(ហ្សាការតា)៖ នៅរសៀលថ្ងៃសុក្រ ទី១ ខែសីហា ឆ្នាំ២០២៥ នៅលេខាធិការដ្ឋានអាស៊ាន ប្រចាំទីក្រុងហ្សាការតា សាធារណរដ្ឋឥណ្ឌូណេស៊ី លោកបណ្ឌិត កៅ គឹមហួន អគ្គលេខាធិការអាស៊ានបានស្វាគមន៍ឯកឧត្តម José Ramos-Horta ប្រធានាធិបតីទីម័រខាងកើតក្នុងឱកាសលោកអញ្ជើញមកទស្សនកិច្ចនៅលេខាធិការដ្ឋានអាស៊ាន។

ព្រឹត្តិការណ៍ប្រកបដោយអត្ថន័យនេះ បានចាប់ផ្តើមជាមួយនឹងការចុះហត្ថលេខាលើសៀវភៅក្រាំងមាស ហើយបន្ទាប់មកនឹងមានជំនួបរវាងប្រធានាធិបតីទីម័រខាងកើត ជាមួយអគ្គលេខាធិការអាស៊ាន គណៈកម្មាធិការតំណាងអចិន្ត្រៃយ៍ប្រចាំអាស៊ាន (CPR) និងឯកអគ្គរដ្ឋទូតទីម័រខាងកើតប្រចាំអាស៊ាន ព្រមទាំង ការថ្លែងសារគោលនយោបាយ។ ការថ្លែងសារគោលនយោបាយ នឹងមានការចូលរួមពីក្រុមអង្គទូតប្រចាំទីក្រុងហ្សាការតា តំណាងអង្គភាពពាក់ព័ន្ធនឹងអាស៊ាន ផ្នែកសិក្សាធិការ និងក្រុមអ្នកវិភាគសិក្សាស្រាវជ្រាវ មេដឹកនាំធុរកិច្ច និងមន្ត្រីលេខាធិការដ្ឋានអាស៊ាន ជាដើម។

នៅរសៀលថ្ងៃសុក្រ លោកបណ្ឌិត កៅ គឹមហួន អគ្គលេខាធិការអាស៊ាន រួមជាមួយ គណៈកម្មាធិការតំណាងអចិន្ត្រៃយ៍ប្រចាំអាស៊ាន (CPR) និងឯកអគ្គរដ្ឋទូតទីម័រខាងកើតប្រចាំអាស៊ាន បានមានជំនួបជាមួយលោក José Ramos-Horta ប្រធានាធិបតីទីម័រខាងកើត។

ជំនួបនេះ សង្កត់ធ្ងន់ពីការប្តេជ្ញាចិត្តឥតងាករេរបស់ទីម័រខាងកើត ចំពោះកិច្ចការរបស់អាស៊ាន ជាពិសេស ឆ្ពោះទៅរកការកសាងសហគមន៍អាស៊ាន និងកិច្ចខិតខំប្រឹងប្រែងសមាហរណកម្មអាស៊ាន។ នៅក្នុងឱកាសនោះលោកបណ្ឌិត កៅ គឹមហួន ក៏បានបញ្ជាក់ឡើងវិញនូវការគាំទ្ររបស់លេខាធិការដ្ឋានអាស៊ានដល់ទីម័រខាងកើត នៅក្នុងកិច្ចខិតខំប្រឹងប្រែងរបស់ខ្លួន ដើម្បីក្លាយជាសមាជិកទី ១១ របស់អាស៊ាន នៅខែតុលា ខាងមុខនេះ។

នៅថ្ងៃដដែល លោក José Ramos-Horta ប្រធានាធិបតីទីម័រខាងកើត បានអញ្ជើញថ្លែងសារគោលនយោបាយ ដោយគូសបញ្ជាក់ពីការប្តេជ្ញាចិត្តយ៉ាងពេញលេញ និងការគាំទ្ររបស់ទីម័រខាងកើតចំពោះកិច្ចការរបស់អាស៊ាន រួមទាំងចក្ខុវិស័យសាមគ្គីភាព សន្តិភាព និងវិបុលភាពក្នុងតំបន់របស់អាស៊ាន។

លោកបណ្ឌិត កៅ គឹមហួន អគ្គលេខាធិការអាស៊ាន បានថ្លែងសន្ទរកថាបើកមុនពេលការថ្លែងសារគោលនយោបាយបានចាប់ផ្តើម ដោយបានកោតសរសើរពីភាពជាអ្នកដឹកនាំរបស់ឯកឧត្តម José Ramos-Horta ក្នុងការពង្រឹងចំណងរវាងអាស៊ាន និងទីម័រខាងកើត ស្របពេលដែលអាស៊ាន ចាប់ផ្តើមអនុវត្ត «អាស៊ានឆ្នាំ២០៤៥៖ ចក្ខុវិស័យរួមគ្នារបស់យើង»។

អគ្គលេខាធិការអាស៊ាន បានគូសបញ្ជាក់ពីតម្លៃនៃទស្សនកិច្ចកម្រិតខ្ពស់របស់ប្រមុខរដ្ឋ/រដ្ឋាភិបាល ក្នុងការរៀបចំសារក្នុងតំបន់ និងជំរុញការចូលរួមជាមួយក្រុមអង្គទូត អង្គភាពអាស៊ាន ផ្នែកសិក្សាធិការ ក្រុមសិក្សាវិភាគស្រាវជ្រាវ និងសហគមន៍ធុរកិច្ច ដោយត្រួសត្រាយផ្លូវសម្រាប់ការពង្រីកសាច់រឿងរបស់អាស៊ាន នៅក្នុងតំបន់ និងក្រៅតំបន់៕