(ឧត្តរមានជ័យ)៖ លោកបណ្ឌិត ឃួន សុវណ្ណ ទីប្រឹក្សាសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាក្រុមការងារចលនាកសាងសមាជិកគណបក្សប្រជាជនកម្ពុជាខេត្តព្រៃវែង ព្រមទាំងក្រុមការងារ នៅថ្ងៃទី២ ខែសីហា ឆ្នាំ២០២៥ បានបន្តចុះសួរសុខទុក្ខ នាំយកអំណោយមនុស្សធម៌ជាសម្ភារប្រើប្រាស់ និងថវិកាមួយចំនួនជូនដល់វីរៈកងទ័ពទិសប្រាសាទតាមាន់ធំ ខេត្តឧត្តរមានជ័យ។

ក្នុងឱកាសនោះលោកបណ្ឌិត ឃួន សុវណ្ណ បានកោតសរសើរ និងការដឹងគុណចំពោះវីរភាពយុទ្ធជនដ៏អង់អាចក្លាហានរបស់យើង ដែលបានតស៊ូស្វិតស្វាញក្រាញននាល ដើម្បីការពារជាតិ ការពារបូរណភាពទឹកដី និងការពារប្រជាជនយើង អំពីការរំលោភឈ្លានពានដ៏ឃោឃៅព្រៃផ្សៃរបស់ពួកទាហានសៀម មកលើទឹកដីកម្ពុជា។

បន្ថែមលើសពីនេះ លោកបណ្ឌិត សូមគោរពអរគុណដ៏ជ្រាលជ្រៅជាទីបំផុតចំពោះសម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ដែលបានខិតខំស្វែងរកសន្តិភាព បញ្ឈប់ការបាញ់គ្នាជាបន្ទាន់ តាមរយៈការជួយ អន្តរាគមន៍ពីប្រធានាធិបតីអាមេរិក និងនាយករដ្ឋមន្រ្តីម៉ាឡេស៊ី ដែលជាសហប្រធានប្ដូរវេនរបស់អាស៊ាន និងប្រទេសចិន ហើយសូមអរគុណចំពោះសេនានុព័ន្ធយោធាបណ្ដាប្រទេសនានា ដែលបានអញ្ជើញទាន់ពេលវេលា មកត្រួតពិនិត្យការឈប់បាញ់នៅតាមព្រំដែនកម្ពុជាថៃ។

លោកបណ្ឌិត ឃួន សុវណ្ណ បានជូនពរបងប្អូនវីៈរកងទ័ពដែលកំពុងឈរជើងនៅជួរមុខទាំងអស់សូមមានសុខសុវត្ថិភាព សុខភាពល្អ និងទទួលបានជោគជ័យគ្រប់ភារកិច្ចការងារផងដែរ៕