(វ៉ាស៊ីនតោន)៖ មន្ត្រីសេតវិមានម្នាក់កាលពីថ្ងៃព្រហស្បតិ៍ ទី៣១ ខែកក្កដា បានអំពាវនាវពានរង្វាន់ណូបែលសន្តិភាពសម្រាប់លោក ដូណាល់ ត្រាំ ដោយនិយាយថាលោកប្រធានាធិបតីអាមេរិក បានជួយសម្រេចបានជាមធ្យមនូវកិច្ចព្រមព្រៀងសន្តិភាពមួយ ក្នុងរយៈពេលមួយខែ អំឡុងរយៈពេល៦ខែនៃការឡើងកាន់អំណាចរបស់លោក។ អ្នកនាំពាក្យសេតវិមាន លោកស្រី Karoline Leavitt បាននិយាយថាលោក ត្រាំ បានបិទបញ្ចប់ជម្លោះជាច្រើន ក្នុងនោះរួមមានជម្លោះរវាងអ៉ីស្រាអែល និងអ៉ីរ៉ង់ ឥណ្ឌា និងប៉ាគីស្ថាន ហើយឥលូវលោកបានជួយសម្របសម្រួលឱ្យមាន បទឈប់បាញ់រវាងកម្ពុជា និងថៃ។ ដូច្នេះតើលោក ដូណាល់ ត្រាំ ស័ក្តិសមនឹងទទួលបានពានរង្វាន់ណូបែលសន្តិភាពដែរឬទេ?

បើតាមពាក្យបណ្ដាំរបស់លោក Alfred Nobel ដែលជាអ្នកស្ថាបនិកពានរង្វាន់ណូបែល ពានរង្វាន់ណូបែលសន្តិភាពត្រូវប្រគល់ទៅឱ្យបុគ្គល ឬស្ថាប័នដែលសម្រេចបានលទ្ធផលច្រើនបំផុត ឬធ្វើការងារបានល្អប្រសើរក្នុងការជំរុញមិត្តភាពរវាងប្រទេស និងប្រទេស លុបចោល ឬកាត់បន្ថយកងទ័ពអចិន្ត្រៃយ៍ ព្រមទាំងបង្កើត ក៏ដូចជាលើកកម្ពស់សន្និសីទសន្តិភាព។

អ្នកនាំពាក្យសេតវិមាន លោកស្រី Karoline Leavitt បានគូសបញ្ជាក់ថា «លោក​ប្រធានាធិបតី ត្រាំ បានធ្វើអន្តរាគមន៍បិទបញ្ចប់ជម្លោះរវាងកម្ពុជា និងថៃ អ៉ីស្រាអែល និងអ៉ីរ៉ង់ រ៉ាដ្វាន់ដា និងសាធារណរដ្ឋប្រជាធិបតេយ្យកុងហ្គោ ឥណ្ឌា និងប៉ាគីស្ថាន ស៊ែរប៊ី និងកូសូវ៉ូ ព្រមទាំងអេហ្ស៉ីប និងអេត្យូពី»។ លោកស្រីបន្ថែមថានេះមានន័យថាលោកប្រធានាធិបតី ត្រាំ សម្រេចបានជាមធ្យម កិច្ចព្រមព្រៀងសន្តិភាព ឬបទឈប់បាញ់មួយក្នុងរយៈពេលមួយខែ អំឡុងរយៈពេល៦ខែនៃការឡើងកាន់អំណាចរបស់លោក។ លើសពីនេះទៅទៀត កាលពីជិតចប់អាណត្តិកាលពីឆ្នាំ២០២០ លោក ត្រាំ សម្រេចបានលទ្ធផលដ៏អស្ចារ្យនោះគឺកិច្ចព្រមព្រៀងសន្តិភាព Abraham រវាងបណ្ដាប្រទេសអារ៉ាប់មួយចំនួន និងអ៉ីស្រាអែល។ តាមរយៈ Abraham អេមីរ៉ាតអារ៉ាប់រួម ម៉ារ៉ុក និងបារ៉ែន បានយល់ព្រមភ្ជាប់ទំនាក់ទំនងការទូតឡើងវិញ ដែលនេះត្រូវនឹងលក្ខខណ្ឌជំរុញមិត្តភាពរវាងប្រទេស និងប្រទេស។

គួរបញ្ជាក់ថា អតីតប្រធានាធិបតីអាមេរិក លោក Barack Obama ទទួលបានពានរង្វាន់ណូបែលសន្តិភាពក្នុងឆ្នាំ២០០៩ មុននឹងលោកបញ្ចប់ឆ្នាំដំបូងនៃអាណត្តិទី១របស់លោក។ ចំណែក លោក Theodore Roosevelt ទទួលបានពានរង្វាន់ណូបែលសន្តិភាពក្នុងឆ្នាំ១៩០៦ សម្រាប់ការបំពេញនាទីរបស់លោកក្នុងការសម្របសម្រួលបិទបញ្ចប់សង្រ្គាមរវាងរុស្ស៉ី និងជប៉ុន ខណៈអតីត

ប្រធានាធិបតីអាមេរិក២ រូបទៀត គឺលោក Woodrow Wilson និងលោក Jimmy Carter ក៏ទទួលបានពានរង្វាន់នេះដែរ។ លោក ត្រាំ បានជួយសម្របសម្រួលបទឈប់បាញ់រវាង កម្ពុជា និងថៃ ដើម្បីទប់ស្កាត់កុំឱ្យសង្រ្គាមទាំងស្រុងផ្ទុះឡើងរវាងប្រទេសទាំង២ ហើយបានបញ្ឈប់សង្រ្គាមរវាងអ៉ីស្រាអែល និងអ៉ីរ៉ង់ ដែលត្រូវបានក្រុមអ្នកវិភាគព្រមានថាអាចនឹងផ្ទុះទៅជា សង្រ្គាមក្នុងតំបន់មជ្ឈិមបូព៌ាទាំងមូល ប្រសិនបើគ្មានបទឈប់បាញ់ទេនោះ៕