អំណោយជាស្បៀងអាហារ និងអាយគោម របស់សប្បុរសជនទាំងក្នុងនិងក្រៅប្រទេស បានប្រគល់ជូនកងទ័ពវរៈទី២៦១ ក្នុងទិសព្រះវិហារ សម្រាប់ផ្គត់ផ្គង់ដល់វីរៈកងទ័ពជួរមុខ
02-08-2025 13:06
(ព្រះវិហារ)៖ លោក លឹម លីន ជំនួយការផ្ទាល’លោក ហាស់ វ៉ារី ទីប្រឹក្សាផ្ទាល់របស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា នាថ្ងៃទី០២ ខែសីហា ឆ្នាំ២០២៥នេះ បាននាំយកអំណោយជាស្បៀងអាហារ គ្រឿងឧបភោគបរិភោគ រួមទាំងថវិកាមួយចំនួនរបស់លោក ហាស់ វ៉ារី ក៏ដូចជា របស់សប្បុរសជនទាំងក្នុងនិងក្រៅប្រទេស បានប្រគល់ជូនកងទ័ពវរៈទី២៦១ ចំណុះកងពលតូចអន្តរាគមន៍លេខ៦ ក្នុងទិសព្រះវិហារ ដើម្បីផ្គត់ផ្តង់ដល់វីរៈកងទ័ពជួរមុខ។
នាឱកាសនោះលោក លឹម លីន តំណាងលោក ហាស់ វ៉ារី រួមទាំងសប្បុរសជនទាំងអស់ បានថ្លែងនូវការអរគុណចំពោះទឹកចិត្តដ៏ល្អប្រពៃរបស់វរៈកងទ័ពទាំងអស់ និងបានសរសើរពីភាពអង់អាចក្លាហានប្រយុទ្ធតស៊ូជាមួយទាហានសៀម យ៉ាងអង់អាចក្លាហាន និងមិនចាញ់សត្រូវឈ្លានពានជាដាច់ខាត និងបានប្រឹងប្រែងពុះពារ ជម្នះក្នុងការឈ្លានពានរបស់កងទ័ពសៀមមកលើកម្ពុជា ដោយខ្លាចការនឿយហត់ និងភ័យខ្លាចនោះឡើយ។
តំណាងឱ្យសប្បុរសជនទាំងអស់ លោក លឹម លីន សូមបួងសួងដល់ទេវតា ជួយបីបាច់ថែរក្សាដល់បងប្អូនកងទ័ពនៅសមរភូមិមុខ និងជួយឱ្យឈ្នះអស់មារសត្រូវទាំងឡាយដើម្បីការពារបូរណភាព និងទឹកដីរបស់កម្ពុជា ឱ្យបានរុងរឿងតទៅមុខទៀតផងដែរ។
សូមជម្រាបដែរថា អំណោយដែលបានប្រគល់ជូនបានប្រគល់ជូនវរៈទី២៦១ មានដូចជា៖ អាចគោម ២៦គ្រឿង រួមទាំងមានគ្រឿងឧបភោគបរិភោគ មានដូចជា៖ មី, ទឹកត្រី,ទឹកស៊ីអ៉ីវ, ទឹកសុទ្ធ, ត្រីខ, ត្រីងៀត, កាហ្វេ, មុង ភួយ , កន្ទេល ថ្នាំពេទ្យ រួមទាំងសម្ភារមួយចំនួនទៀតផងដែរ។
សូមបញ្ជាក់ថា គិតចាប់ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ យោធាឈ្លានពានថៃ បានបើកការវាយប្រហារមកលើកម្ពុជាជាច្រើនទីតាំង ដោយមានការប្រើប្រាស់អាវុធធុនធ្ងរ និងយន្តហោះចម្បាំង F-16 ផងដែរ។ ទីតាំងទាំងនោះ រួមមាន៖ តំបន់ភ្នំទ្រព្យ, តាថាវ, ភ្នំខ្មោច, អូរផ្កាស្នេហ៍, មុំបី, ប្រាសាទតាមាន់ធំ, ប្រាសាទតាក្របី, វត្តអារាម, មណ្ឌលសុខភាព, ភូមិឋានប្រជាពលរដ្ឋ និងប្រាសាទព្រះវិហារជាដើម នឹងបានធ្វើឱ្យប្រជាពលរដ្ឋរាប់សែននាក់ ត្រូវធ្វើភៀសសឹក ចាគចេញពីផ្ទះរបស់ខ្លួនដើម្បីគេចចេញពីគ្រាប់ផ្លោងរបស់សៀម រួមទាំងមានវីរៈកងទ័ពខ្មែរជាច្រើននាក់ បានពលី និងរងរបួសផងដែរ។
ជាមួយគ្នានោះ កម្ពុជា-ថៃ បានឯកភាពគ្នាលើបទឈប់បាញ់ ដែលអនុវត្តចាប់ពីម៉ោង ១២រំលងអធ្រាត្រថ្ងៃទី២៨ ខែកក្កដា ឆ្នាំ២០២៥។ ការឯកភាពគ្នានេះ បានធ្វើឡើងក្នុងកិច្ចចរចាមួយនៅប្រទេសម៉ាឡេស៉ី កាលពីរសៀលថ្ងៃទី២៨ ខែកក្កដា ឆ្នាំ២០២៥ ដែលមានការផ្ដួចផ្ដើមគំនិតពីសហរដ្ឋអាមេរិក និងដឹកនាំសម្របសម្រួលដោយនាយករដ្ឋមន្ដ្រីម៉ាឡេស៉ី ក្នុងនាមជាប្រធានអាស៊ានប្ដូរវេន ព្រមទាំងមានការចូលរួមពីចិនផងដែរ។
សូមជម្រាបដែរថា ចំពោះវីរៈកងកម្លាំង ក្រោមការគិតគូរនិងយកចិត្តទុកដាក់ខ្ពស់របស់ប្រមុខរាជរដ្ឋាភិបាល សម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំឱ្យអាជ្ញាធរមានសមត្ថកិច្ច យកចិត្តទុកដាក់ខ្ពស់ផងដែរ។ ជាមួយគ្នានេះក្នុងស្មារតីខ្មែរជួយខ្មែរ ស្មារតីខ្មែរតែមួយ មានប្រជាពលរដ្ឋជាច្រើនបានចូលរួមបរិច្ចាគទាំងថវិកា និងកញ្ចប់ស្បៀងអាហារ ថ្នាំពេទ្យ និងសម្ភារៈប្រើប្រាស់នានាជាច្រើនទៀតជួយដល់កងទ័ពជួរមុខ និងប្រជាពលរដ្ឋភៀសសឹកពីតំបន់មានជម្លោះព្រំដែនកម្ពុជា-ថៃផងដែរ៕