(ភ្នំពេញ)៖ លោកស្រីកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងលោក ត្រាក់ ថៃសៀង បានប្រគល់អំណោយ រួមមាន៖ គ្រឿងឧបភោគបរិភោគ និងសម្ភារៈបរិក្ខារមួយចំនួន ជូនទៅសមរភូមិជួរមុខ ខេត្តព្រះវិហារ តាមរយៈបញ្ជាការដ្ឋានកងអង្គរក្ស កាលពីថ្ងៃទី៣០ ខែកក្កដា ឆ្នាំ២០២៥។

អំណោយទាំងនោះ មានដូចជា៖ អង្ករចំនួន១០តោន, ទឹកពិសារបរិសុទ្ធចំនួន២០០កេស, ត្រីងៀតចំនួន៥០គីឡូក្រាម, ឆៃប៉ូវផ្អែមចំនួន២០០គីឡូក្រាម, អាគុយសាកថ្មសូឡា ចំនួន៤គ្រឿង, បន្ទះសូឡាចំនួន៤គ្រឿង, តង់ចំនួន១០០ និងស័ង្កសីស្មាច់ចំនួន៥០០សន្លឹក។

លោកស្រីកិត្តិបណ្ឌិត អ៊ឹង កន្ថាផាវី បានថ្លែងថា នេះគឺជាការរួមចំណែកជាមួយរាជរដ្ឋាភិបាល ក្នុងការផ្គត់ផ្គង់ និងគាំទ្រដល់កងកម្លាំងប្រដាប់អាវុធ នៅសមរភូមិជួរមុខ ដែលបាននឹងកំពុង បំពេញបេសកកម្មដ៏មមាញឹក ប្រកបដោយភាពអង់អាចក្លាហាន ដើម្បីការពារអធិបតេយ្យជាតិ និងបូរណភាពទឹកដី ពីការឈ្លានពានរបស់បរទេស។

លោកស្រីបន្តថា សកម្មភាពនេះ គឺដើម្បីបង្ហាញពីការគិតគូរ និងលើកទឹកចិត្តដល់វីរៈកងទ័ព ដែលបានលះបង់កម្លាំងកាយចិត្ត ការពារបូរណភាពទឹកដីជូនជាតិមាតុភូមិ។ កាយវិការដ៍អង់អាចក្លាហានរបស់វីរៈកងទ័ពខ្មែរយើង បានឆ្លុះបញ្ចាំងឲ្យឃើញពីការស្នេហាជាតិ ការពារមាតុភូមិ ការពារទឹកដី មិនឲ្យសត្រូវឈ្លានពានបានឡើយ។

ជាមួយគ្នានេះ លោកស្រីកិត្តិបណ្ឌិត អ៊ឹង កន្ថាផាវី ក៏បានអំពាវនាវដល់បងប្អូនជនរួមជាតិទាំងអស់ មានការជឿជាក់មកលើរាជរដ្ឋាភិបាលកម្ពុជា ដឹកនាំប្រកបដោយភាពស្វាហាប់ ឈ្លាសវៃរបស់សម្តេចបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងអំពាវនាវដល់កងកម្លាំងទាំងអស់ ត្រូវមានទំនុកចិត្តមកលើប្រជាជននៅបន្តគាំទ្រ។

លោកស្រីកិត្តិបណ្ឌិត អ៊ឹង កន្ថាផាវី សូមប្រសិទ្ធិពរជ័យដល់វីរៈយុទ្ធជន ដ៏អង់អាចក្លាហានរបស់យើងទាំងអស់ ដែលកំពុងលះបង់សាច់ស្រស់ឈាមស្រស់ ការពារបូរណភាពទឹកដី នៅគ្រប់គោលដៅតាមបណ្ដោយព្រំដែន ខ្មែរ-ថៃ យ៉ាងអង់អាចក្លាហាន សូមឱ្យជួបតែសេចក្តីសុខ និងមានជ័យជំនះ នៅលើសមរភូមិគ្រប់ពេលវេលា៕