(ឧត្តរមានជ័យ)៖ លោក David Verbiwski ភារធារីនៃស្ថានទូតកាណាដា ប្រចាំព្រះរាជាណាចក្រកម្ពុជា ដែលបាននិងកំពុងចូលរួមជាមួយគណៈប្រតិភូអ្នកការទូតបរទេសផ្សេងទៀត ចុះពិនិត្យដោយផ្ទាល់ស្ថានភាពនៅព្រំដែនកម្ពុជា-ថៃ, នៅព្រឹកថ្ងៃទី២ ខែសីហា ឆ្នាំ២០២៥នេះ ​បានបញ្ជាក់ឡើងវិញនូវការគាំទ្ររ ចំពោះការសន្ទនាបន្តរវាងកម្ពុជា និងថៃ ដើម្បីសម្រេចបាននូវសន្តិភាពយូរអង្វែង ដែលអនុញ្ញាតឱ្យប្រជាជនភៀសសឹកអាចត្រលប់ទៅផ្ទះរបស់ពួកគេ វិញដើម្បីស្ដារឡើងវិញនូវជីវភាព និងរស់នៅក្នុងសន្តិភាព។

ក្នុងឱកាសបទបទសម្ភាសន៍ជាមួយអ្នកសារព័ត៌មាន ភារធារីស្ថានទូតកាណាដា ប្រចាំកម្ពុជា បានគូសបញ្ជាក់ថា៖ «ហើយអ្វីដែលចាំបាច់ដើម្បីធ្វើឱ្យរឿងនេះកើតឡើង គឺសម្រាប់ប្រទេសកម្ពុជា និងប្រទេសថៃបន្តកិច្ចសន្ទនាដែលពួកគេបានចាប់ផ្តើម ដើម្បីស្វែងរកសន្តិភាពយូរអង្វែង រក្សាការឈប់បាញ់ និងធ្វើឱ្យវាអចិន្ត្រៃយ៍ ហើយទីបំផុតស្វែងរកវិធីដោះស្រាយបញ្ហាព្រំដែនរបស់ពួកគេ ដើម្បីជៀសវាងជម្លោះទាំងនេះនៅពេលអនាគត ដូច្នេះ ប្រជាជនរបស់ប្រទេសកម្ពុជា ដូចជាអ្នកដែលយើងឃើញនៅពីក្រោយយើង មិនចាំបាច់បង្ខំចិត្តរត់គេចពីផ្ទះសម្បែងរបស់ពួកគេទៀតទ»។

ជាមួយគ្នានេះដែរ ភារធារីស្ថានទូតកាណាដា ប្រចាំកម្ពុជា ក៏បានបង្ហាពីការចាប់អារម្មណ៍នៅពេលទៅទស្សនាតំបន់ព្រំដែនក្នុងរយៈពេល ២ថ្ងៃចុងក្រោយនេះ គឺអ្វីដែលយើងកំពុងឃើញនៅពីក្រោយយើងឥឡូវនេះ គឺចំនួនប្រជាជនដែលត្រូវបានបង្ខំឱ្យចាកចេញពីផ្ទះសម្បែង ត្រូវបានផ្លាស់ទីលំនៅទៅកាន់ជំរុំបណ្តោះអាសន្ន ដូចជាទីនេះ ហើយបំណងប្រាថ្នាដ៏ធំបំផុតរបស់យើង។

ភារធារីស្ថានទូតកាណាដា ប្រចាំកម្ពុជា បានគូសបញ្ជាក់ថា ការធ្វើដំណើរមកពិនិត្យដោយផ្ទាល់ស្ថានភាពនៅព្រំដែនកម្ពុជា-ថៃ គឺចង់ឃើញប្រជាជន និងកុមាររាប់ម៉ឺននាក់ ដែលនៅទីនេះឆ្ងាយពីផ្ទះសម្បែង ឆ្ងាយពីមុខរបរ ឆ្ងាយពីដីធ្លីរបស់ពួកគេ អាចត្រឡប់ទៅវិញឱ្យបានឆាប់តាមដែលអាចធ្វើទៅបាន។

គួរឱ្យដឹងថា ឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នារសៀលថ្ងៃទី០១ ខែសីហា ឆ្នាំ២០២៥ បានដឹកនាំឯកអគ្គរាជទូត-ឯកអគ្គរដ្ឋទូតចំនួន ២២ប្រទេស និងតំណាងអង្គការអន្តរជាតិចំនួន៤ ចុះពិនិត្យមើលការអនុវត្តបទឈប់បាញ់រវាងកម្ពុជា-ថៃ នៅតាមបណ្តោយព្រំដែន ខេត្តឧត្តរមានជ័យ។ ទីតាំងដែល ប្រមុខការទូតកម្ពុជា ដឹកនាំមន្រ្តីការទូតចុះត្រួតពិនិត្យនេះ គឺស្ថិតនៅឃុំគោកមន ស្រុកបន្ទាយអំពិល ខេត្តឧត្តរមានជ័យ ដែលជាទិសនៃសមរភូមិប្រយុទ្ធរយៈពេល៥ថ្ងៃ ដែលក្នុងនោះមានប្រាសាទតាមាន់ ប្រាសាទតាក្របី និងថ្មដូនជាដើម។

ឧបនាយករដ្ឋមន្រ្តី បានគូសបញ្ជាក់ថា រាជរដ្ឋាភិបាលកម្ពុជាប្រកាន់ខ្ជាប់នូវបទឈប់បាញ់ និងប្តេជ្ញាចិត្តយ៉ាងខ្ជាប់ខ្ជួនចំពោះគោលការណ៍ច្បាប់អន្តរជាតិ ការដោះស្រាយវិវាទដោយសន្តិវិធី និងរក្សាឱ្យបាននូវអធិបតេយ្យបូរណភាពទឹកដីរបស់ខ្លួន ទោះក្នុងតម្លៃណាក៏ដោយ។

ប្រមុខការទូតកម្ពុជា បាននាំមន្រ្តីទូតទាំងអស់ ទៅពិនិត្យមើលទីតាំង ដែលកងទ័ពថៃប្រើយន្តហោះ F-16 ទម្លាក់គ្រាប់បែកប្រភេទ MK-84 តែមិនទាន់ផ្ទុះនៅឡើយ ហើយបន្ទាប់មកលោកដឹកនាំមន្រ្តីទូតចុះពិនិត្យមើលទីតាំង វត្តតាមាន់សែនជ័យ ដែល កងទ័ពថៃប្រើយន្តហោះ F-16 ទម្លាក់គ្រាប់បែកនៅវត្តនេះ បណ្តាលឱ្យលោកតាអាចារ្យម្នាក់ស្លាប់ និងមានជនស៊ីវិលមួយចំនួនរងរបួស ខូចខាតយ៉ាងដំណំ។ បន្ថេមទីនេះ គណៈប្រតិភូ ក៏បានចុះពិនិត្យសាលារៀន ដែលរងការវាយប្រហារដោយកងទ័ពថៃ ផងដែរ៕