(ព្រះវិហារ)៖ លោក កូវ ប៊ុនប៉ ប្រធានគ្រប់គ្រងធនធានមនុស្ស នៃក្រុមហ៊ុនម៉ាវែល ហ្គាមិន លីមីតធិត (Marvel Garment Company Limited) ដោយមានការចូលរួមពីលោក អ៊ុក គឹមសាន អភិបាលរងខេត្តព្រះវិហារ និងអាជ្ញាធរមូលដ្ឋាន ថ្នាក់ដឹកនាំ បុគ្គលិកក្រុមហ៊ុមជាច្រើនរូប នៅថ្ងៃទី៣១ ខែកក្កដា ឆ្នាំ២០២៥ បាននាំយកគ្រឿងឧបភោគបរិភោគ សម្ភារៈប្រើប្រាស់ និងថវិកា ផ្តល់ជូនប្រជាពលរដ្ឋភៀសសឹកដោយសារសង្គ្រាម កំពុងស្នាក់នៅបណ្តោះអាសន្នតាមមណ្ឌលសុវត្ថិភាពចំនួន៤ទីតាំង និងវីរជនកងទ័ពដែលកំពុងឈរជើងការពារទឹកដីយ៉ាងអង់អាចក្លាហាននៅតាមព្រំដែន ក្នុងខេត្តព្រះវិហារ។

នៅក្នុងឱកាសនេះ លោក កូវ ប៊ុនប៉ បានថ្លែងប្រាប់ប្រជាពលរដ្ឋភៀសសឹក អំពីការគិតគូរយកចិត្តទុកដាក់ខ្ពស់ពីសំណាក់សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោជំទាវបណ្ឌិត ក៏ដូចជាអាជ្ញាធរខេត្តព្រះវិហារ និងមន្ត្រីពាក់ព័ន្ធ ចំពោះប្រជាពលរដ្ឋជាជនភៀសសឹករបស់យើង ពិសេសគិតគូរលើការស្នាក់នៅ សន្តិសុខ អនាម័យ ការថែទាំសុខភាព និងការហូបចុកជាដើម។

លោកលើកឡើងថា ប្រជាពលរដ្ឋភៀសសឹកទាំងអស់ដែលមកស្នាក់នៅបណ្តោះអាសន្នតាមមណ្ឌលសុវត្ថិភាព ត្រូវចេះស្រលាញ់រាប់អានគ្នា ត្រូវចេះមើលថែរក្សាគ្នា ពិសេសត្រូវថែរក្សាសុខភាពឲ្យបានល្អ ហូបស្អាត ផឹកស្អាត រស់នៅស្អាត។ជាមួយគ្នានេះ លោកក៏បានអំពាវនាវដល់ប្រជាពលរដ្ឋចំណាកស្រុកមកពីប្រទេសថៃ ក៏ដូចជាកូនចៅប្រជាពលរដ្ឋនៅទីនេះ ដែលមិនទាន់មានការងារធ្វើ ដោយក្រុមហ៊ុនរបស់លោកនឹងផ្តល់ឱកាសការងារជូនជាច្រើនពាន់កន្លែងផងដែរ។

សូមបញ្ជាក់ថា ក្រុមហ៊ុម Marvel Garments ជាក្រុមហ៊ុនបរទេសដែលវិនិយោគលើវិស័យកាត់ដេរធំជាងគេបំផុតនៅកម្ពុជា និងជាក្រុមហ៊ុនដែលបានផ្តល់ឱកាសការងារមានចំនួ ៤០,០០០(បួនម៉ឺន)កន្លែងដល់កម្មករ និងកម្មការនី នៅប្រទេសកម្ពុជាយើងផងដែរ។

លោក កូវ ប៊ុនប៉ បានបញ្ជាក់ទៀតថា សម្ភារ និងថវិកា ដែលនាំមកចែកជូនប្រជាពលរដ្ឋភៀសសឹក មាន៤មណ្ឌលរួមមាន៖ទី១៖ មណ្ឌលសុវត្ថិភាពវត្តត្រាវគៀត ចំនូន២៩៣គ្រួសារ, ទី២៖ មណ្ឌលសុវត្ថិភាពបាក់កាំ ចំនួន៣២៦គ្រួសារ, ទី៣៖ មណ្ឌលសុវត្ថិភាពវត្តប៉ាលហាល ចំនួន២៤១គ្រួសារ និងទី៤៖ មណ្ឌលសុវត្ថិភាពវត្តពោធិ៍សិលារាម ចំនូន១៤០គ្រួសារ។

ចែកធុងដាក់ទឹកចំណុះ២០០លីត្រ ចំនួន៤០០គ្រឿងឧបភោគ បរិភោគ (ត្រាប្រម៉ា ស្កសរ គ្រឿងទេស) ១០០០កញ្ចប់ សូឡា ៦០គ្រឿងខោអាវមុខភួយ ១០០០ឃីត (ចែកផ្ទាល់)
ផ្តល់ថវិកាដល់ជនភៀសសឹក១០០០គ្រួសារ ដោយក្នុង១គ្រួសារថវិកា៤០,០០០រៀល ជូនថវិកាក្រុមការងារតាមបណ្ឌល៤ ទីតាំងចំនួន១០លានរៀល។

ផ្តល់ជូនវីរកងទ័ពជួរមុខមាន៖ ធុងដាក់ទឹកចំណុះ២០០លីត្រ ចំនួន៣០, គ្រឿងឧបភោគ បរិភោគ (ត្រាប្រម៉ា ស្កសរ គ្រឿងទេស) ២០០កញ្ចប់, សូឡា៤០គ្រឿង
ខោអាវមុខភួយ ២០០ឃីត (ចែកផ្ទាល់)៕