វាជាការឆ្លុះបញ្ចាំងពីការប្តេជ្ញាចិត្តជាបន្តបន្ទាប់ដើម្បីរួមចំណែកយ៉ាងសំខាន់ដល់ការអភិវឌ្ឍន៍និងសុខុមាលភាពសង្គមរបស់កម្ពុជា ហើយការចូលរួមឧបត្ថម្ភថវិការបស់សមាគម គឺជាការចូលរួមចំណែកលើកទឹកចិត្តដល់កងទ័ពកម្ពុជាដ៏អង់អាចក្លាហានរបស់កម្ពុជា ដែលកំពុងឈរជើងជាប់ជាប្រចាំដើម្បីការពារបូរណភាពទឹកដី នៅតាមបណ្តោយព្រំដែនកម្ពុជា-ថៃ។

ឆ្លៀតឱកាសនេះ យើងខ្ញុំសូមបួងសួងដល់ ទេវតារក្សាទឹកដីនៃព្រះរាជាណាចក្រកម្ពុជា បុព្វបុរសខ្មែរគ្រប់ព្រះអង្គ និងវត្ថុសក្តិសិទ្ធិក្នុងលោក សូមតាមថែរក្សាការពារកងទ័ពកម្ពុជារបស់យើង ឱ្យជួបប្រទះតែសេចក្តីសុខ ជៀសផុតពីជំងឺដង្កាត់ទាំងឡាយ ហើយឈ្នះអស់ខ្មាំងសត្រូវ៕⁩