(ឧត្តមានជ័យ-ព្រះវិហារ)៖ លោក តាំង សុខឃី ទីប្រឹក្សាក្រសួងធម្មការ និងសាសនា និងជាប្រធានក្រុមប្រឹក្សាភិបាលក្រុមហ៊ុន «Khy Chenda Development Co, Ltd» និងលោកស្រី ទ្រី ចិន្តា អគ្គនាយិកាក្រុមហ៊ុន បានអមដំណើរ​ប្រតិភូមន្ត្រីសង្ឃជាន់ខ្ពស់កម្ពុជា និងក្រសួងធម្មការ និងសាសនា ដែលអញ្ជើញចូលរួមដោយលោក ចាយ បូរិន រដ្ឋមន្ត្រីក្រសួងធម្មការ និងសាសនា បានចុះសួរសុខទុក្ខ និងយកអំណោយចែកជូនកង កម្លាំងសមរភូមិមុខ និងប្រជាពលរដ្ឋភៀសសឹកដែលកំពុងស្នាក់នៅបណ្តោះអាសន្នក្នុងវត្តបាក់ថ្កូវ ស្រុកចុងកាល់ ខេត្តឧត្តមានជ័យ និងនៅវត្តពោធិ៍ ៥០០០ដើម ស្រុកគូលែន ខេត្តព្រះវិហារ។

ជុំវិញការសួរសុខទុក្ខ និងនាំអំណោយចែកជូននាពេលនេះលោក តាំង សុខឃី បានលើកឡើងអំពីផលវិបាករបស់បងប្អូន ដែលបានចាកចេញពីស្រុកកំណើត ដោយសារការប៉ះទង្គិចគ្នារវាងកងទ័ពកម្ពុជា-ថៃ នៅតាមព្រំដែន និងបានសំណូមពរឱ្យពួកគាត់ដែលកំពុងស្នាក់នៅទីនោះ ថែរក្សាសុខភាពជាចម្បង ដោយរស់នៅស្អាត ហូបចុកស្អាត និងមានអនាម័យ ប្រើប្រាស់បង្គន់អនាម័យគ្រប់ពេលវេលា ជួយចូលរួមសម្អាតទាំងអស់គ្នា និងមានការប្រុងប្រយ័ត្នខ្ពស់ចំពោះកូនចៅតូចៗ ជៀសវាងគ្រោះថ្នាក់ជាយថាហេតុ និងសូមឱ្យបងប្អូនសម្រាកក្នុងមុងឱ្យបានត្រឹមត្រូវ ជៀសវាងជំងឺផ្សេងៗដូចជាគ្រុនឈាមជាដើម ខណៈរដូវវស្សាមានភ្លៀងធ្លាក់ច្រើន។

លោកលើកឡើងបន្ថែមថា ពាក់ព័ន្ធនឹងបញ្ហាប៉ះទង្គិចគ្នា នៅតាមព្រំដែនដែលទើបបញ្ចប់នាពេលថ្មីៗនេះឃើញថា រាជរដ្ឋាភិបាលក្រៅពីការគិតគូរ ដោះស្រាយបញ្ចប់ម្លោះនៅព្រំដែន ក្នុងនោះជាពិសេសកាកបាទក្រហមកម្ពុជា បានផ្តោតការយកចិត្តទុកដាក់យ៉ាងខ្លាំង អំពីសុខទុក្ខរបស់បងប្អូនប្រជាពលរដ្ឋ ដែលភៀសខ្លួនមករស់នៅបណ្តោះអាសន្ន តាមតំបន់សុវត្ថិភាពនានា។ ក្រៅពីនេះក៏មានកំលាំងជាតិនិយមខ្មែរ ចេះជួយខ្មែរក្នុងគ្រាជួបការលំបាក មានសកម្មភាពកើតឡើងយ៉ាងផុលផុស ដែលប្រការទាំងនោះ បង្ហាញឃើញជាតិសាសន៍ខ្មែរតែមួយ កំលាំងតែមួយ ជួយដោះស្រាយគ្នានូវគ្រាលំបាកក្នុងសង្គម។

លោក តាំង សុខឃី បានបញ្ជាក់ដោយសង្កត់ធ្ងន់ថា «យើងរួមគ្នាសាងអំពើល្អ! បន្តការគាំទ្រគោលនយោបានរបស់រាជរដ្ឋាភិបាល និងយុទ្ធសាស្ត្រដ៏ខ្ពង់ខ្ពស់ ច្បាស់លាស់របស់សម្តេចអគ្គមហាសេនាបតីតេជោ ហ៊ុន សែន នៅគ្រប់ដំណាក់កាលប្រទេសជាតិជួបបញ្ហាសម្តេចតេជោ នៅរួមសុខ រួមទុក្ខ មិនទៅណាចោលប្រទេសជាតិ និងប្រជាជនជាដាច់ខាត។ យើងមានភ័ព្វសំណាងដែលមានសម្តេចតេជោ ប្រធានព្រឹទ្ធសភា និងសម្តេចបវរធិបតីជានាយករដ្ឋមន្ត្រីនៃព្រះរាជាណាចក្រកម្ពុជា តែងតែយកចិត្តទុកដាក់តម្កល់ផលប្រយោជន៍ជាតិ និងប្រជាជនជាធំ យើងខ្ញុំទាំងអស់គ្នាសូមសម្ដែងការគោរពដឹងគុណយ៉ាងជ្រាលជ្រៅបំផុត»។

សូមបញ្ជាក់ថា សកម្មភាពក្រុមការងាររបស់លោក តាំង សុខឃី និងក្រុមការងារនាពេលនេះ បាននិងកំពុងចូលរួមសម្រាលទុក្ខលំបាកជាមួយរាជរដ្ឋាភិបាល តាមរយៈការនាំយកអំណោយ
ចែកជូនដោយផ្ទាល់។

អំណោយទាំងនោះរួមមាន អង្ករចំនួន ៦ តោន ចែកចេញជា ៤០០កញ្ចប់, ទឹកសុទ្ធ ១៥០០យួរ, ទឹកត្រី ១០០យួរ, ទឹកស៊ីអ៊ីវ ១០០យួរ, គិតជាទឹកប្រាក់សរុបប្រមាណជិត ១៣លានរៀល។ ចំពោះអំណោយដែលចែកជូននេះ មិនអាចដោះស្រាយរយៈពេលវែងបានក៏ដោយ ប៉ុន្តែជាការចូលរួមចំណែកជួយសម្រាលការលំបាក ចំពោះការស្នាក់នៅរបស់បងប្អូនក្នុងពេលបច្ចុប្បន្នបានមួយគ្រាផងដែរ៕