ក្រុមហ៊ុន LIANG CH Development Group និងក្រុមហ៊ុន CLEANlNG SOLUTION ឧបត្ថម្ភទឹកសុទ្ធ១,០០០កេស ជូនគ្រូពេទ្យ TYDA និងជនភៀសសឹក

01-08-2025 22:03

(ភ្នំពេញ)៖ នៅរសៀលថ្ងៃសុក្រ ទី១ ខែសីហា ឆ្នាំ២០២៥ លោក ចាន់ ពុទ្ធា តំណាងក្រុមហ៊ុន LIANG CH Development Group និងក្រុមហ៊ុន CLEANlNG SOLUTION Co.,Ltd និងសហការី បានចូលរួមឧបត្ថម្ភជាទឹកបរិសុទ្ធប្រូវីដា ចំនួន១០០០កេស ជូនដល់សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ក្នុងស្ថានភាពវិបាក នៃសង្គ្រាមជម្លោះព្រំដែនកម្ពុជា-ថៃ ដែលទឹកបរិសុទ្ធទាំងនេះ ត្រូវបានយកទៅចែកជូនបងប្អូនជនភៀសសឹក និងក្រុមគ្រូពេទ្យស្ម័គ្រចិត្តយុវជនសម្តេចតេជោ ដែលកំពុងបំពេញការងារចុះពិនិត្យ និងព្យាបាលជំងឺជូនបងប្អូនទាំងនោះ។

នៅក្នុងស្ថានភាពលំបាកដោយសារសង្គ្រាមនេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជាអនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្ដយុវជនសម្ដេចតេជោ (TYDA) បានដឹកនាំក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) ជួបសួរសុខទុក្ខ និងអញ្ជើញសំណេះសំណាលជាមួយលោកតា លោកយាយអ៊ុំពូ មីង កូនក្មួយ ក្នុងស្ថានភាពការរស់នៅជាក់ស្តែងជាជនភៀសសឹក។

បងប្អូនជនភៀសសឹកទាំងអស់ ត្រូវបានយកចិត្តទុកដាក់ខ្ពស់ពីប្រមុខរាជរដ្ឋាភិបាលសម្តេចមហាបវរធិបតី ហ៊ុន ម៉ាណែត ដោយសម្តេចបានណែនាំឱ្យអាជ្ញាធរមានសមត្ថកិច្ច យកចិត្តទុកដាក់ចំពោះប្រជាពលរដ្ឋ ជាជនភៀសសឹកដែលបានជម្លៀសខ្លួនចេញពីតំបន់ប្រយុទ្ធគ្នា។

សមាគមគ្រូពេទ្យស្ម័គ្រចិត្ដយុវជនសម្ដេចតេជោ (TYDA) បានចូលរួមសហការជាមួយក្រសួងសុខាភិបាល និងក្រសួងស្ថាប័នពាក់ព័ន្ធ រដ្ឋបាលខេត្តពាក់ព័ន្ធ រៀបចំទួលសុវត្ថិភាពក៏ដូចជាដោះស្រាយទីតាំងស្នាក់នៅ ការហូបចុក និងផ្នែកសុខាភិបាល ជូនបងប្អូនទាំងអស់គ្នា។

ជាមួយគ្នានេះ ក្នុងស្មារតីខ្មែរជួយខ្មែរ ស្មារតីខ្មែរតែមួយ មានប្រជាពលរដ្ឋជាច្រើនបានចូលរួមបរិច្ចាគ ទឹកបរិសុទ្ធ ទាំង ថវិកា និងកញ្ចប់ស្បៀងអាហារ ថ្នាំពេទ្យ និងសម្ភារប្រើប្រាស់នានាជាច្រើនទៀតជួយដល់កងទ័ពជួរមុខផងដែរ៕