(ភ្នំពេញ)៖ លោកស្រី Charity Tusiime Head Program Audit Anglophone ប្រធានកម្មវិធីសវនកម្ម មកពីការិយាល័យកណ្តាល Gavi នៅទីក្រុងហ្សឺណែវ ប្រទេសស្វីស បានថ្លែងថា កម្ពុជាជាប្រទេសគំរូលើការអនុវត្តន៍បានល្អប្រសើរ ដោយបានចូលរួមជាមួយ Gavi លើតម្លាភាព និងគណនេយ្យភាព កំឡុងសវនកម្មនេះ ដែលគ្របដណ្តប់ដោយគម្រោង ពីឆ្នាំ២០២០និងបាន ដល់ ឆ្នាំ២០២៤ នៅរាជធានី-ខេត្ត មួយចំនួន។ ជាលទ្ធផល នៃសវនកម្ម បង្ហាញថា កម្ពុជាបានផ្តល់ថ្នាំបង្ការជំងឺកញ្ជ្រិល បានល្អ និងការគ្រប់គ្រងវ៉ាក់សាំងបានល្អផងដែរ។

ការថ្លែងយ៉ាងដូច្នេះរបស់លោកស្រី ក្នុងឱកាសបានទទួលការជួបសម្ដែងការគួរសម និងពិភាក្សាការងារជាមួយលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នៅទីស្ដីការក្រសួងសុខាភិបាល នាថ្ងៃទី៣១ ខែកក្កដា ឆ្នាំ២០២៥។

លោកស្រីប្រធានកម្មវិធី បានថ្លែងអំណរគុណលោកសាស្ត្រាចារ្យរដ្ឋមន្ត្រី ឈាង រ៉ា និងក្រុមការងារសុខាភិបាលកម្ពុជា ដោយបានជម្រាបជូនអំពី កិច្ចការសវនកម្មគម្រោងរាល់ ៥ឆ្នាំម្តង សម្រាប់ប្រទេសដែលបានទទួលជំនួយពី Gavi។ លោកស្រីបានបន្ថែមថា នៅមានកិច្ចការមួយចំនួន ដែលអាចត្រូវខិតខំបន្ថែមទៀតដូចជា កសាងធនធានមនុស្សបន្ថែម ការកែសម្រួលយុទ្ធសាស្ត្រជាតិចាក់ថ្នាំបង្ការ ឱ្យស្របតាមផែនការយុទ្ធសាស្ត្រសាកលរបស់ Gavi 6.0 (2026-30) ជាដើម។

ក្នុងឱកាសនោះលោកសាស្ត្រាចារ្យរដ្ឋមន្ត្រី បានថ្លែងអំណរគុណដល់អង្គការ Gavi អំពីរបាយការណ៍លទ្ធផល នៃសវនកម្មដែលមានទាំងលទ្ធផលល្អៗជាច្រើនដែលសុខាភិបាលសម្រេចបានល្អច្រើនឆ្នាំមកនេះ និងរួមទាំងចំណុចដែលត្រូវខិតខំបន្ថែមទៀត។ របកគំហើញទាំងនេះ គឺជាធាតុចូលយ៉ាងសំខាន់ សម្រាប់ពង្រឹងកម្មវិធីជាតិចាក់ថ្នាំបង្ការ និងរៀបចំកែសម្រួលយុទ្ធសាស្ត្រជាតិចាក់ថ្នាំបង្ការ ឱ្យស្របតាមផែនការយុទ្ធសាស្ត្រសាកលរបស់ Gavi 6.0 (2026-30) នាពេលខាងមុខនេះ៕