(ភ្នំពេញ)៖ នៅថ្ងៃព្រហ្បតិ៍ ទី៣១ ខែកក្កដា ឆ្នាំ២០២៥ លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា បានចាត់តាំង អ្នកឧកញ៉ា ហ៊ុន ឡាក់ អគ្គលេខាធិការ ដឹកនាំគណៈប្រតិភូសមាជិកសមាគមឧកញ៉ាកម្ពុជា ជាច្រើនរូបចូលរួមគោរពវិញ្ញាណក្ខន្ធយុទ្ធជនពលីចំនួន ៥រូបដែលបានលះបង់អាយុជីវិតក្នុងបុព្វហេតុការពារជាតិមាតុភូមិនៅសមរភូមិជួរមុខទប់ទល់នឹងការឈ្លានពានរបស់យោធាថៃ ចូលទឹកដីកម្ពុជា ដែលរួមមាន៖

១. ចូលរួមគោរពវិញ្ញាណក្ខន្ធលោកអនុសេនីយ៍ឯក ពោ វៃ យោធិន នៃកងពលតូចអន្តរាគមន៍លេខ៨ ចំណុះកងពលធំអន្តរាគមន៍លេខ៣ កងទ័ពជើងគោក នៃកងយោធពលខេមភូមិន្ទ ដោយពិធីបុណ្យសពកំពុងប្រារព្ធធ្វើនៅវត្តវាលស្បូវ ខណ្ឌច្បារអំពៅ ។

២. ចូលរួមគោរពវិញ្ញាណក្ខន្ធឯកឧត្តមឧត្តមសេនីយ៍ឯក ដួង សំនៀង មេបញ្ជាការកងពលតូចអន្តរាគមន៍លេខ៧ដែលបានពលីជីវិតកាលពីរសៀលថ្ងៃសោរ៍ ថ្ងៃទី២៦ ខែកក្កដា ឆ្នាំ២០២៥ ក្នុងជន្មាយុ ៦៧ឆ្នាំ ដោយពិធីបុណ្យប្រារព្ធធ្វើឡើងនាវត្តនិរោធ ខណ្ឌច្បារអំពៅ រាជធានីភ្នំពេញ។

៣. ចូលរួមគោរពវិញ្ញាណក្ខន្ធ លោកព្រិន្ទបាលឯក ណៃ ចន្នី យោធិននៃកងពលតូចអន្តរាគមន៍លេខ៨ កងទ័ពជើងគោក ដែលបានពលីជីវិតប្រយុទ្ធលើសមរភូមិដើម្បីការពារបូរណភាពទឹកដីក្នុងការប្រយុទ្ធជាមួយកងទ័ពឈ្លានពានថៃ កាលពីថ្ងៃអាទិត្យទី២៧ ខែកក្កដា ឆ្នាំ២០២៥ ដោយពិធីបុណ្យសពបានប្រារព្ធធ្វើនៅគេហដ្ឋានស្ថិតនៅភូមិរំលឹក ឃុំទួលសាលា ស្រុកបសេដ្ឋ ខេត្តកំពង់ស្ពឺ ។

៤. ចូលរួមគោរពវិញ្ញាណក្ខន្ធ លោកនាយចំណង់ ម៉ៅ ស៊ា អាយុ៤១ឆ្នាំ ជាកងទ័ពនៅកងពលតូចអន្តរាគមន៍លេខ៨ ដែលបានពលីនៅក្នុងសមរភូមិតំបន់ភ្នំទ្រព្យកាលពីថ្ងៃទី២៥ ខែកក្កដា ឆ្នាំ២០២៥ ដោយពិធីបុណ្យសពកំពុងប្រារព្ធធ្វើនៅគេហដ្ឋានស្ថិតនៅភូមិព្រៃជួរ ឃុំពពេល ស្រុកត្រាំកក់ ខេត្តតាកែវ។

៥. ចូលរួមគោរពវិញ្ញាណក្ខន្ធលោកព្រិន្ទបាលទោ រិន វាសនា កងអនុសេនាតូចដឹកជញ្ជូន ដែលបានពលីជីវិតនៅលើសមរភូមិប្រយុទ្ធក្នុងភូមិសាស្ត្រតំបន់មុំបី កាលពីថ្ងៃទី២៧ ខែកក្កដា ឆ្នាំ២០២៥ ដោយពិធីបុណ្យសពកំពុងប្រារព្ធធ្វើនៅគេហដ្ឋានស្ថិតនៅភូមិចំការត្រាច ឃុំដំណាក់អំពិល ស្រុកអង្គស្នួល ខេត្តកណ្តាល។

ក្នុងវេលាដ៏ក្រៀមក្រំនេះដែរ ប្រតិភូសមាគមឧកញ៉កម្ពុជា បានពាំនាំនូវការរំលែកទុក្ខពីលោកអ្នកឧកញ៉ាប្រធានសមាគម ក៏ដូចជាលិខិតរំលែកមរណទុក្ខ ពីសមាគមឧកញ៉ាកម្ពុជា ជូនក្រុមគ្រួសារ នៃសពទាំងអស់ ព្រមទាំងបានឧទ្ទិសបួងសួងដល់ដួងវិញ្ញាណក្ខន្ធយុទ្ធជនពលី ទាំង ៥រូបសូមបានបដិសន្ធិក្នុងសុគតិភពកុំបីឃ្លៀងឃ្លាតឡើយ៕