(ភ្នំពេញ)៖ ក្រោយផ្ទុះជម្លោះព្រំដែនកម្ពុជា-ថៃ ដែលបានបង្កនូវផលប៉ះពាល់ជាខ្លាំង ដល់កងទ័ព និងប្រជាពលរដ្ឋស្លូតត្រង់ ដែលត្រូវជម្លៀសចេញពីលំនៅឋានរាប់ម៉ឺនគ្រួសារ សិស្សសាលាត្រូវខានសិក្សារៀនសូត្រ គេឃើញមានប្រជាពលរដ្ឋខ្មែរទូទាំងប្រទេស បានរួមគ្នាគ្រប់រូបភាព ក្រៅពីការលើកទឹកចិត្ត ក៏បានបង្កើតនូវមូលនិធិផ្សេងៗ ដើម្បីកៀគរថវិកា សម្ភារ និងគ្រឿងឧបភោកបរិភោគផ្សេងៗ សម្រាប់ជួយដល់កងទ័ព ក៏ដូចជាជនភៀសសឹក ក្នុងនោះក៏មានការចូលរួមពីកីឡាករ-កីឡាការិនីមួយចំនួនផងដែរ។

ជាក់ស្ដែងកីឡាការិនី ពៅ សុខា សមាជិកក្រុមជម្រើសជាតិវ៉ូវីណាមកម្ពុជា ព្រមទាំងក្រុមការងារមួយចំនួន បានរួមគ្នាបង្កើតមូលនិធិសប្បុរសធម៌កីឡាការិនី ពៅ សុខា កាលពីថ្មីៗ ដោយបានកៀគរជាថវិកា សម្ភារ ស្បៀងអាហារ និងថ្នាំសង្កូវ ដែលបានទទួលការគាំទ្រជាច្រើនពីសប្បុរសជននានា ហើយម្ចាស់មេដាយមាសអន្ដរជាតិស្ទើររាប់ភ្លេចរូបនេះ ក៏កំពុងដឹកនាំក្រុមការងារនាំយកជំនួយទាំងអស់នោះ ទៅប្រគល់ជូនដល់កងទ័ព និងជនភៀសសឹកជាបន្ដបន្ទាប់ផងដែរ។

គិតត្រឹមថ្ងៃទី២ ខែសីហានេះ ទីតាំងដែលកីឡាការិនី ពៅ សុខា និងក្រុមការងារ បាននាំយកជំនួយ រួមមានថវិកា និងគ្រឿងឧបភោគបរិភោគ ទៅប្រគល់ជូន ទី១-ប្រគល់ជូនកងកម្លាំងវិស្វកម្ម ក.ព.ជ សមរភូមិមុខទិសយោធភូមិភាគទី៤ ដែលកំពុងឈរជើងនៅភូមិសាស្រ្តខេត្តសៀមរាប, ទី២-ប្រគល់ជូនគ្រឿងឧបភោគបរិភោគដល់ប្រជាពលរដ្ឋជាជនភៀសសឹកនៅវត្តរុនឯក ៦០គ្រួសារ, វត្តសិលាចារបន្ទាយស្រី ៤៥គ្រួសារ និងវត្តចារឈូករង្សី ៣៨គ្រឿង ព្រមទាំងកងកម្លាំងប្រជាការពារតាមវត្តនីមួយៗផងដែរ។

ក្រៅពីការនាំយកជំនួយជួយដល់កងទ័ព និងជនភៀសសឹក ក្រុមការងាររបស់កីឡាការិនី ពៅ សុខា ក៏បានចូលរួមគោរពវិញ្ញាណក្ខខណ្ឌ និងនាំយកថវិការទទួលបានពីសប្បុរសជន ចូលរួមរំលែកទុក្ខជាមួយក្រុមគ្រួសារ របស់វិរកងទ័ព ៣រូប ដែលបានពលីក្នុងសមរភូមិ កាលពីថ្មីៗ ស្ថិតនៅភូមិព្រះដាក់, ភូមិរុនតាឯក និងភូមបន្ទាយស្រី នាខេត្តសៀមរាប ។ ដោយសារមានសប្បុរសជនបន្ដផ្ដល់ជំនួយ សុខា ថា ខ្លួននឹងបន្ដរៀបចំគ្រឿងឧបភោគបរិភោគសម្រាប់ជួយដល់កងទ័ពបន្ថែមទៀត៕