(ព្រះវិហារ)៖ លោកសាស្រ្តាចារ្យបណ្ឌិតសភាចារ្យ សុក ស៊ីផាន់ណា និងលោកស្រី ខៀវ​ មាលី ដោយមានការចូលរួមពីលោក អ៊ុក គឹមសាន អភិបាលរងខេត្តព្រះវិហារ និងក្រុមការងារ នៅថ្ងៃទី០១ ខែសីហា ឆ្នាំ២០២៥ បាននាំអំណោយមកចែកជូនប្រជាពលរដ្ឋភៀសសឹកចំនួន២៥០គ្រួសារ នៅវត្តត្រាវគៀត និងវីរកងទ័ពការពារព្រំដែន នៅខេត្តព្រះវិហារ

លោកសាស្រ្តាចារ្យបណ្ឌិតសភាចារ្យ សុក ស៊ីផាន់ណា បានថ្លែងនាំនូវប្រសាសន៍ផ្តាំផ្ញើសាកសួរសុខទុក្ខដោយក្តីនឹករលឹកពីសម្តេចតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុនរ៉ានីហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោជំទាវបណ្ឌិត ជូនបងប្អូនប្រជាពលរដ្ឋភៀសសឹកនៅក្នុងខេត្តព្រះវិហារយើងទាំងអស់គ្នា។

លោកសាស្ត្រាចារ្យបានថ្លែងបញ្ជាក់ទៀតថា៖សង្គ្រាមដែលបានកើតឡើងនៅតាមព្រំដែន កម្ពុជា-ថៃ កាលពីព្រឹកថ្ងៃទី២៤ ខែកក្កដា ឆ្នាំ២០២៥ គឺបង្ករឡើងដោយកងទ័ពថៃជាអ្នកផ្ទុះអាវុធមុន ចំណែកកងទ័ពកម្ពុជារបស់យើង ផ្ទុះអាវុធតបតតាមក្រោយ។លោកថាកន្លងមកក្រោមបទបញ្ជារបស់សម្តេចនាយករដ្ឋមន្ត្រីនៃកម្ពុជា គឺកងទ័ពយើងមានអត់ធ្មត់ខ្លាំងណាស់ ដែលការអត់ធ្មត់នេះ គឺដើម្បីសេចក្តីសុខរបស់ប្រជាពលរដ្ឋខ្មែរយើង ពិសេសប្រជាពលរដ្ឋនៅតាមព្រំដែន។

ការផ្ទុះអាវុធដែលបង្កឡើងដោយកងទ័ពថៃ រយះពេល៥ថ្ងៃនេះ បានធ្វើឱ្យប្រជាពលរដ្ឋរស់នៅតាមព្រំដែនត្រូវបង្ខំចិត្តចាកចេញពីផ្ទះសំបែង មកស្នាក់នៅបណ្តោះអាសន្នតាមទីតាំងសុវត្ថិភាពផ្សេងៗ នៅតាមវត្តអារ៉ាម និងកន្លែងសាធារណៈជាច្រើនទៀត ធ្វើយ៉ាងណាគេចឱ្យផុតពីគ្រាប់ផ្លោងរបស់ថៃ។ក្រោមការខិតខំប្រឹងប្រែងរបស់សម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃកម្ពុជា បានធ្វើឱ្យការចរចារទ្វេរភាគីរវាងប្រទេសទាំង២កើតឡើង ឈានដល់ការសម្រេចបទឈប់បាញ់គ្នាទាំងស្រុងនៅម៉ោង១២.០០នាទី ថ្ងៃទី២៨ ខែកក្កដា ឆ្នាំ២០២៥។

លោកថាទោះបីបងប្អូនមកស្នាក់នៅបណ្តោះអាសន្នតាមទីតាំងសុវត្ថិភាពផ្សេងៗ បងប្អូននៅតែទទួលបានគិតគូរយកចិត្តទុកដាក់ខ្ពស់បំផុតពីសម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោជំទាវបណ្ឌិត ក៏ដូចជាអាជ្ញាធរខេត្ត ក្រុង ស្រុក ឃុំ សង្កាត់និងអង្គភាពពាក់ព័ន្ធទាំងអស់ក្នុងខេត្តព្រះវិហារ។

លោកសាស្ត្រាចារ្យបណ្ឌិតសភាចារ្យ សុក សុីផាន់ណា ក៏បានថ្លែងអំពាវនាវដល់បងប្អូនភៀសសឹកទាំងអស់ត្រូវចេះស្រលាញ់គ្នា រាប់អានគ្នា និងត្រូវថែរក្សាសុខភាពឱ្យបានល្អ។អំណោយដែលនាំមកចែកជូនប្រជាពលរដ្ឋភៀសសឹកចំនួន២៥០គ្រួសារនៅវត្តត្រាវគៀតនាពេលនេះ ក្នុង១គ្រួសារទទួលបាន៖ទឹកបរិសុទ្ឋ ២៥០កេះ វីតាមីនដប ៣៨០ដប អង្ករ ២តោន ថ្នាំពេទ្យ ៤មុខ ស្មើនឹង២៥០កញ្ចប់ គ្រាប់ស្វាយចន្ទី ២កេះ ត្រីងៀត ១កេះ ចេកអំបូង ៥កេះ ទឹកក្រូច ហា្វន់តា ១៥០កេះ និងថវិកាជូនគ្រួសារភៀសសឹក មួយគ្រួសារៗ ៨ម៉ឺនរៀល។

ដោយឡែកស្បៀង​ និង​អំណោយសម្រាប់​កងទ័ព​នៅ​ខេត្ត​ព្រះវិហារ​៖ទឹក​បរិសុទ្ធ​ ១.៥លីត្រ​ ២៥០​ កេស វីតាមីន​ដប​ ៣៨០​ ដប អង្ករ​ ២តោន​ (50គីឡូ × 40បាវ) ថ្នាំ​ ៤មុខ ស្វាយចន្ទី​ ២កេស ត្រីងៀត​ ១កេសនិងចេក​ ៥​កេស​ផងដែរ៕