(ឧត្តរមានជ័យ)៖ លោកឧត្តមសេនីយ៍ឯក សៀក សុជាតិ រដ្ឋលេខាធិការក្រសួងការពារជាតិ បានដឹកនាំក្រុមការងារនាំយកថវិកាចែកជូនវីរៈកងទ័ព ​ដែលកំពុងព្យាបាលរបួសនៅតាមមន្ទីរពេទ្យ ក្នុងខេត្តឧត្តរមានជ័យ ដែលត្រូវគ្រាប់ និងផ្សែងពុលរបស់ទាហានថៃ។

ពិធីនេះបានធ្វើឡើងក្នុងរយៈពេលប៉ុន្មានថ្ងៃនេះ ដោយមានការចូលរួមពីសំណាក់ឧត្តមសេនីយ៍ឯក ប៉ែន វូយ និងឧត្តមសេនីយ៍ឯក សួន បវរណ៍ អនុរដ្ឋលេខាធិការក្រសួងការពារជាតិ ដោយនាំយកអំណោយនាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្រ្តីក្រសួងការពារជាតិ ប្រគល់ជូនលោក ស៊ីម វុទ្ធា និងលោក ម៉េត មាសភក្តី អភិបាលរងខេត្តឧត្តរមានជ័យ ដើម្បីយកទៅជូនប្រជាពលរដ្ឋនៅជំរុំភៀសសឹក ស្ថិតនៅវត្តថ្កៅ ឃុំចុងកាល់ ស្រុកចុងកាល់ ខេត្តឧត្តរមានជ័យ ដែលមាន ៣,៨០៥គ្រួសារ ស្មើនឹង១៤,៣២៥នាក់។

អំណោយរួមមាន៖ អង្ករ៥.៥តោន, មី ៣៥០កេស, ពងទា ១០០០គ្រាប់, ថ្នាំព្យាបាលសរសៃ ១០០​ប្រអប់, ត្រីខ ៧០០កំប៉ុង។

នៅព្រឹកថ្ងៃទី០១ ខែសីហា ឆ្នាំ២០២៥ លោកឧត្តមសេនីយ៍ឯក សៀក សុជាតិ បាននាំយកនូវអំណោយមកប្រគល់ជូនលោកឧត្តមសេនីយ៍ទោ ប៊ុន ចន្ថា មេបញ្ជាការរងកងពលធំអន្តរាគមន៍លេខ២ តំណាងទិសទី៣ នៅទីបញ្ជាការកងពលតូចថ្មើជើងលេខ៤២ ដើម្បីចែកជូនដល់កងឯកភាពឈរជើងនៅសមរភូមិទិសទី៣។

អំណោយរួមមាន៖ ទឹកសុទ្ធនិងភេសជ្ជៈ ១០០០កេស, មី ៧០០កេស, ត្រីខកំប៉ុង ១០,០០០កំប៉ុង, នំគ្រៀមផ្លែឈើ ៥កេស (១០៦០​កញ្ចប់), ថ្នាំព្យាបាលសរសៃ ៣០ប្រអប់។

បន្ទាប់ពីកម្មវិធីប្រគល់អំណោយបានបញ្ចប់លោកឧត្តមសេនីយ៍ឯក បានចុះទៅសួសុខទុក្ខដល់វីរកងទ័ពដែលមានរបួស និងទទួលរងការវាយប្រហារពីផ្សែងពុលរបស់ទាហានថៃ ដែលកំពុងសម្រាកព្យាបាលនៅគិលានដ្ឋាន កងពលលេខ៤២ ចំនួន២០នាក់ និងវីរៈកងទ័ពដែលកំពុងសម្រាកព្យាបាលនៅមន្ទីរពេទ្យបង្អែកខេត្តឧត្តរមានជ័យចំនួន ៤២នាក់ ក្នុងនោះលោកបាទបានឧបត្ថម្ភថវិការផ្ទាល់ខ្លួនជូនដល់កងពលលេខ៤២, បងប្អូនវីរៈកងទ័ពជួមុខ, វីរៈកងទ័ពដែលកំពុងសម្រាកព្យាបាលនៅគិលានដ្ឋាន ទីបញ្ជាការកងពលលេខ៤២ ចំនួន២០នាក់ និងសម្រាកព្យាបាលនៅពេទ្យបង្អែកខេត្តឧត្តរមានជ័យចំនួន៤២នាក់៕